ಕಡೂರು: ಕರೊನಾ ತಡೆಗೆ ಮಾಸ್ಕ್ ಧರಿಸಿದವರು ಎಲ್ಲೆಂದೆರಲ್ಲಿ ಎಸೆಯುತ್ತಿದ್ದು, ಇದು ಮತ್ತೊಂದು ಸಮಸ್ಯೆ ಹುಟ್ಟುಹಾಕುವ ಸಾಧ್ಯತೆ ಇದೆ. ಹೀಗಾಗಿ ಜನ ಬಳಸಿದ ಮಾಸ್ಕ್ಗಳನ್ನು ಡಸ್ಟ್ಬಿನ್ಗೆ ಹಾಕಿ ಅದನ್ನು ಕಾಗದದಲ್ಲಿ ಸುತ್ತಿ ಕಸ ಸಂಗ್ರಹಿಸುವವರು ಗುರುತಿಸುವಂತೆ ಮಾರ್ಕ್ ಮಾಡಿ ಕಸದ ವಾಹನಗಳಿಗೆ ನೀಡಬೇಕಿದೆ.
ಕಡೂರು-ಬೀರೂರು ರಾಷ್ಟ್ರೀಯ ಹೆದ್ದಾರಿ ಬದಿ ಎಲ್ಲೆಂದರಲ್ಲಿ ಮಾಸ್ಕ್ಗಳು ಬಿದ್ದಿವೆ. ಬ್ಯಾಂಕ್ ಕಚೇರಿ ಬಳಿ, ತಾಲೂಕು ಕಚೇರಿ ಆವರಣದಲ್ಲೂ ಅಲ್ಲಲ್ಲಿ ಮಾಸ್ಕ್ಗಳು ಬಿದ್ದಿವೆ.
ಕರೊನಾ ಸೇನಾನಿಗಳು ಹೊರತುಪಡಿಸಿದರೆ ಬಹುತೇಕ ಜನರು ಬಳಸಿ ಎಸೆಯುವ (ಯ್ಯೂಸ್ ಆಂಡ್ ಥ್ರೋ) ಮಾಸ್ಕ್ಗಳನ್ನು ಬಳಸುತ್ತಿದ್ದಾರೆ. ಹೀಗಾಗಿ ಧರಿಸಿದ ಮಾಸ್ಕ್ ಅನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡುತ್ತಿಲ್ಲ. ಡಸ್ಟ್ಬಿನ್ ಅಥವಾ ಪ್ರತ್ಯೇಕ ಪ್ರದೇಶದಲ್ಲಿ ಹಾಕದೆ ಅಪಾಯಕಾರಿ ರೀತಿಯಲ್ಲಿ ಎಸೆಯಲಾಗುತ್ತಿದೆ. ಇಂತಹ ಮಾಸ್ಕ್ಗಳಿಂದ ಬ್ಯಾಕ್ಟೀರಿಯಾ ಗಾಳಿ ಸಂಪರ್ಕಕ್ಕೆ ಬಂದು ಮಾನವನ ದೇಹ ಸೇರಿದರೆ ಇತರೆ ಕಾಯಿಲೆಗೆ ದಾರಿಮಾಡಿಕೊಟ್ಟಂತಾಗುತ್ತದೆ. ಅದನ್ನು ತಡೆಯಲು ಜನ ಜಾಗರೂಕರಾಗಿ ಮಾಸ್ಕ್ಗಳನ್ನು ಡಸ್ಟ್ಬಿನ್ಗೆ ಹಾಕಿ ವಿಲೇವಾರಿ ಮಾಡಬೇಕಿದೆ.
ಮಾಸ್ಕ್ ಮರು ಬಳಕೆ, ವಿಲೇ ಹೇಗೆ?: ಬಳಸಿದ ಮಾಸ್ಕ್ಗಳನ್ನು ಕಡ್ಡಾಯವಾಗಿ ಕರೊನಾ ಬಯೋಮೆಡಿಕಲ್ ವೇಸ್ಟ್ ಮ್ಯಾನೇಜ್ವೆುಂಟ್ ಮೂಲಕ ವಿಲೇವಾರಿ ಮಾಡಬೇಕು. ಸೋಡಿಯಂ ಹೈಪೋಕ್ಲೋರೈಡ್ ರಾಸಾಯನಿಕ ದ್ರಾವಣ ಬಳಸಿ ಮಾಸ್ಕ್ನ ವೈರಸ್ಗಳನ್ನು ನಿಷ್ಕ್ರಿಯಗೊಳಿಸಲಾಗುತ್ತದೆ. ನಂತರ ಇನ್ಸಿರೇಟರ್ ಯಂತ್ರದ ಮೂಲಕ ದಹಿಸಲಾಗುತ್ತದೆ. ವೈರಸ್ ಹರಡದಂತೆ ತಡೆಯಲು ಮುಂಜಾಗ್ರತಾ ಕ್ರಮವಾಗಿ ಬಳಸುವ ಮರುಬಳಕೆಯ ಮಾಸ್ಕ್ಗಳನ್ನು ಡೆಟಾಲ್ ಮತ್ತು ಸೋಪಿನ ನೀರಿನಲ್ಲಿ ಶುಚಿಗೊಳಿಸಿ ಬಿಸಿಲಿನಲ್ಲಿ ಕನಿಷ್ಠ 3 ಗಂಟೆ ಒಣಗಿಸಿ ಧರಿಸುವುದು ಉತ್ತಮ ಎಂಬುದು ವೈದ್ಯರ ಸಲಹೆ.