ವಾಷಿಂಗ್ಟನ್: ಚೀನಾ ದಬ್ಬಾಳಿಕೆ ಮುಂದುವರಿದಿದ್ದೇ ಆದಲ್ಲಿ ಅಂತಾರಾಷ್ಟ್ರೀಯ ಆರ್ಥಿಕ ಕೇಂದ್ರವೆಂಬ ಸ್ಥಾನಮಾನವನ್ನು ಹಾಂಗ್ಕಾಂಗ್ ಕಳೆದುಕೊಳ್ಳಲಿದೆ ಎಂದು ಅಮೆರಿಕ ಎಚ್ಚರಿಕೆ ನೀಡಿದೆ. ಚೀನಾ ಕ್ರಮದ ಬಗ್ಗೆ ‘ಅತ್ಯಂತ ಆಸಕ್ತಿದಾಯಕ’ ಪ್ರತಿಕ್ರಿಯೆ ನೀಡುವುದಾಗಿ ಭರವಸೆಯಿತ್ತಿದೆ.
ಹಾಂಗ್ಕಾಂಗ್ ಮೇಲೆ ತನ್ನ ಹಿಡಿತವನ್ನು ಇನ್ನಷ್ಟು ಹೆಚ್ಚಿಸಲು ಮುಂದಾಗಿರುವ ಚೀನಾ, ವಿಶೇಷ ಕಾಯ್ದೆಯನ್ನು ಜಾರಿಗೊಳಿಸಲು ಮುಂದಾಗಿದೆ. ಅದರಂತೆ ಹಾಂಗ್ಕಾಂಗ್ ಚೀನಾದಿಂದ ಬೇರ್ಪಡುವುದು, ಉಪಟಳ ಉಂಟು ಮಾಡುವುದು, ಭಯೋತ್ಪಾದನೆ ಹಾಗೂ ವಿದೇಶ ಹಸ್ತಕ್ಷೇಪವನ್ನು ನಿರ್ಬಂಧಿಸಲಾಗುತ್ತದೆ. ಆದರೆ, ಅಗತ್ಯ ಸ್ವಾತಂತ್ರ್ಯ ನೀಡಲಾಗುತ್ತದೆ ಎಂದು ಹಾಂಗ್ಕಾಂಗ್ನ ಮುಖ್ಯಾಧಿಕಾರಿ ಕ್ಯಾರಿ ಲ್ಯಾಮ್ ಹೇಳಿದ್ದಾರೆ.
ಇದನ್ನೂ ಓದಿ; ಅಕ್ರಮ ನುಸುಳುವಿಕೆಯಲ್ಲಿ ಪಾಕಿಸ್ತಾನವನ್ನು ಮೀರಿಸುತ್ತಿರುವ ಚೀನಾ? ಗಡಿಯಲ್ಲಿ ಸೇನೆ ಜಮಾವಣೆ
ಆದರೆ, ಚೀನಾ ಹಾಂಗ್ಕಾಂಗ್ನ್ನು ಅತಿಕ್ರಮಿಸಿದ್ದೇ ಆದಲ್ಲಿ, ಅದು ಆರ್ಥಿಕ ಚಟುವಟಿಕೆಯ ತಾಣವಾಗಿ ಉಳಿಯುವುದು ಕಷ್ಟವಾಗಲಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ವತಃ ಈ ಎಚ್ಚರಿಕೆ ನೀಡಿದ್ದಾರೆ ಎಂದು ಶ್ವೇತಭವನದ ಮಾಧ್ಯಮ ವಕ್ತಾರೆ ಕೇಲಿ ಮ್ಯಾಕ್ ಎನಾನಿ ಹೇಳಿದ್ದಾರೆ.
ಚೀನಾ ಮೇಲೆ ಅಮೆರಿಕ ದಿಗ್ಬಂಧನಗಳನ್ನು ವಿಧಿಸಲಿದೆಯೇ, ಚೀನಿ ವಿದ್ಯಾರ್ಥಿಗಳಿಗೆ ವೀಸಾ ನೀಡುವುದರ ಮೇಲೆ ನಿರ್ಬಂಧಗಳನ್ನು ಹಾಕಲಾಗುತ್ತದೆಯೇ ಎಂದು ಬಳಿಕ ಟ್ರಂಪ್ ಅವರನ್ನೇ ವರದಿಗಾರರು ಪ್ರಶ್ನಿಸಿದರು. ಇದೊಂದು ತುಂಬಾ ಮುಖ್ಯವಾದ ಪ್ರಶ್ನೆ ಎಂದ ಟ್ರಂಪ್, ಇದಕ್ಕೆ ಕೆಲ ಸಮಯದಲ್ಲಿ ಬಹುಶ: ಈ ವಾರಾಂತ್ಯದೊಳಗೆ, ಅತ್ಯಂತ ಶಕ್ತಿಯುತ ಉತ್ತರ ನಿಮಗೆ ಸಿಗಲಿದೆ ಎಂದರು. ಆದರೆ, ಯಾವ ಕ್ರಮಗಳನ್ನು ಕೈಗೊಳ್ಳಲಿದೆ ಎಂಬ ಬಗ್ಗೆ ಯಾವುದೇ ಸುಳಿವನ್ನೂ ನೀಡಲಿಲ್ಲ.
ಇದನ್ನೂ ಓದಿ; ಈ ಬಾರಿ ಶಿಕ್ಷಣ ಸಂಸ್ಥೆಗಳಿಗೆ ಬೇಸಿಗೆ ರಜೆ ಮೊಟಕು; ಡಿಸಿಎಂ ಅಶ್ವತ್ಥನಾರಾಯಣ್ ಮಾಹಿತಿ
ಚೀನಾ ಕಾಯ್ದೆ ಜಾರಿಗೊಳಿಸಲಿದೆ ಎಂಬ ಸುದ್ದಿಯಿಂದಾಗಿ ಹಾಂಗ್ಕಾಂಗ್ ಷೇರು ಮಾರುಕಟ್ಟೆ ಐದು ವರ್ಷಗಳ ಹಿಂದಿನ ಕನಿಷ್ಠ ಸೂಚ್ಯಂಕಕ್ಕೆ ಕುಸಿದಿದೆ. ಹೀಗಿದ್ದರೂ, ಕಾನೂನು ಉಲ್ಲಂಘಿಸುತ್ತಿರುವ ಕೆಲವೇ ಶಕ್ತಿಯನ್ನು ಈ ಕಾಯ್ದೆ ಗುರಿಯಾಗಿಸಿಕೊಂಡಿದೆ ಹಾಂಗ್ಕಾಂಗ್ ಮುಖ್ಯಾಧಿಕಾರಿ ಲ್ಯಾಮ್ ಸಮರ್ಥಿಸಿಕೊಂಡಿದ್ದಾರೆ.
ಪ್ರತ್ಯೇಕತೆಯನ್ನು ಪ್ರಚೋದಿಸುವ ಎಲ್ಲ ಕೃತ್ಯಗಳಿಗೂ ಶಿಕ್ಷೆಯಾಗಲಿದೆ ಎಂದು ಚೀನಾ ಸೇನಾಧಿಕಾರಿ ಚೆನ್ ದಾವೋಕ್ಸಿಯಾಂಗ್ ಹಾಂಗ್ಕಾಂಗ್ನಲ್ಲಿ ಹೇಳಿದ್ದಾರೆ. ಹೀಗಿದ್ದರೂ ಚೀನಾದ ಅತಿಕ್ರಮಣ ಖಂಡಿಸಿ ಸಾವಿರಾರು ಸಂಖ್ಯೆಯಲ್ಲಿ ಜನರು ಬೀದಿಗಿಳಿದು ಹೋರಾಟ ನಡೆಸುವುದು ಮುಂದುವರಿದಿದೆ. ಕಳೆದ ವರ್ಷ ಸತತ ಏಳು ತಿಂಗಳವರೆಗೆ ಹಾಂಗ್ಕಾಂಗ್ನಲ್ಲಿ ಸ್ವಾತಂತ್ರ್ಯ ಬಯಸಿ ಹೋರಾಟ ನಡೆದಿದ್ದವು. ಕರೊನಾದಿಂದಾಗಿ ಈ ಹೋರಾಟಕ್ಕೆ ತಾತ್ಕಾಲಿಕ ತಡೆ ಬಿದ್ದಿತ್ತು.
ಲಡಾಖ್ ಗಡಿಯಲ್ಲಿ ಯುದ್ಧ ವಿಮಾನಗಳನ್ನು ಸಜ್ಜುಗೊಳಿಸಿದ ಚೀನಾ, ಚೀನಿಯರನ್ನು ಕರೆಯಿಸಿಕೊಳ್ಳಲು ಮುಂದಾದ ರಾಯಭಾರ ಕಚೇರಿ