ಮುಂಬೈ: ಬಿಜೆಪಿ ನಾಯಕ ಹಾಗೂ ಮಹಾರಾಷ್ಟ್ರದ ಮಾಜಿ ಸಿಎಂ ದೇವೇಂದ್ರ ಫಡ್ನವಿಸ್ ಅವರಿಗೆ ಡಾನ್ ದಾವೂದ್ ಇಬ್ರಾಹಿಂನೊಂದಿಗೆ ನಂಟಿತ್ತು. ದಾವೂದ್ ಭಂಟನಾದ ರಿಯಾಜ್ ಭಾಟಿಯೊಂದಿಗೆ ಹಣ ವಸೂಲಿ ದಂಧೆ ನಡೆಸುತ್ತಿದ್ದರು ಎಂದು ಎನ್ಸಿಪಿ ನಾಯಕ ಹಾಗೂ ರಾಜ್ಯದ ಹಾಲಿ ಸಚಿವ ನವಾಬ್ ಮಲಿಕ್ ಆರೋಪಿಸಿದ್ದಾರೆ.
ಇಂದು ಬೆಳಿಗ್ಗೆ ಮುಂಬೈನಲ್ಲಿ ಪತ್ರಿಕಾ ಗೋಷ್ಠಿ ನಡೆಸಿದ ಮಲಿಕ್, ಫಡ್ನವಿಸ್ರ ಸತ್ಯವನ್ನು ಬಹಿರಂಗಪಡಿಸುವ ತಮ್ಮ ‘ಹೈಡ್ರೋಜನ್ ಬಾಂಬ್’ ಸಿಡಿಸಿದ್ದು ಹೀಗೆ. ಫಡ್ನವಿಸ್ ಮುಖ್ಯಮಂತ್ರಿಯಾಗಿದ್ದ ವೇಳೆ ಅನುಮಾನಾಸ್ಪದ ಪಾಕಿಸ್ತಾನಿ ನಂಟುಗಳುಳ್ಳ ಜನರಿಗೆ ಸರ್ಕಾರದಲ್ಲಿ ಪ್ರಮುಖ ಹುದ್ದೆಗಳನ್ನು ನೀಡಿದ್ದರು ಎಂದು ಆರೋಪಿಸಿದರು.
ಇದನ್ನೂ ಓದಿ: ಜೈಲಿಂದ ಹೊರ ಬಂದ ಶ್ರೀಕಿ: ಬಿಟ್ ಕಾಯಿನ್ ಪ್ರಕರಣವೇ ಬೋಗಸ್, ಪೊಲೀಸರು ಹೇಳುತ್ತಿರುವುದು ಸುಳ್ಳು…
ಮಹಾರಾಷ್ಟ್ರದಲ್ಲಿ ನಕಲಿ ನೋಟುಗಳ ದಂಧೆಗಳು ಆರಂಭವಾಗಲು ಕಾರಣ ಫಡ್ನವಿಸ್; ನೋಟು ಅಮಾನ್ಯೀಕರಣದ ನಂತರ ಒಂದು ವರ್ಷದ ಕಾಲ ರಾಜ್ಯದಲ್ಲಿ ಯಾವುದೇ ಕೇಸುಗಳನ್ನು ದಾಖಲಿಸದೆ ಅನುಕೂಲ ಮಾಡಿಕೊಟ್ಟಿದ್ದರು. ಹಲವು ಕ್ರಿಮಿನಲ್ಗಳನ್ನು ಉಳಿಸಲು ಆಗ ಡಿಆರ್ಐ ಅಧಿಕಾರಿಯಾಗಿದ್ದ ಈಗಿನ ಎನ್ಸಿಬಿ ಅಧಿಕಾರಿ ಸಮೀರ್ ವಾಂಖೆಡೆ ಸಹಾಯ ಪಡೆದಿದ್ದರು ಎಂದು ಮಲಿಕ್ ಆರೋಪಿಸಿದರು.
ಸಚಿವ ಮಲಿಕ್ರ ಈ ಆರೋಪಗಳು ನಿನ್ನೆಯ ಫಡ್ನವಿಸ್ ಅವರ ಆರೋಪಗಳಿಗೆ ಉತ್ತರವಾಗಿ ಬಂದಿವೆ. ಮಲಿಕ್ಗೆ 1993ರ ಮುಂಬೈ ಬಾಂಬ್ ಸ್ಫೋಟ ಪ್ರಕರಣದ ಅಪರಾಧಿಗಳೊಂದಿಗೆ ಬಿಸಿನೆಸ್ ವ್ಯವಹಾರಗಳಿವೆ ಎಂದು ಫಡ್ನವಿಸ್ ಆರೋಪಿಸಿದ್ದರು. ಇಂದಿನ ಮಲಿಕ್ ಹೇಳಿಕೆಗಳಿಗೆ ಪ್ರತಿಕ್ರಿಯಿಸಿರುವ ಫಡ್ನವಿಸ್, ಇದು ಬಾಂಬ್ ಇರಲಿ, ಒಂದು ಸುರುಸುರುಬತ್ತಿಯೂ ಅಲ್ಲ ಎಂದು ವ್ಯಂಗ್ಯ ಮಾಡಿದ್ದಾರೆ ಎನ್ನಲಾಗಿದೆ. (ಏಜೆನ್ಸೀಸ್)
ಪೊಲೀಸ್ ಠಾಣೆಯಲ್ಲಿ ಸಾವಪ್ಪಿದ ಯುವಕ; ‘ನಿರ್ಲಕ್ಷ್ಯ’ಕ್ಕಾಗಿ ಐವರು ಸಸ್ಪೆಂಡ್
ಒಂಟಿ ಮನೆಯಲ್ಲಿ ಗುಂಡಿ ತೋಡಿ ಪೂಜೆ; ವಾಮಾಚಾರ ನಡೆಸುತ್ತಿದ್ದ 12 ಜನರ ಬಂಧನ