ಪಡುತೋನ್ಸೆಯಲ್ಲಿ ಪಂಜರ ಮೀನು ಕೃಷಿ ಯಶಸ್ವಿ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಉಡುಪಿ ಸಮೀಪದ ಪಡುತೋನ್ಸೆ ಗ್ರಾಮದ ಸ್ವರ್ಣಾ ನದಿ ಅಳಿವೆಯಲ್ಲಿ ರಾಜ್ಯದಲ್ಲೇ ಮೊದಲ ಬಾರಿಗೆ ನಡೆಸಿದ ‘ಇಂಡಿಯನ್ ಪೊಂಪಾನೊ’ ಪಂಜರ ಮೀನು ಕೃಷಿ ಪ್ರಯೋಗ ಯಶಸ್ವಿಯಾಗಿದೆ. ಪರಿಶಿಷ್ಟ ಜಾತಿಯ ಐದು ಕುಟುಂಬಗಳು 5 ತಿಂಗಳಲ್ಲಿ 2.35 ಲಕ್ಷ ರೂ. ಲಾಭ ಗಳಿಸಿವೆ.

ಕೇಂದ್ರೀಯ ಸಮುದ್ರ ಮೀನುಗಾರಿಕೆ ಸಂಶೋಧನಾ ಸಂಸ್ಥೆಯ ಮಂಗಳೂರು ಪ್ರಾದೇಶಿಕ ಕೇಂದ್ರದ ವಿಜ್ಞಾನಿಗಳು 2009-10ನೇ ಸಾಲಿನಲ್ಲಿ ಪ್ರಾತ್ಯಕ್ಷಿಕೆ ಮೂಲಕ ಕರ್ನಾಟಕದಲ್ಲಿ ಮೊದಲ ಬಾರಿಗೆ ಪಂಜರ ಮೀನು ಕೃಷಿ ಕೈಗೆತ್ತಿಕೊಂಡಿದ್ದರು. ಆಂಧ್ರ ಪ್ರದೇಶದ ವಿಶಾಖಪಟ್ಟಣ ಹಾಗೂ ಕೇರಳದ ಕೆಲವು ಭಾಗಗಳಲ್ಲಿ ನಡೆಸಿದ ಈ ಅಪರೂಪದ ‘ಇಂಡಿಯನ್ ಪೊಂಪಾನೊ’ ಪಂಜರ ಮೀನು ಕೃಷಿ ಯಶಸ್ವಿಯಾಗಿತ್ತು. ಇದೇ ಮಾದರಿಯಲ್ಲಿ ಪರಿಶಿಷ್ಟ ಜಾತಿ ಉಪಯೋಜನೆಯಡಿ ‘ಇಂಡಿಯನ್ ಪೊಂಪಾನೊ’ ಪಂಜರ ಮೀನು ಕೃಷಿಯನ್ನು ಪಡುತೋನ್ಸೆ ಗ್ರಾಮದ ಬೆಂಗ್ರೆಯ ಐದು ಪರಿಶಿಷ್ಟ ಜಾತಿ ಕುಟುಂಬಗಳು ಸ್ವರ್ಣ ನದಿ ಅಳಿವೆಯಲ್ಲಿ ಯಶಸ್ವಿಯಾಗಿ ನಡೆಸುತ್ತಿವೆ.

ಈ ಕುಟುಂಬಗಳಿಗೆ ಮೀನು ಕೃಷಿ ಬಗ್ಗೆ ಪ್ರಾತ್ಯಕ್ಷಿಕೆ ಮೂಲಕ ತರಬೇತಿ ನೀಡಲಾಗಿದೆ. ಮೂರರಿಂದ ನಾಲ್ಕು ಗ್ರಾಂ ತೂಕ ಇರುವ 4 ಸಾವಿರ ಮೀನು ಮರಿಗಳನ್ನು ಕೇಂದ್ರೀಯ ಸಮುದ್ರ ಮೀನುಗಾರಿಕೆ ಸಂಶೋಧನಾ ಸಂಸ್ಥೆಯ ವಿಶಾಖಪಟ್ಟಣ ಪ್ರಾದೇಶಿಕ ಕೇಂದ್ರದಿಂದ 2022ರ ನ.7ರಂದು ತಂದು, ಒಂದು ಚದರ ಮೀಟರ್‌ನಲ್ಲಿ 40ರಿಂದ 50 ಮೀನು ಮರಿಗಳಂತೆ ಎರಡು ಪಂಜರಗಳಲ್ಲಿ ಬಿಡಲಾಗಿತ್ತು. ಆಂಧ್ರ ಪ್ರದೇಶದ ಭೀಮಾವರಂನಿಂದ ಮೀನಿಗೆ ಬೇಕಾದ ಸ್ಕರ್ಟಿಂಗ್-ಸ್ಟೆಲ್ಲಾ ಫೀಡ್ ತೇಲುವ ಪೆಲೆಟ್ ಆಹಾರದ ತುಂಡುಗಳನ್ನು ತಂದಿದ್ದು, ಮೀನಿನ ದೇಹದ ತೂಕದ ಶೇ.5ರಷ್ಟು ಆಹಾರವನ್ನು ಪ್ರತಿದಿನ ಎರಡು ಬಾರಿಯಂತೆ ಮೀನುಗಳಿಗೆ ನೀಡಿ ಸಾಕಲಾಗಿದೆ.

ಇದಕ್ಕೆ ಸುಮಾರು 37,500ರೂ. ಖರ್ಚಾಗಿದ್ದು, ಐದು ತಿಂಗಳಲ್ಲಿ 2,35,000ರೂ. ನಿವ್ವಳ ಲಾಭ ದೊರಕಿದೆ. ಈ ಯಶಸ್ಸಿನಿಂದ ಪ್ರೇರಣೆ ಪಡೆದ ಹಲವು ಕೃಷಿಕರು ಇಂಡಿಯನ್ ಪೊಂಪಾನೊ ಕೃಷಿ ಮಾಡಲು ಮುಂದೆ ಬಂದಿದ್ದಾರೆ. ಪೊಂಪಾನೊ ಮೀನು ಕಡಿಮೆ ಅವಧಿಯಲ್ಲಿ ಉತ್ತಮ ಬೆಳವಣಿಗೆ ಹೊಂದುತ್ತದೆ. ಜತೆಗೆ ಉತ್ತಮ ಬೇಡಿಕೆ ಇರುವುದರಿಂದ ಅಲ್ಪಾವಧಿಯಲ್ಲಿ ಅಧಿಕ ಲಾಭ ನೀಡುತ್ತದೆ ಎಂಬುದು ಈ ಪ್ರಾತ್ಯಕ್ಷಿಕೆಯಿಂದ ಧೃಡಪಟ್ಟಿದೆ.

ಭರ್ಜರಿ ಲಾಭ

ಪಂಜರಕ್ಕೆ ಬಿಟ್ಟ ಮರಿಗಳ ಪೈಕಿ ಶೇ.90ಕ್ಕಿಂತ ಅಧಿಕ ಮೀನುಗಳು ಬದುಕುಳಿದಿದ್ದು, ಕೇವಲ ಐದು ತಿಂಗಳಲ್ಲಿಯೇ 400 ರಿಂದ 450 ಗ್ರಾಂ ವರೆಗೆ ಬೆಳೆದಿದೆ. ಈ ಮೂಲಕ ಒಟ್ಟು 1300 ಕೆ.ಜಿ. ಮೀನು ಇಳುವರಿ ಬಂದಿದೆ. ಪ್ರತಿ ಕೆಜಿಗೆ 450ರೂ. ರಿಂದ 490ರೂ.ರವರೆಗೆ ದೊರೆತಿದ್ದು ಮಾರಾಟದಿಂದ ಒಟ್ಟು 6,10,000 ರೂ. ಹಣ ದೊರಕಿದೆ.

ಯಶಸ್ವಿ ಪ್ರಯೋಗದಿಂದ ಇದೀಗ ಈ ಮೀನು ಕೃಷಿಯ ಬಗ್ಗೆ ಹಲವರಲ್ಲಿ ಆಸಕ್ತಿ ಹೆಚ್ಚಾಗಿದೆ. ಈ ಬಗ್ಗೆ ಬೇಡಿಕೆಗಳು ಬರುತ್ತಿವೆ. ಈ ಹಿನ್ನೆಲೆಯಲ್ಲಿ ಕರ್ನಾಟಕ ಕರಾವಳಿಯ ಮೂರು ಜಿಲ್ಲೆಗಳ 10 ಸ್ಥಳಗಳಲ್ಲಿ ಪಂಜರ ಮೀನು ಕೃಷಿ ಮಾಡಲು ಯೋಜನೆ ಹಾಕಿಕೊಳ್ಳಲಾಗಿದೆ.
-ರಾಜೇಶ್ ಕೆ.ಎಂ.
ಕೆಂದ್ರೀಯ ಸಮುದ್ರ ಮೀನುಗಾರಿಕೆ ಸಂಶೋಧನಾ ಸಂಸ್ಥೆ ಮಂಗಳೂರು ಪ್ರಾದೇಶಿಕ ಕೇಂದ್ರ ವಿಜ್ಞಾನಿ

ಸಮಯ ಪ್ರಜ್ಞೆಯಿಂದ ಪಾರಾದ ಗಂಟಿಹೊಳೆ

ಘಾಟಿ ಹೆದ್ದಾರಿಯಲ್ಲಿ ನೆಟ್‌ವರ್ಕ್ ಸಮಸ್ಯೆ