ಬೆಂಗಳೂರು: ಮಿಕ್ಸಿ ಹಾಗೂ ಟಿವಿ ಬಿಡಿ ಭಾಗಗಳಿಂದ ಸುಮಾರು 600 ಡ್ರೊನ್ಗಳನ್ನು ತಯಾರಿಸಿದ್ದೇನೆಂದು ಹೇಳಿ ಜನಮನ್ನಣೆ ಗಳಿಸಿ, ಇದೀಗ ನಕಲಿ ವಿಜ್ಞಾನಿ ಎಂಬ ಕುಖ್ಯಾತಿ ಗಳಿಸಿರುವ ಡ್ರೋನ್ ಪ್ರತಾಪ್, ತಮ್ಮ ಸಾಧನೆಯನ್ನು ಸಾಬೀತುಪಡಿಸಲು ಕೊನೆಗೂ ಸಮಯ ನಿಗದಿ ಮಾಡಿದ್ದಾರೆ.
ಕನ್ನಡದ ಖಾಸಗಿ ನ್ಯೂಸ್ ಚಾನೆಲ್ನಲ್ಲಿ ಇಂದು ರಾತ್ರಿ ಏಳು ಗಂಟೆಗೆ ಲೈವ್ ಬರುವುದಾಗಿ ಪ್ರತಾಪ್ ಒಂದು ಗಂಟೆ ಹಿಂದಷ್ಟೇ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಪೋಸ್ಟ್ ಹಾಕಿಕೊಂಡಿದ್ದಾರೆ. ಸಾಕ್ಷಿಯೊಂದಿಗೆ ನಾನು ಲೈವ್ನಲ್ಲಿ ಬರುತ್ತಿದ್ದೇನೆ ಎಂದು ಬರೆದುಕೊಂಡಿದ್ದಾರೆ.
ಮರುಬಳಕೆ ವಸ್ತುಗಳಿಂದ ಡ್ರೋನ್ ತಯಾರಿಸಿರುವುದಾಗಿ ಹೇಳಿ ಪ್ರಸಿದ್ಧಿಯ ಶಿಖರವೇರಿದ್ದ ಪ್ರತಾಪ್ ನಿಜಬಣ್ಣ ಇತ್ತೀಚೆಗಷ್ಟೆ ಫ್ಯಾಕ್ಟ್ಚೆಕ್ ವರದಿಯಿಂದ ಬಯಲಾಗಿತ್ತು. ಪ್ರತಾಪ್ ಯಾವುದೇ ಡ್ರೋನ್ ಕಂಡುಹಿಡಿದಿಲ್ಲ. ಆತನ ಹೆಸರಲ್ಲಿ ಪ್ರಶಸ್ತಿಗಳು ಇಲ್ಲ. ಅಲ್ಲದೆ, ಡಿಗ್ರಿಯಲ್ಲಿ ಎರಡು ವಿಷಯ ಬಾಕಿ ಇದೆ. ಎಲ್ಲಿಯೂ ತಾನು ತಯಾರಿಸಿದ ಡ್ರೋನ್ ಪ್ರದರ್ಶನ ಮಾಡಿಲ್ಲ ಹೀಗೆ ಸಾಕಷ್ಟು ಆರೋಪಗಳ ಕೇಳಿಬಂದಿದ್ದವು.
ಇದರ ಬೆನ್ನಲ್ಲೆ ಸಾಮಾಜಿಕ ಜಾಲತಾಣದಲ್ಲಿ ಪ್ರತಾಪ್ ಸಿಕ್ಕಾಪಟ್ಟೆ ಟ್ರೋಲ್ ಆಗಿದ್ದು, ಅನೇಕ ನೆಟ್ಟಿಗರು ಪ್ರತಾಪ್ ಬಳಿ ಸಾಕ್ಷಿ ಕೇಳಿದ್ದರು. ಇದೀಗ ಅದಕ್ಕೆಲ್ಲ ಉತ್ತರ ಎಂಬಂತೆ ಇಂದು ಏಳು ಗಂಟೆಗೆ ಕನ್ನಡ ಖಾಸಗಿ ನ್ಯೂಸ್ ಚಾನೆಲ್ನಲ್ಲಿ ಲೈವ್ ಬರುವುದಾಗಿ ಪ್ರತಾಪ್ ಹೇಳಿಕೊಂಡಿದ್ದಾರೆ.