ಮುಂಬೈ: ಬಾಲಿವುಡ್ ಹಾಟ್ ಆ್ಯಂಡ್ ಬ್ಯೂಟಿಫುಲ್ ಬೆಡಗಿ ದಿಶಾ ಪಟಾನಿಯವರು ಟೀಮ್ ಇಂಡಿಯಾದ ಸ್ಟಾರ್ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರ ಬೌಲಿಂಗ್ ಸ್ಕಿಲ್ಗೆ ಕ್ಲೀನ್ ಬೋಲ್ಡ್ ಆಗಿದ್ದಾರೆ.
ಒಂದು ವೇಳೆ ಪಂದ್ಯ ಗೆಲ್ಲಿಸಬಹುದಾದಂತಹ ಆಟಗಾರನನ್ನು ಆಯ್ಕೆ ಮಾಡಿಕೊಳ್ಳುವಾದರೆ, ನಾನು ಬುಮ್ರಾರನ್ನು ಆಯ್ಕೆ ಮಾಡುತ್ತೇನೆ. ನಾವು ಹೊಂದಿರುವ ಆಟಗಾರರಲ್ಲಿ ಬುಮ್ರಾ ಓರ್ವ ಉತ್ತಮ ಆಟಗಾರ. ಫೆಬ್ರವರಿ 2ರಂದು ನ್ಯೂಜಿಲೆಂಡ್ ವಿರುದ್ಧ ನಡೆಯುವ ಪಂದ್ಯದಲ್ಲಿ ಬುಮ್ರಾ, ಕಿವೀಸ್ ಆಟಗಾರರನ್ನು ಬಗ್ಗುಬಡಿಯುವುದು ನಮ್ಮೆಲ್ಲರ ಹೆಮ್ಮೆಯ ಕ್ಷಣವಾಗಿರಲಿದೆ ಎಂದು ದಿಶಾ ಹೇಳಿದ್ದಾರೆ.
ಸಿಕ್ಕಾಪಟ್ಟೆ ಹೊಗಳುವುದನ್ನು ನೋಡಿ ಇದೇನಪ್ಪಾ ದಿಶಾ ಏನಾದರೂ ಬುಮ್ರಾ ಪ್ರೀತಿಯ ಬಲೆಗೆ ಬಿದ್ದರಾ ಎಂದು ಭಾವಿಸಬೇಡಿ. ಅಂದಹಾಗೆ ತಮ್ಮ ಮುಂದಿನ “ಮಲಾಂಗ್” ಚಿತ್ರದ ಪ್ರಚಾರ ಕಾರ್ಯಕ್ರಮದಲ್ಲಿ ಕ್ರಿಕೆಟ್ ಬಗೆಗಿನ ತಮ್ಮ ಆಸಕ್ತಿಯನ್ನು ದಿಶಾ ಹೊರಹಾಕಿದ್ದಾರಷ್ಟೇ.
ಮಲಾಂಗ್ ಚಿತ್ರದಲ್ಲಿ ನಟಿಸಿರುವ ಹಿರಿಯ ನಟ ಅನಿಲ್ ಕಪೂರ್ ಕೂಡ ಇದೇ ಕಾರ್ಯಕ್ರಮದಲ್ಲಿ ಮಾತನಾಡಿ ವಿರಾಟ್ ಕೊಹ್ಲಿ ಅವರನ್ನು ಮನಸಾರೆ ಕೊಂಡಾಡಿದ್ದಾರೆ. ವಿರಾಟ್ ಕೊಹ್ಲಿ ನಮ್ಮೆಲ್ಲರ ಬಾಸ್. ಯಾರೇ ಎದುರಾಳಿಯಾಗಿರಲಿ ಕ್ರಿಕೆಟ್ ಕಡೆಗಿನ ಅವರ ತುಡಿತ ಎಲ್ಲರನ್ನು ಮನಸೂರೆಗೊಳಿಸುತ್ತದೆ ಎಂದಿದ್ದಾರೆ.
ಇನ್ನೊಬ್ಬ ನಟ ಕುನಾಲ್ ಕೆಮು ರೋಹಿತ್ ಶರ್ಮರ ಬ್ಯಾಟಿಂಗ್ ಸ್ಕಿಲ್ ಬಗ್ಗೆ ಮೆಚ್ಚುಗೆ ಸೂಚಿಸಿ, ಟೀಮ್ ಇಂಡಿಯಾದ ಹಿಟ್ ಮ್ಯಾನ್ ಎಂದು ಪ್ರಶಂಸಿಸಿದ್ದಾರೆ. ಕೊನೆಯಲ್ಲಿ ನಟ ಆದಿತ್ಯ ರಾಯ್, ಕೆ.ಎಲ್.ರಾಹುಲ್ ಅವರ ಆಲ್ರೌಂಡರ್ ಆಟಕ್ಕೆ ಫಿದಾ ಆಗಿರುವುದಾಗಿ ಹೇಳಿದ್ದಾರೆ. (ಏಜೆನ್ಸೀಸ್)