ಕೇರಳ: ಭಾರತದ ಹಲವು ರಾಜ್ಯಗಳಲ್ಲಿ ಮದುವೆಯ ಕಾಲ ಶುರುವಾಗಿದೆ, ಮದುವೆ ನಿಶ್ಚಯವಾದವರು ಈಗಾಗಲೆ ಮದುವೆ ತಯಾರಿಗಳನ್ನು ಶುರು ಮಾಡಿಕೊಂಡಿದ್ದಾರೆ. ಆದರೆ ಇಲ್ಲೊಂದು ಮದುವೆಯಲ್ಲಿ ವರನ ಗೆಳೆಯರು ಒಂದು ಒಪ್ಪಂದ ಪತ್ರವನ್ನು ತಯಾರಿಸಿದ್ದು ಜಾಲತಾಣಗಳಲ್ಲಿ ಆ ‘ಮದುವೆ ಒಪ್ಪಂದ’ದ ಪತ್ರ ಈಗ ವೈರಲ್ ಆಗಿದೆ. ಅದು ಸುಮ್ಮನೆ ಬಿಳಿ ಕಾಗದದ ಮೇಲೆ ಬರೆದ ‘ಒಪ್ಪಂದ ಪತ್ರ’ ಅಲ್ಲ, 50 ರೂ. ಸ್ಟಾಂಪ್ ಪೇಪರ್ನಲ್ಲಿ ಮುದ್ರಿತವಾಗಿದೆ!
‘ಮದುವೆ ಆದ್ಮೇಲೆ ನೀನು ಸಿಗೋದಿಲ್ಲ ಕಣಯ್ಯಾ…’ ಎಂಬ ಮಾತನ್ನು ಮದುವೆಯಾಗುವ ಹುಡುಗರಿಗೆ ಆತನ ಸ್ನೇಹಿತರು ಹೇಳುವುದನ್ನು ನೀವು ಕೇಳಿಯೇ ಇರುತ್ತೀರಿ. ಹಾಗಾಗದೆ ಇರಲಿ ಅಂತ ಮುಂಜಾಗ್ರತೆ ವಹಿಸಿರುವ ಸ್ನೇಹಿತರು ತಯಾರಿಸಿದ ಒಪ್ಪಂದ ಪತ್ರ ಇದು. ಈ ‘ವಿವಾಹ ಒಪ್ಪಂದ’ಕ್ಕೆ ಮದುವೆಯ ದಿನ ವಧು ಸಹಿ ಮಾಡಬೇಕಿತ್ತು.
ವಧುವಿನ ಹೆಸರು ಅರ್ಚನಾ. ವರನ ಹೆಸರು ರಘು. “ಮದುವೆ ಆದ ನಂತರವೂ ರಾತ್ರಿ ೯ ಗಂಟೆವರೆಗೆ ಸ್ನೇಹಿತರ ಜತೆ ಕಾಲ ಕಳೆಯಲು ರಘುಗೆ ಅವಕಾಶ ಇರಬೇಕು. ಆ ಸಮಯದಲ್ಲಿ ರಘುಗೆ ಅರ್ಚನಾ ಪದೇಪದೇ ಫೋನ್ ಮಾಡುವಂತಿಲ್ಲ. ಬೇಗ ಮನೆಗೆ ಬಾ ಅಂತ ಒತ್ತಾಯ ಮಾಡುವಂತಿಲ್ಲ”. ಈ ಸ್ಟಾಂಪ್ ಪೇಪರನ್ನು 2022ರ ನವೆಂಬರ್ 5 ರಂದು ಇಬ್ಬರು ಸಾಕ್ಷಿಗಳ ಸಮ್ಮುಖದಲ್ಲಿ ವಧುವಿನ ಕೈಯಲ್ಲಿ ಸಹಿ ಮಾಡಿಸಲಾಯಿತು.
‘ಮದುವೆಯ ನಂತರವೂ ನನ್ನ ಗಂಡ ಎಸ್ ಕೆಡಿಆರ್ ರಘು ತನ್ನ ಸ್ನೇಹಿತರ ಜತೆ ರಾತ್ರಿ 9 ಗಂಟೆಯವರೆಗೆ ಕಾಲ ಕಳೆಯಲು ಅನುಮತಿಯನ್ನು ನೀಡುತ್ತೇನೆ ಮತ್ತು ಆ ಸಮಯದಲ್ಲಿ ಸತತವಾಗಿ ಫೋನ್ ಕಾಲ್ ಮಾಡಿ ತೊಂದರೆ ನೀಡುವುದಿಲ್ಲ ಎಂದು ಭರವಸೆ ಕೊಡುತ್ತೇನೆ.’ ಅಂತ ಅರ್ಚನಾ ಒಪ್ಪಿಕೊಂಡು ಸಹಿ ಮಾಡಿದ್ದಾಳೆ. ಈ ಜೋಡಿ ಮೂಲತಃ ಕೇರಳದವರು. ನವೆಂಬರ್ 5ರಂದು ಪಾಲಕ್ಕಾಡ್ನಲ್ಲಿ ಮದುವೆಯಾದರು. ಆ ಸಂದರ್ಭದಲ್ಲಿ ತಮಾಷೆಗಾಗಿ ಸ್ನೇಹಿತರು ಮಾಡಿಸಿರುವ ಈ ‘ಒಪ್ಪಂದ ಪತ್ರ’ ಈಗ ಭಾರೀ ವೈರಲ್ ಆಗಿದೆ. – ಏಜೆನ್ಸೀಸ್
ವರ್ಷಕ್ಕೆ ನಾಲ್ಕು ಚಿತ್ರಗಳಲ್ಲಿ ನಟಿಸುವುದರಲ್ಲಿ ತಪ್ಪೇನಿದೆ? ಅಕ್ಷಯ್ ಕುಮಾರ್ ಪ್ರಶ್ನೆ