ಲಂಡನ್: ವಿಶ್ವಾದ್ಯಂತ ಕರೊನಾ ಕಬಂಧ ಬಾಹು ಬಿಗಿಯಾಗುತ್ತಿದೆ. ಸಾವಿನ ಸಂಖ್ಯೆ ದಿನೇದಿನೆ ಹೆಚ್ಚಾಗುತ್ತಿದ್ದು, ಜಗತ್ತಿನಲ್ಲಿ ಮೃತರ ಸಂಖ್ಯೆ ಒಂದು ಲಕ್ಷವನ್ನು ಮೀರಿದೆ.
ಇದರ ನಡುವೆಯೇ ಹಲವು ಆಶಾದಾಯಕ ಬೆಳವಣಿಗೆಗಳು ನಡೆಯುತ್ತಿವೆ. ಅಮೆರಿಕದಲ್ಲಿ ಕರೊನಾ ಲಸಿಕೆಯ ಕ್ಲಿನಿಕಲ್ ಟ್ರಯಲ್ ಆರಂಭವಾಗಿದೆ ಎಂದು ಕೆಲ ದಿನಗಳ ಹಿಂದಷ್ಟೇ ಸುದ್ದಿಯಾಗಿತ್ತು. ಇದೀಗ ಅಂಥದ್ದೇ ಸುದ್ದಿ ಬ್ರಿಟನ್ನಿಂದಲೂ ವರದಿಯಾಗಿದೆ.
ಲಸಿಕೆ ತಯಾರಿಕೆಯಲ್ಲಿ ತೊಡಗಿರುವ ಸಂಶೋಧನಾ ತಂಡವನ್ನು ಮುನ್ನಡೆಸುತ್ತಿರುವ ಆಕ್ಸ್ಫರ್ಡ್ ವಿವಿ ಪ್ರಾಧ್ಯಾಪಕಿ ಸಾರಾ ಗಿಲ್ಬರ್ಟ್ ಸೆಪ್ಟೆಂಬರ್ ವೇಳೆಗೆ ಕರೊನಾ ಲಸಿಕೆ ಸಜ್ಜಾಗಲಿದೆ ಎಂದು ತಿಳಿಸಿದ್ದಾರೆ. ಈ ಮೊದಲು 2020ರ ವರ್ಷಾಂತ್ಯಕ್ಕೆ ಲಸಿಕೆ ಸಿದ್ಧವಾಗುವ ವಿಶ್ವಾಸವಿತ್ತು. ಆದರೆ ಲಸಿಕೆ ತಯಾರಿಸುವ ಎಲ್ಲ ಪ್ರಕ್ರಿಯೆಗಳು ವೇಗವಾಗಿ ನಡೆಯುತ್ತಿವೆ. ಹೀಗಾಗಿ ಸೆಪ್ಟಂಬರ್ ಹೊತ್ತಿಗಾಗಲೇ ಅದು ಸಿದ್ಧವಾಗುವ ಭರವಸೆ ನೀಡಿದ್ದಾರೆ.
ಕೆಲ ದಿನಗಳಲ್ಲಿ ಲಸಿಕೆ ಕ್ಲಿನಿಕಲ್ ಟ್ರಯಲ್ ಆರಂಭವಾಗಲಿದೆ. ಬ್ರಿಟನ್ ಸರ್ಕಾರ ಲಸಿಕೆ ತಯಾರಿಕೆಗೆ ಕೋಟ್ಯಂತರ ರೂ. ಬಂಡವಾಳ ಒದಗಿಸುವುದಾಗಿ ಈಗಾಗಲೇ ಹೇಳಿದೆ. ಆದ್ದರಿಂದ ಲಸಿಕೆ ಉತ್ಪಾದನೆ ಅಂದುಕೊಂಡದ್ದಕಿಂತ ಮೊದಲೇ ಆರಂಭವಾಗಲಿದೆ ಎಂದು ಹೇಳಿದ್ದಾರೆ. ಈ ಲಸಿಕೆ ತಯಾರಿಸಲು ಹೊಸದಾಗಿ ಕಾರ್ಖಾನೆ ಅಥವಾ ವ್ಯವಸ್ಥೆ ಸಿದ್ಧಪಡಿಸಿಕೊಳ್ಳಬೇಕಿಲ್ಲ. ಈಗಾಗಲೇ ಲಭ್ಯವಿರುವ ವ್ಯವಸ್ಥೆಗಳನ್ನೇ ಇದಕ್ಕೆ ಬಳಸಿಕೊಳ್ಳಲಾಗುವುದು ಎಂದು ಮಾಹಿತಿ ನೀಡಿದ್ದಾರೆ.
ದಿನ ಕಳೆದಂತೆಲ್ಲ ಹೆಚ್ಚಿನ ಮಾಹಿತಿ ಲಭ್ಯವಾಗುತ್ತಿದೆ. ಈ ಹಿಂದೆ ಇದೇ ಪ್ರಕಾರದ ಲಸಿಕೆ ತಯಾರಿಸಿದ ಅನುಭವದ ಆಧಾರದಲ್ಲಿ ಇದು ಹೆಚ್ಚು ಪರಿಣಾಮಕಾರಿಯಾಗಿರಲಿದೆ. ಲಸಿಕೆಯ ಫಲಿತಾಂಶವನ್ನು ತ್ವರಿತವಾಗಿ ತಿಳಿದುಕೊಳ್ಳಲು ಹೆಚ್ಚು ವ್ಯಾಪಿಸಿರುವ ದೇಶಗಳಲ್ಲಿ ಇದನ್ನು ಮೊದಲು ಪ್ರಯೋಗಿಸಲಾಗುತ್ತದೆ ಎಂದು ಸಂಶೋಧನಾ ತಂಡ ತಿಳಿಸಿದೆ.
ಕರೊನಾ ವೈರಸ್ ಎಂಟು ವಿಧದಲ್ಲಿ ಜಗತ್ತನ್ನು ಆವರಿಸಿದೆ. ಚೀನಾದಲ್ಲಿ ಹಾಗೂ ಯುರೋಪ್ ರಾಷ್ಟ್ರಗಳಲ್ಲಿ ಕಾಣಿಸಿಕೊಂಡ ವೈರಸ್ಗಳಲ್ಲಿ ಹೆಚ್ಚು ವ್ಯತ್ಯಾಸವಿಲ್ಲ ಅಥವಾ ರೂಪಾಂತರಗೊಂಡಿಲ್ಲ. ಈ ಲಸಿಕೆಯು ಮೂಲ ವೈರಸ್ ಹಾಗೂ ರೂಪಾಂತರಗೊಂಡ ವೈರಸ್ ಎರಡಕ್ಕೂ ಚಿಕಿತ್ಸೆ ನೀಡಲಿದೆ ಎಂದು ಸಾರಾ ಹೇಳಿದ್ದಾರೆ. ಅಧ್ಯಯನದಲ್ಲಿ ಕಂಡುಬಂದ ಇನ್ನೊಂದು ಸಂಗತಿ ಎಂದರೆ, ಕರೊನಾ ಉಳಿದ ವೈರಸ್ಗೆ ಹೋಲಿಸಿದಲ್ಲಿ ಹೆಚ್ಚು ಮಾರಕವಲ್ಲ. ಇನ್ನುಳಿದ ವೈರಸ್ಗಳಷ್ಟು ಸಾಂಕ್ರಾಮಿಕವಲ್ಲ ಎನ್ನುತ್ತಾರೆ ಸಂಶೋಧಕರು.
ವಿಶ್ವಾದ್ಯಂತ ಹಲವು ಸಂಸ್ಥೆಗಳು ಕರೊನಾ ನಿವಾರಣೆಗೆ ಲಸಿಕೆ ತಯಾರಿಕೆಯಲ್ಲಿ ತೊಡಗಿವೆ. ಹಲವು ಭಾರತೀಯರು ಕೂಡ ಈ ಸಂಶೋಧನಾ ತಂಡಗಳ ಭಾಗವಾಗಿದ್ದಾರೆ. (ಏಜೆನ್ಸೀಸ್)
ಸಹಕಾರ ಸಚಿವರೇ, ಜನಪ್ರತಿನಿಧಿಗಳೇ… ಸೋಷಿಯಲ್ ಡಿಸ್ಟೆನ್ಸಿಂಗ್ ಪಾಲನೆ ಬಗ್ಗೆ ಇಷ್ಟೇಕೆ ನಿರ್ಲಕ್ಷ್ಯ ಹೇಳಿ…