ವುಹಾನ್: ಚೀನಾದಲ್ಲಿ ಪತ್ತೆಯಾಗಿರುವ ಅಪಾಯಕಾರಿ “ಕೊರೊನಾ ವೈರಸ್” ಮರಣ ಮೃದಂಗವನ್ನು ಮುಂದುವರಿಸಿದ್ದು, ಈವರೆಗೆ ಒಟ್ಟು 56 ಮಂದಿಯನ್ನು ಬಲಿಪಡೆದುಕೊಂಡಿದೆ. ಚೀನಾದ್ಯಂತ 2000 ಜನರು ವೈರಸ್ ಸೋಂಕಿಗೆ ತುತ್ತಾಗಿರುವುದಾಗಿ ಅಧಿಕಾರಿಗಳು ಭಾನುವಾರ ಮಾಹಿತಿ ನೀಡಿದ್ದಾರೆ.
ಹೊಸದಾಗಿ ಪತ್ತೆಯಾದ 688 ಕೊರೊನಾ ವೈರಸ್ ಪ್ರಕರಣಗಳಲ್ಲಿ 15ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿರುವುದಾಗಿ ರಾಷ್ಟ್ರೀಯ ಆರೋಗ್ಯ ಆಯೋಗದಿಂದ ಧೃಡವಾಗಿದೆ. ಹೊಸದಾಗಿ ಸಾವಿಗೀಡಾದವರಲ್ಲಿ ಹುಬೇನಲ್ಲಿ 13 ಹಾಗೂ ಶಾಂಘೈನಲ್ಲಿ ಮೊದಲ ಸಾವು ಎಂದು ವರದಿಯಾಗಿದೆ.
ಒಟ್ಟು 56 ಸಾವಿನ ಪ್ರಕರಣಗಳಲ್ಲಿ ಹುಬೇನಲ್ಲಿ 52 ಮಂದಿ ಅಸುನೀಗಿದ್ದರೆ, ಕೇಂದ್ರ ಹೆನಾನ್ ಪ್ರಾಂತ್ಯದಲ್ಲಿ ಇಬ್ಬರು, ಈಶಾನ್ಯ ಹೀಲಾಂಗ್ ಜಿಯಾಂಗ್ನಲ್ಲಿ ಒಬ್ಬರು ಮತ್ತು ದಕ್ಷಿಣ ಹೆಬೇನಲ್ಲಿ ಒಂದು ಪ್ರಕರಣ ದಾಖಲಾಗಿದೆ.
ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಶನಿವಾರ ಎಚ್ಚರಿಕೆಯನ್ನು ನೀಡಿದ್ದು, ಚೀನಾವು ಗಂಭೀರವಾದ ಪರಿಸ್ಥಿತಿಯನ್ನು ಎದುರಿಸುತ್ತಿದೆ. ಉಸಿರಾಟದ ತೊಂದರೆಯನ್ನುಂಟು ಮಾಡುವ ಮಾರಕ ಕಾಯಿಲೆಯು ದೇಶಾದ್ಯಂತ ಹರಡಿದ್ದು, ಹುಬೇನಲ್ಲಿ ಆರೋಗ್ಯ ಸೌಲಭ್ಯಗಳನ್ನು ಸ್ಥಾಪಿಸಿ, ನಿರಂತರ ಶ್ರಮಿಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)