ಕರೊನಾ ವೈರಸ್ ಕುರಿತಂತೆ ಇಲ್ಲ ಸಲ್ಲದ ವದಂತಿಗಳು ಹಬ್ಬುತ್ತಿವೆ. ಇದರ ಬಗ್ಗೆ ಸಾರ್ವಜನಿಕರಲ್ಲಿ ಹಲವಾರು ಸಂಶಯಗಳು, ಪ್ರಶ್ನೆಗಳಿವೆ. ಈ ಮಹಾಮಾರಿ ಕುರಿತಂತೆ ಸಾರ್ವಜನಿಕರಲ್ಲಿ ಮೂಡಬಹುದಾದ ಕೆಲವೊಂದು ಪ್ರಶ್ನೆಗಳಿಗೆ ಇಲ್ಲಿ ಉತ್ತರಿಸಲಾಗಿದೆ.
# ಕರೊನಾ ವೈರಸ್ ಹರಡದಂತೆ ನಾನೇನು ಮಾಡಬಹುದು?
ಶುಭಾಶಯ ಕೋರುವಾಗ ಶೇಕ್ಹ್ಯಾಂಡ್ ಮಾಡುವುದು, ಅಪ್ಪಿಕೊಳ್ಳುವುದು ಇತ್ಯಾದಿ ದೈಹಿಕ ಸಂಪರ್ಕ ಬೇಡ. ನಮಸ್ತೆ ಎನ್ನುವ ಮೂಲಕ, ಸ್ಮೈಲ್ ಮಾಡುವ ಮೂಲಕ ಇಲ್ಲವೇ ತಲೆ ಬಾಗಿಸುವ ಮೂಲಕ ಪರಸ್ಪರ ಶುಭಾಶಯ ಕೋರಬಹುದು.
# ಶೇಕ್ ಹ್ಯಾಂಡ್ ಮಾಡಿದರೆ ವೈರಸ್ ಹೇಗೆ ಹರಡುತ್ತದೆ?
ಶೇಕ್ ಹ್ಯಾಂಡ್ ಮಾಡಿದಾಗ ನಿಮ್ಮ ದೇಹದಲ್ಲಿರುವ ವೈರಸ್ ಇನ್ನೊಬ್ಬರ ಕೈಗೆ ಅಂಟಿಕೊಳ್ಳುತ್ತದೆ. ಆಗ ಅವರು ಕೈ, ಕಣ್ಣು ಇಲ್ಲವೇ ಬಾಯಿಯನ್ನು ಮುಟ್ಟಿಕೊಂಡಾಗ ಇದು ಅದರ ಮೂಲಕ ಅವರ ದೇಹದೊಖಳಕ್ಕೆ ಪ್ರವೇಶಿಸುತ್ತದೆ.
# ಸಾರ್ವಜನಿಕ ಸ್ಥಳಗಳಿಗೆ ಹೋಗುವಾಗ ರಬ್ಬರ್ ಗ್ಲೌಸ್ ಹಾಕಿಕೊಂಡರೆ ಇನ್ಫೆಕ್ಷನ್ ಆಗುವುದನ್ನು ತಡೆಗಟ್ಟಬಹುದೆ?
ಇಲ್ಲ. ಬರಿಯಕೈಯನ್ನು ಆಗಾಗ್ಗೆ ತೊಳೆಯುವುದರಿಂದ ಮಾತ್ರ ವೈರಸ್ ಸೋಂಕು ತಗುಲದಂತೆ ತಡೆಗಟ್ಟಹುದು. ರಬ್ಬರ್ ಗ್ಲೌಸ್ ಹಾಕಿಕೊಂಡರೆ ಅದರಿಂದಲೇ ನೀವು ನಿಮ್ಮ ಕಣ್ಣು, ಮೂಗು, ಬಾಯಿಯನ್ನು ಮುಟ್ಟಿಕೊಳ್ಳುವ ಸಾದ್ಯತೆ ಇರುವ ಕಾರಣ, ಅದರಿಂದ ಯಾವುದೇ ಪ್ರಯೋಜನವಿಲ್ಲ.
# ನಾನೇಕೆ ಸೋಪಿನಿಂದ ಕೈತೊಳೆಯಬೇಕು?
ಕೈಯಿಂದಲೇ ಹೆಚ್ಚಾಗಿ ಕರೊನಾ ವೈರಸ್ ಹರಡುವ ಸಾಧ್ಯತೆ ಇರುವ ಕಾರಣ, ಆಲ್ಕೋಬಾಲ್ ಅಂಶವಿರುವ ಸೋಪಿನಿಂದ ಕೈಯನ್ನು ತೊಳೆದರೆ ಅದರಲ್ಲಿರುವ ವೈರಸ್ ನಾಶವಾಗುವ ಸಾಧ್ಯತೆ ಇದೆ.
#ಕೆಮ್ಮುವ ಅಥವಾ ಸೀನುವ ವ್ಯಕ್ತಿಯಿಂದ ನಾನೆಷ್ಟು ದೂರದಲ್ಲಿ ಇರಬೇಕು? ಏಕೆ?
ಒಂದು ಮೀಟರ್ ಅಂದರೆ ಮೂರು ಅಡಿ ದೂರದಲ್ಲಿ ಇರಬೇಕು. ಏಕೆಂದರೆ, ಸೀನುವಾಗ ಅಥವಾ ಕೆಮ್ಮುವಾಗ ಅವರ ಬಾಯಿಯಿಂದ ಇಲ್ಲವೇ ಮೂಗಿನಿಂದ ಬಿಂದು ರೂಪದಲ್ಲಿ ದ್ರವವು ಹೊರಕ್ಕೆ ಬರುತ್ತದೆ. ಅದರಲ್ಲಿ ವೈರಸ್ ಇರುವ ಸಾಧ್ಯತೆ ಇದೆ. ಒಂದು ವೇಳೆ ನೀವು ಸಮೀಪದಲ್ಲಿ ಇದ್ದರೆ, ಆ ದ್ರವವನ್ನು ನೀವು ಉಸಿರಾಡುವ ಸಾಧ್ಯತೆ ಇದೆ. ಇದರಿಂದ ಅದು ನಿಮ್ಮ ದೇಹದೊಳಕ್ಕೂ ಪ್ರವೇಶ ಮಾಡಬಲ್ಲುದು.