‘ಕಿಚ್ಚ’ ಸುದೀಪ್ ಅವರಿಗೆ ಡಾ. ವಿಷ್ಣುವರ್ಧನ್ ಅವರ ಜತೆಗೆ ಅತ್ಯುತ್ತಮ ಒಡನಾಟವಿತ್ತು. ‘ಮಾತಾಡ್ ಮಾತಾಡು ಮಲ್ಲಿಗೆ’ ಚಿತ್ರದಲ್ಲಿ ಅವರೊಟ್ಟಿಗೆ ಅಭಿನಯಿಸುವುದರ ಜತೆಗೆ, ‘ನಂ. 73 ಶಾಂತಿ ನಿವಾಸ’ ಚಿತ್ರದಲ್ಲಿ ವಿಷ್ಣುವರ್ಧನ್ ಅವರನ್ನು ನಿರ್ದೇಶಿಸಿದ್ದರು ಸುದೀಪ್. ಬರೀ ಸಿನಿಮಾಗಳಲ್ಲಷ್ಟೇ ಅಲ್ಲ, ನಿಜಜೀವನದಲ್ಲೂ ವಿಷ್ಣುವರ್ಧನ್ ಅವರ ಜತೆಗೆ ಒಳ್ಳೆಯ ಬಾಂಧವ್ಯ ಇಟ್ಟುಕೊಂಡಿದ್ದ ಸುದೀಪ್ ಅವರನ್ನು ವಿಷ್ಣುವರ್ಧನ್ ಜತೆಗೆ ಹಲವು ಸಲ ಹೋಲಿಕೆ ಮಾಡಲಾಗಿದೆ. ಆದರೆ, ಅವರ ಜತೆಗೆ ಹೋಲಿಕೆ ಬೇಡ ಎಂದು ಸುದೀಪ್ ಈ ಹಿಂದೆಯೇ ಹೇಳಿಕೊಂಡಿದ್ದರು. ಈಗ ಆ ಮಾತುಗಳನ್ನು ಅವರು ಪುನರುಚ್ಛರಿಸಿದ್ದಾರೆ.
ಅದಕ್ಕೆ ಕಾರಣವಾಗಿದ್ದು ‘ಕೋಟಿಗೊಬ್ಬ 3’ ಚಿತ್ರ. ಈ ಚಿತ್ರದ ಲಿರಿಕಲ್ ವೀಡಿಯೋ ಸೋಮವಾರ ಬಿಡುಗಡೆಯಾಗಿ, ಅಪಾರ ಜನಪ್ರಿಯತೆ ಪಡೆದಿದೆ. ಈ ಮಧ್ಯೆ ಸೋಷಿಯಲ್ ಮೀಡಿಯಾದಲ್ಲಿ ಒಂದು ಪೋಲ್ ಪ್ರಾರಂಭವಾಗಿತ್ತು. ‘ಕೋಟಿಗೊಬ್ಬ 3’ ಸೀರೀಸ್ನ ಯಾವ ಟೈಟಲ್ ಸಾಂಗ್ ನಿಮಗೆ ಹೆಚ್ಚು ಇಷ್ಟ ಎಂದು ಕೇಳಲಾಗಿತ್ತು. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಸುದೀಪ್, ವಿಷ್ಣುವರ್ಧನ್ ಜತೆಗೆ ಹೋಲಿಕೆ ಮಾಡಬೇಡಿ ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಕುರಿತು ಇತ್ತೀಚೆಗೆ ಟ್ವೀಟ್ ಮಾಡಿರುವ ಅವರು, ‘‘ಕೋಟಿಗೊಬ್ಬ’ ಶುರುವಾಗಿದ್ದು ವಿಷ್ಣು ಸಾರ್ ಅವರಿಂದ. ಅವರ ಜಾಗ ತುಂಬುವುದಕ್ಕೆ ಯಾರಿಂದಲೂ ಸಾಧ್ಯವಿಲ್ಲ. ಹಿರಿಯರನ್ನೊಳಗೊಂಡ ಈ ತರಹದ ಪೋಲ್ಗಳನ್ನು ದಯವಿಟ್ಟು ಮಾಡಬೇಡಿ. ಏಕೆಂದರೆ, ಅವರೆಲ್ಲಾ ನಮ್ಮ ಚಿತ್ರರಂಗದ ಆಧಾರಸ್ತಂಭಗಳಿದ್ದಂತೆ. ಅವರಿಗೆ ಹೋಲಿಸಿದರೆ ನಾನು ಮತ್ತು ನನ್ನ ಚಿತ್ರಗಳು ಬಹಳ ಚಿಕ್ಕವು’ ಎಂದು ಸುದೀಪ್ ಹೇಳಿದ್ದಾರೆ.
ನೆನಪು ನಂದನ ಭಾವ ಚಿರಂತನ; ಮಾಸ್ಟರ್ ಹಿರಣ್ಣಯ್ಯ ಅಗಲಿ ಇಂದಿಗೆ ಒಂದು ವರ್ಷ
