ಮ್ಯಾಂಚೆಸ್ಟರ್: ಆಲ್ರೌಂಡರ್ ಬೆನ್ ಸ್ಟೋಕ್ಸ್ (172*ರನ್, 349 ಎಸೆತ, 17 ಬೌಂಡರಿ, 2 ಸಿಕ್ಸರ್) ಹಾಗೂ ಆರಂಭಿಕ ಬ್ಯಾಟ್ಸ್ಮನ್ ಡೊಮಿನಿಕ್ ಸಿಬ್ಲೆ (120ರನ್, 372 ಎಸೆತ, 5 ಬೌಂಡರಿ) ಜೋಡಿ ಕಟ್ಟಿದ ಜವಾಬ್ದಾರಿಯುತ ಇನಿಂಗ್ಸ್ ಫಲವಾಗಿ ಆತಿಥೇಯ ಇಂಗ್ಲೆಂಡ್ ತಂಡ ದ್ವೀತಿಯ ಟೆಸ್ಟ್ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಬೃಹತ್ ಮೊತ್ತದತ್ತ ಮುಖಮಾಡಿದೆ. ಓಲ್ಡ್ ಟ್ರಾಫೋಡ್ರ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ 3 ವಿಕೆಟ್ಗೆ 207 ರನ್ಗಳಿಂದ 2ನೇ ದಿನದಾಟ ಆರಂಭಿಸಿದ ಇಂಗ್ಲೆಂಡ್, ಎರಡನೇ ದಿನದಾಟದ ಚಹಾವಿರಾಮದ ವೇಳೆಗೆ 139 ಓವರ್ ಗಳಲ್ಲಿ 5 ವಿಕೆಟ್ ಗೆ 378 ರನ್ ಕಲೆಹಾಕಿದೆ. ಭೋಜನ ವಿರಾಮದ ವೇಳೆಗೆ ಇಂಗ್ಲೆಂಡ್ 3 ವಿಕೆಟ್ಗೆ 264 ರನ್ ಪೇರಿಸಿತ್ತು. ಶತಕ ಸಾಧಕ ಬೆನ್ ಸ್ಟೋಕ್ಸ್ ಹಾಗೂ ಜೋಸ್ ಬಟ್ಲರ್ (12ರನ್, 28 ಎಸೆತ, 1 ಬೌಂಡರಿ) ವಿಕೆಟ್ ಕಾಯ್ದುಕೊಂಡಿದ್ದಾರೆ.
ಇನಿಂಗ್ಸ್ ಕಟ್ಟಿದ ಸಿಬ್ಲೆ-ಸ್ಟೋಕ್ಸ್
ಕ್ರಮವಾಗಿ 86 ಹಾಗೂ 59 ರನ್ಗಳಿಂದ ಎರಡನೇ ದಿನದಾಟ ಆರಂಭಿಸಿದ ಡೊಮಿನಿಕ್ ಸಿಬ್ಲೆ ಹಾಗೂ ಬೆನ್ ಸ್ಟೋಕ್ಸ್ ಜೋಡಿ ಒಂದು ಅವಧಿ ಪೂರ್ತಿ ಬ್ಯಾಟಿಂಗ್ ಕಾಯ್ದುಕೊಂಡಿತು. ಮೊದಲ ದಿನದಾಟದ ಆರಂಭದಲ್ಲೇ ಮಿಂಚಿನ ದಾಳಿ ನಡೆಸಿದ ವಿಂಡೀಸ್ ಬೌಲರ್ಗಳು ಈ ಜೋಡಿ ಬೇರ್ಪಡಿಸಲು ವಿಫಲರಾದರು. ಮೊದಲ ದಿನದಾಟದ ಕಡೇ ಹಂತದಲ್ಲಿ ಸಿಬ್ಲೆ 68 ರನ್ಗಳಿದ್ದ ವೇಳೆ ಗ್ಯಾಬ್ರಿಯಲ್ ಎಸೆತದಲ್ಲಿ ಹೋಲ್ಡರ್ ಕ್ಯಾಚ್ ಕೈಚೆಲ್ಲಿದ್ದರು. ಇದರ ಲಾಭ ಗಿಟ್ಟಿಸಿಕೊಂಡ ಸಿಬ್ಲೆ ಟೆಸ್ಟ್ ಕ್ರಿಕೆಟ್ನಲ್ಲಿ 2ನೇ ಶತಕ ಸಿಡಿಸಿದರು. ಭೋಜನ ವಿರಾಮದ ವರೆಗೂ ಈ ಜೋಡಿ ವಿಕೆಟ್ ಕಾಯ್ದುಕೊಂಡಿತು. ಭೋಜನ ವಿರಾಮದ ಬಳಿಕ ನಡೆದ ಮೊದಲ ಓವರ್ನಲ್ಲೇ ಬೌಂಡರಿ ಸಿಡಿಸುವ ಮೂಲಕ ಸ್ಟೋಕ್ಸ್ ಶತಕ ಪೂರೈಸಿದರು. ಈ ಜೋಡಿ 4ನೇ ವಿಕೆಟ್ಗೆ 261 ರನ್ ಜತೆಯಾಟವಾಡುವ ಮೂಲಕ ತಂಡಕ್ಕೆ ನೆರವಾಯಿತು. ಮೊದಲ ದಿನದಾಟದಲ್ಲಿ ಇಂಗ್ಲೆಂಡ್ ಕಾಡಿದ ಪ್ರವಾಸಿ ತಂಡದ ಸ್ಪಿನ್ನರ್ ರೋಸ್ಟನ್ ಚೇಸ್, ಈ ಜೋಡಿ ಬೇರ್ಪಡಿಸಿದರು. ಸಿಬ್ಲಿ ವಿಕೆಟ್ ಕಬಳಿಸುವ ಮೂಲಕ ಈ ಜೋಡಿಯ ಸುದೀರ್ಘ ಇನಿಂಗ್ಸ್ಗೆ ಬ್ರೇಕ್ ಹಾಕಿದರು. ಬಳಿಕ ಬಂದ ಒಲಿ ಪೋಪ್ (7) ಕೂಡ ಚೇಸ್ಗೆ ವಿಕೆಟ್ ಒಪ್ಪಿಸಿದರು. ಮೊದಲ ದಿನದಾಟದಲ್ಲಿ ಆತಿಥೇಯ ತಂಡಕ್ಕೆ ಆರಂಭಿಕ ಆಘಾತ ನೀಡಿದ್ದ ರೋಸ್ಟನ್ ಚೇಸ್, ಶುಕ್ರವಾರವೂ ಎರಡು ವಿಕೆಟ್ ಕಬಳಿಸಿದ್ದಾರೆ.
ಇಂಗ್ಲೆಂಡ್: ಎರಡನೇ ದಿನದಾಟದ ಚಹಾವಿರಾಮದ ವೇಳೆಗೆ 139 ಓವರ್ಗಳಲ್ಲಿ 5 ವಿಕೆಟ್ಗೆ 378 (ಡೊಮಿನಿಕ್ ಸಿಬ್ಲೆ 120, ಸ್ಟೋಕ್ಸ್ 172*, ರೂಟ್ 23, ರೋಸ್ಟನ್ ಚೇಸ್ 106ಕ್ಕೆ 4, ಅಲ್ಜಾರಿ ಜೋಸೆಫ್ 70ಕ್ಕೆ 1).