ನವದೆಹಲಿ: ಎಂಪ್ಲಾಯೀಸ್ ಪ್ರಾವಿಡೆಂಟ್ ಫಂಡ್(ಇಪಿಎಫ್)ನ ಠೇವಣಿಗೆ ಸಂಬಂಧಿಸಿದ ಬಡ್ಡಿದರವನ್ನು 2019-20ನೇ ಸಾಲಿಗೆ ಅನ್ವಯವಾಗುವಂತೆ ಶೇಕಡ 8.65 ಉಳಿಸಿಕೊಳ್ಳಲು ಕಾರ್ಮಿಕ ಸಚಿವಾಲಯ ಒಲವು ತೋರಿಸಿದೆ. ಇದು ಜಾರಿಯಾದರೆ ಇಪಿಎಫ್ಒ(ಎಂಪ್ಲಾಯೀಸ್ ಪ್ರಾವಿಡೆಂಟ್ ಫಂಡ್ ಆರ್ಗನೈಸೇಷನ್)ದ ಅಂದಾಜು ಆರು ಕೋಟಿ ಚಂದಾದಾರಿಗೆ ಅನುಕೂಲವಾಗಲಿದೆ ಎಂದು ಮೂಲಗಳು ಹೇಳಿವೆ.
ಇಪಿಎಫ್ಒದ ಸೆಂಟ್ರಲ್ ಬೋರ್ಡ್ ಆಫ್ ಟ್ರಸ್ಟಿಗಳು ಮಾರ್ಚ್ 5ರಂದು ನಡೆಯುವ ಸಭೆಯಲ್ಲಿ ಈ ಕುರಿತ ಮಹತ್ವದ ನಿರ್ಧಾರವನ್ನು ತೆಗೆದುಕೊಳ್ಳಲಿದ್ದಾರೆ. ಕೇಂದ್ರ ಕಾರ್ಮಿಕ ಸಚಿವಾಲಯವು 2018-19ನೇ ಸಾಲಿನಲ್ಲಿ ನೀಡಿದಂತೆ ಶೇಕಡ 8.65 ಬಡ್ಡಿದರವನ್ನೂ ಈ ವರ್ಷಕ್ಕೂ ಮುಂದುವರಿಸಲು ಒಲವು ತೋರಿದೆ. ಆರ್ಥಿಕ ವಿಳಂಬಗತಿಯ ಕಾರಣ ಇಪಿಎಫ್ ಬಡ್ಡಿದರ ಶೇಕಡ 8.5ಕ್ಕೆ ಇಳಿಕೆಯಾಗಬಹುದು ಎಂಬ ವದಂತಿ ಹರಿದಾಡುತ್ತಿತ್ತು.
ಆದಾಗ್ಯೂ, ಮೂಲಗಳ ಪ್ರಕಾರ ಇಪಿಎಫ್ಒದ ಸೆಂಟ್ರಲ್ ಬೋರ್ಡ್ ಆಫ್ ಟ್ರಸ್ಟಿಗಳ ಮೀಟಿಂಗ್ನ ಅಜೆಂಡಾ ಇನ್ನೂ ಅಂತಿಮವಾಗಿಲ್ಲ. ಇಪಿಎಫ್ಒದ ಪ್ರಸಕ್ತ ಹಣಕಾಸು ಸಾಲಿನ ನಿರೀಕ್ಷಿತ ಆದಾಯ ಪ್ರಮಾಣ ಅಂದಾಜಿಸದೇ ಬಡ್ಡಿದರ ನಿಗದಪಡಿಸಲಾಗದು. ಈ ಕೆಲಸದ ಕಡೆಗೆ ಇಪಿಎಫ್ಒ ಈಗ ಗಮನಹರಿಸಿದೆ. (ಏಜೆನ್ಸೀಸ್)