ಮಂಚು ಮನೋಜ್ ನಟನೆಯ 'ಡೇವಿಡ್ ರೆಡ್ಡಿ' ಚಿತ್ರದ ಮೂಲಕ ನಿರ್ದೇಶಕರಾಗಿ ಪದಾರ್ಪಣೆ ಮಾಡುತ್ತಿರುವ ಹನುಮ ರೆಡ್ಡಿ ಯಕ್ಕಂಟಿ ಅವರ ಜತೆ ಯಶ್ ಮುಂದಿನ ಪ್ರಾಜೆಕ್ಟ್ ಮಾಡಲಿದ್ದಾರೆ ಎಂಬ ಪ್ರಚಾರ ವ್ಯಾಪಕವಾಗಿ ಹಬ್ಬಿದೆ. ವಿಶೇಷವೆಂದರೆ, ಹನುಮ ರೆಡ್ಡಿ ನಿರ್ದೇಶನದ ಮೊದಲ ಚಿತ್ರವೇ ಇದುವರೆಗೆ ಬಿಡುಗಡೆಯಾಗಿಲ್ಲ. ಈ ಹಿನ್ನೆಲೆಯಲ್ಲಿ ಈ ಹೊಸ ಕಾಂಬಿನೇಷನ್ ಕುರಿತ ಸುದ್ದಿ ಸಿನಿರಂಗದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ಮಾಧ್ಯಮಗಳಲ್ಲಿ ಹರಿದಾಡುತ್ತಿರುವ ಈ ವಂದಂತಿಗಳಿಗೆ ಈಗ ಯಶ್ ಅವರ ಆಪ್ತ ಮೂಲಗಳು ಸ್ಪಷ್ಟನೆ ನೀಡಿ ತೆರೆ ಎಳೆದಿವೆ. ಯಶ್ ಅವರು ಹನುಮ ರೆಡ್ಡಿ ಅವರ ನಿರ್ದೇಶನದಲ್ಲಿ ಸಿನಿಮಾ ಮಾಡಲಿದ್ದಾರೆ ಎಂಬ ಸುದ್ದಿ ಸಂಪೂರ್ಣವಾಗಿ ಸುಳ್ಳು ಮತ್ತು ಆಧಾರರಹಿತ ಎಂದು ಸ್ಪಷ್ಟಪಡಿಸಿವೆ. ಹೊಸ ನಿರ್ದೇಶಕರ ಜೊತೆ ನಟಿಸುವ ಬಗ್ಗೆ ಯಾವುದೇ ಅಧಿಕೃತ ನಿರ್ಧಾರವಾಗಿಲ್ಲ ಹಾಗೂ ಈ ಸುದ್ದಿಯಲ್ಲಿ ಯಾವುದೇ ಸತ್ಯಾಂಶವಿಲ್ಲ ಎಂದು ತಿಳಿಸುವುದರ ಮೂಲಕ ಎಲ್ಲಾ ರೀತಿಯ ಊಹಾಪೋಹಗಳಿಗೆ ವಿರಾಮ ಹಾಕಿವೆ.
ಮತ್ತೊಂದೆಡೆ, ಯಶ್ ಅವರ ಇತ್ತೀಚಿನ ಬಹುನಿರೀಕ್ಷಿತ 'ಟಾಕ್ಸಿಕ್' ಚಿತ್ರದ ಒಟಿಟಿ ಬಿಡುಗಡೆ ಕುರಿತು ಅನಿಶ್ಚಿತತೆ ಮುಂದುವರೆದಿದೆ. ಸಿನಿಮಾ ಬಿಡುಗಡೆಗೂ ಮುನ್ನ ಭಾರಿ ಮೊತ್ತವನ್ನು ನೀಡಲು ಮುಂದೆ ಬಂದಿದ್ದ ಒಟಿಟಿ ದೈತ್ಯ ಸಂಸ್ಥೆಗಳು, ಚಿತ್ರವು ಬಾಕ್ಸ್ ಆಫೀಸ್ನಲ್ಲಿ ನಿರಾಶಾದಾಯಕ ಪ್ರದರ್ಶನ ಕಂಡ ಕಾರಣದಿಂದ ಈಗ ಹಿಂದೆಟು ಹಾಕುತ್ತಿವೆ. ಮೂಲಗಳ ಪ್ರಕಾರ, ಒಟಿಟಿ ಸಂಸ್ಥೆಗಳು ಈಗ ಕೇವಲ 30 ಕೋಟಿ ರೂ.ಗಳ ಆಫರ್ ನೀಡಲು ಮಾತ್ರ ಆಲೋಚಿಸುತ್ತಿವೆ ಎನ್ನಲಾಗಿದೆ. ಕೆವಿಎನ್ ಪ್ರೊಡಕ್ಷನ್ ಜತೆಗೆ ಯಶ್ ಸ್ವತಃ ನಿರ್ಮಾಣದಲ್ಲಿ ಪಾಲುದಾರರಾಗಿರುವ ಈ ಸಿನಿಮಾಗೆ ಒಟಿಟಿ ಹಕ್ಕುಗಳ ಮೂಲಕ ಬರುವ ಹಣದಲ್ಲೂ ಹಿನ್ನಡೆಯಾಗಿರುವುದು ಚಿತ್ರತಂಡಕ್ಕೆ ಮುಜುಗರದ ಪರಿಸ್ಥಿತಿಯನ್ನು ತಂದಿಟ್ಟಿದೆ.
