ಶೆನ್ಜೆನ್: ಮಹಾಮಾರಿ ಕರೊನಾ ವೈರಸ್ ಭೀತಿ ಹಿನ್ನೆಲೆಯಲ್ಲಿ ಚೀನಾದ ಶೆನ್ಜೆನ್ ನಗರ ಮಹತ್ವದ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ. ಇನ್ನು ಮುಂದೆ ಬೆಕ್ಕು ಮತ್ತು ನಾಯಿ ಮಾಂಸ ತಿನ್ನುವುದನ್ನು ಬ್ಯಾನ್ ಮಾಡಿದೆ.
ಕರೊನಾ ವೈರಸ್ ಪ್ರಾಣಿಗಳಿಂದ ಮಾನವನಿಗೆ ಹರಡಿದೆ ಎಂದು ವಿಜ್ಞಾನಿಗಳು ಶಂಕಿಸಿದ್ದಾರೆ. ಹುಬೇ ಪ್ರಾಂತ್ಯದ ಕೇಂದ್ರ ವುಹಾನ್ನಲ್ಲಿನ ಜೀವಂತ ಪ್ರಾಣಿ ಮಾರುಕಟ್ಟೆಯಿಂದ ವೈರಸ್ ಸ್ಪೋಟಗೊಂಡಿದೆ ಎಂಬ ಅನೇಕ ವಾದಗಳು ಈಗಾಗಲೇ ಮಂಡನೆಯಾಗಿವೆ. ವುಹಾನ್ ಮಾರುಕಟ್ಟೆಯಲ್ಲಿ ಬಾವಲಿ, ಹಾವು, ಸಿವೆಟ್ ಹಾಗೂ ಪ್ಯಾಂಗೋಲಿನ್ ಸೇರಿದಂತೆ ಅನೇಕ ಪ್ರಾಣಿಗಳನ್ನು ಮಾರಾಟ ಮಾಡಲಾಗುತ್ತದೆ. ಬಾವಲಿಯಿಂದ ಮಾನವನಿಗೆ ವೈರಸ್ ಹರಡಲು ಪ್ಯಾಂಗೋಲಿನ್ ಮಧ್ಯವರ್ತಿಯಾಗಿ ಕೆಲಸ ಮಾಡಿದೆ ಎಂದು ಹಿಂದೊಮ್ಮೆ ಸಂಶೋಧನಾ ವರದಿಯೊಂದು ತಿಳಿಸಿತ್ತು.
ಕರೊನಾ ವೈರಸ್ ಸೋಂಕು ವಿಶ್ವದಾದ್ಯಂತ 9 ಲಕ್ಷಕ್ಕೂ ಹೆಚ್ಚು ಮಂದಿಗೆ ತಗುಲಿದ್ದು, ಈಗಾಗಲೇ 47 ಸಾವಿರ ಮಂದಿ ಸಾವಿಗೀಡಾಗಿದ್ದಾರೆ. ಅಮೆರಿಕ, ಇಟಲಿ ಹಾಗೂ ಸ್ಪೇನ್ನಲ್ಲಿ ಮರಣ ಮೃದಂಗ ಮುಂದುವರಿದಿದೆ. ವೈರಸ್ ಹುಟ್ಟಿದ ಚೀನಾವನ್ನೇ ಸಾವಿನ ಸಂಖ್ಯೆಯಲ್ಲಿ ಹಿಂದಿಕ್ಕಿವೆ.
ವೈರಸ್ ಹಡುವಿಕೆಗೆ ಮೂಲ ಕಾರಣ ಪ್ರಾಣಿಗಳೇ ಎಂಬ ಬಲವಾದ ವಾದ ಮಂಡನೆ ಆಗುತ್ತಿರುವ ನಡುವೆಯೇ ದಕ್ಷಿಣ ಚೀನಾ ಟೆಕ್ನಾಲಜಿ ಹಬ್ ಅಧಿಕಾರಿಗಳು ಮೇ 1ರಿಂದ ಜಾರಿಗೆ ಬರುವಂತೆ ಬೆಕ್ಕು ಮತ್ತು ನಾಯಿ ಮಾಂಸವನ್ನು ತಿನ್ನುವುದನ್ನು ಬ್ಯಾನ್ ಮಾಡಿದೆ.
ಇತರೆ ಪ್ರಾಣಿಗಳಿಗೆ ಹೋಲಿಸಿದರೆ ನಾಯಿ ಮತ್ತು ಬೆಕ್ಕು ಮಾನವನಿಗೆ ತುಂಬಾ ಹತ್ತಿರವಾದಂತಹ ಜೀವಿಗಳಾಗಿವೆ. ಹಾಂಕ್ಕಾಂಗ್ ಮತ್ತು ತೈವಾನ್ನಲ್ಲೂ ಕೂಡ ಇದೇ ಅಭ್ಯಾಸವನ್ನು ಅನುಸರಿಸಲಾಗುತ್ತಿದೆ. ಈ ಒಂದು ನಿರ್ಧಾರವು ಮಾನವ ನಾಗರಿಕತೆಯ ಬೇಡಿಕೆಗೂ ಸ್ಪಂದಿಸುವಂತಿದೆ. ಏಷ್ಯಾದ ಅನೇಕ ಭಾಗಗಳಲ್ಲಿ ನಾಯಿ ಮಾಂಸವನ್ನು ಸೇವಿಸಲಾಗುತ್ತಿತ್ತು. ಇದೀಗ ಶೆನ್ಜೆನ್ ನಗರದಲ್ಲಿ ನಾಯಿ ಮತ್ತು ಬೆಕ್ಕಿನ ಮಾಂಸವನ್ನು ನಿಷೇಧಿಸಲಾಗಿದ್ದು, ಉಳಿದಂತೆ ಪೌಲ್ಟ್ರಿ, ಜಾನುವಾರು ಮತ್ತು ಸಮುದ್ರ ಜೀವಿ ಆಹಾರ ಎಂದಿನಂತೆ ದೊರೆಯಲಿದೆ ಎಂದು ಶೆನ್ಜೆನ್ ನಗರದ ಅಧಿಕಾರಿಗಳು ತಿಳಿಸಿದ್ದಾರೆ. (ಏಜೆನ್ಸೀಸ್)
ನಿಮಗಾಗಿ ನನ್ನ ತಂದೆ ನಮ್ಮಿಂದ ದೂರವಿದ್ದಾರೆ, ನೀವೂ ಸಹಾಯ ಮಾಡುವಿರಾ?: ಬಾಲಕಿಯ ಸಂದೇಶಕ್ಕೆ ಮನಸೋತ ಕೇಂದ್ರ ಸಚಿವ!