ಪುತ್ತೂರು: ‘ಪುತ್ತೂರು ಮುನ್ನಡೆಯಲಿ- ಭಾರತಕ್ಕೆ ಮಾದರಿಯಾಗಲಿ’ ಎಂಬ ಧ್ಯೇಯೋದ್ದೇಶದೊಂದಿಗೆ, ಸಮಗ್ರ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯನ್ನೊಳಗೊಂಡ ಮೆಡಿಕಲ್ ಕಾಲೇಜು ಸ್ಥಾಪನೆಗಾಗಿ ಪುತ್ತೂರು ಸರ್ಕಾರಿ ಮೆಡಿಕಲ್ ಕಾಲೇಜು ಹೋರಾಟ ಸಮಿತಿ ಮತ್ತು ಪುತ್ತೂರು ಬಳಕೆದಾರರ ಹಿತರಕ್ಷಣಾ ವೇದಿಕೆ ಜಂಟಿಯಾಗಿ ಬೃಹತ್ ಸಾಮಾಜಿಕ ಹೋರಾಟಕ್ಕೆ ಮುನ್ನುಡಿ ಬರೆದಿವೆ.
ಒಂದೇ ಆವರಣದಲ್ಲಿ ಮೆಡಿಕಲ್ ಕಾಲೇಜು ಮಾತ್ರವಲ್ಲದೆ ನಿಮ್ಹಾನ್ಸ್, ಜಯದೇವ, ಕಿದ್ವಾಯಿಯ ಪ್ರಮುಖ ಸೂಪರ್‌ಸ್ಪೆಷಾಲಿಟಿ ಘಟಕಗಳನ್ನು ಒಳಗೊಂಡ ‘ಮಲ್ಟಿ ಸ್ಪೆಷಾಲಿಟಿ’ ಆರೋಗ್ಯ ಸಂಕೀರ್ಣ ನಿರ್ಮಾಣ ಮಾಡುವುದು ಈ ಹೋರಾಟದ ಮುಖ್ಯ ಕನಸಾಗಿದೆ. ಇದರಿಂದ ನರ, ಹೃದಯ, ಕ್ಯಾನ್ಸರ್ ಸಂಬಂಽ ಚಿಕಿತ್ಸೆ ಒಂದೇ ಸೂರಿನಡಿ ಸಿಗುವುದರಿಂದ ಬಡಜನರಿಗೆ ಅನುಕೂಲವಾಗಲಿದೆ.
೧ ಲಕ್ಷ ಸಹಿ ಸಂಗ್ರಹ ಗುರಿ: ಈ ಹೋರಾಟಕ್ಕೆ ಸಾರ್ವಜನಿಕರಿಂದ ಉತ್ತಮ ಬೆಂಬಲ ವ್ಯಕ್ತವಾಗುತ್ತಿದ್ದು, ಈಗಾಗಲೇ ೨೦,೦೦೦ಕ್ಕೂ ಹೆಚ್ಚು ಸಹಿಗಳನ್ನು ಸಂಗ್ರಹಿಸಲಾಗಿದೆ. ಶೀಘ್ರದ ೧ ಲಕ್ಷ ಸಹಿ ಸಂಗ್ರಹಿಸುವ ಗುರಿ ಹೊಂದಲಾಗಿದೆ.
ಒಂದೇ ಸೂರಿನಡಿ ಸೂಪರ್ ಸ್ಪೆಷಾಲಿಟಿ ಘಟಕಗಳು: ಮೆಡಿಕಲ್ ಕಾಲೇಜಿನೊಂದಿಗೆ ನಿಮ್ಹಾನ್ಸ್, ಜಯದೇವ ಹಾಗೂ ಕಿದ್ವಾಯಿ ಸಂಸ್ಥೆಗಳ ಉಪಘಟಕಗಳು, -ರೆನ್ಸಿಕ್ (ಎ-ಎಸ್‌ಎಲ್) ಮತ್ತು ಜೆರಿಯಾಟ್ರಿಕ್ಸ್ (ಹಿರಿಯ ನಾಗರಿಕರ ಆರೈಕೆ) ವಿಭಾಗಗಳು ಒಂದೇ ಆವರಣದಲ್ಲಿ ಬರಬೇಕು ಎಂಬುದು ಸಮಿತಿಯ ಪ್ರಮುಖ ಬೇಡಿಕೆಯಾಗಿದೆ.
ಮುಂದಿನ ಜವಾಬ್ದಾರಿ: ಹೋರಾಟ ಸಮಿತಿಯ ಹೋರಾಟದ ಫಲವಾಗಿ ಸರ್ಕಾರಿ ವೈದ್ಯಕೀಯ ಕಾಲೇಜು ೨೦೨೭-೨೮ರ ಶೈಕ್ಷಣಿಕ ಸಾಲಿನಲ್ಲಿ ಪ್ರಾರಂಭವಾಗುವ ಸೂಚನೆ ಸಿಕ್ಕಿದೆ. ಆದರೂ ಭವಿಷ್ಯದಲ್ಲಿ ಸಂಪೂರ್ಣ ಸರ್ಕಾರಿ ಸ್ವಾಮ್ಯ ಮತ್ತು ಸರ್ಕಾರದ ಅನುದಾನದಲ್ಲೇ ಮುನ್ನಡೆಯುವುದನ್ನು ಖಚಿತಪಡಿಸುವುದು, ಶಿಕ್ಷಣ ಮತ್ತು ರೋಗಿಗಳ ಆರೈಕೆಗೆ ಅಗತ್ಯವಾಗಿರುವ ಎಲ್ಲ ಸೌಲಭ್ಯ ಪಡೆದುಕೊಳ್ಳುವುದು, ಬೋಧಕ, ವೈದ್ಯಕೀಯ ಮತ್ತು ಪೂರಕ ಸಿಬ್ಬಂದಿ ನೇಮಕದಲ್ಲಿ ಭ್ರಷ್ಟಾಚಾರ ನಡೆಯದಂತೆ ಕಣ್ಗಾವಲಿಡುವುದು ಮತ್ತಿತರ ಜವಾಬ್ದಾರಿಗಳನ್ನು ಸಮಿತಿ ನೋಡಿಕೊಳ್ಳಲಿದೆ.
ವೈದ್ಯಕೀಯ ಮತ್ತು ಸಂಶೋಧನಾ ಆವರಣ: ವೈದ್ಯಕೀಯ ಕಾಲೇಜು ಸ್ಥಾಪನೆಗೆ ಪ್ರಕ್ರಿಯೆ ನಡೆಯುತ್ತಿದೆ. ಬಳಿಕ ವಿವಿಧ ಘಟಕಗಳನ್ನೊಳಗೊಂಡ ಉನ್ನತ ತಜ್ಞ ಘಟಕಗಳು ಪುತ್ತೂರಿಗೆ ಆಗಮಿಸಬೇಕು. ಐಸಿಎಂಆರ್‌ನಂತಹ ಸಂಸ್ಥೆಗಳು ಇಲ್ಲಿಗೆ ಬಂದು ಸಂಶೋಧನಾ ಸಾಮರ್ಥ್ಯ ಹೆಚ್ಚಾಗಬೇಕು.
ತುರ್ತು ಸಂದರ್ಭದಲ್ಲಿ ಅನುಕೂಲ
ಕ್ಯಾನ್ಸರ್, ಹೃದಯ, ಪಾರ್ಶ್ವವಾಯುವಿನಂತಹ ಸಮಸ್ಯೆ ಕಾಣಿಸಿಕೊಂಡ ಸಂದರ್ಭದಲ್ಲಿ ಮೂರು ಘಟಕಗಳೂ ಒಂದಕ್ಕೊಂದು ಪೂರಕವಾಗಿ ಕೆಲಸ ಮಾಡಲಿವೆ. ಕಡಿಮೆ ಅವಧಿಯಲ್ಲಿ ಉತ್ತಮ ಚಿಕಿತ್ಸೆಯನ್ನು ಪಡೆದುಕೊಳ್ಳಲು ಇದು ಸಹಕಾರಿಯಾಗಲಿದೆ. ಜನರಿಗೆ ಓಡಾಟ ಕಡಿಮೆಯಾಗಿ ಗೋಲ್ಡನ್ ಹವರ್‌ನಲ್ಲೇ ಚಿಕಿತ್ಸೆ ಲಭಿಸಿ ಪ್ರಾಣಾಪಾಯದಿಂದ ಪಾರಾಗಬಹುದಾಗಿದೆ. ಇದೆಲ್ಲದಕ್ಕೂ ಪೂರಕವಾಗಿ ಭೌಗೋಳಿಕವಾಗಿ ಪುತ್ತೂರು ಅನುಕೂಲಕರವಾಗಿದೆ.
ಜಾಗ ಗುರುತಿಸುವ ಪ್ರಕ್ರಿಯೆ
ಸರ್ಕಾರದ ಹೆಸರಲ್ಲಿ ೫೦ ಎಕರೆಗಿಂತ ಹೆಚ್ಚಿನ ಜಾಗ ಇರುವುದನ್ನು ಗುರುತಿಸಿ ಘಟಕಗಳಿಗೆ ಕಾಯ್ದಿರಿಸುವ ಪ್ರಕ್ರಿಯೆ ನಡೆಯಬೇಕಾಗಿದೆ. ಈ ನಿಟ್ಟಿನಲ್ಲಿ ಸೇಡಿಯಾಪು ಮೆಡಿಕಲ್ ಕಾಲೇಜು ಸ್ಥಾಪನೆಯಾಗುವ ಜಾಗದ ಪಕ್ಕದಲ್ಲೇ ಸುಮಾರು ೧೨೦ ಎಕರೆ ಜಾಗ ಗುರುತಿಸಲಾಗಿದೆ. ನಗರಕ್ಕೆ ಹೆಚ್ಚು ಸಮೀಪವಿರುವ ದೃಷ್ಟಿಯಿಂದ ಆರ್ಯಾಪು ಭಾಗದಲ್ಲಿ ಸುಮಾರು ೮೮ ಎಕರೆ ಜಾಗ ಗುರುತಿಸಲಾಗಿದೆ. ಇದರ ಜತೆಗೆ ಬೇರೆ ಎರಡು, ಮೂರು ಕಡೆಗಳಲ್ಲಿಯೂ ಜಾಗ ಗುರುತಿಸುವ ಪ್ರಕ್ರಿಯೆ ನಡೆಯುತ್ತಿದೆ.
