ಮುಂಬೈ: ಇದುವರೆಗೂ ಬಾಲಿವುಡ್ ಬಗ್ಗೆ ಹಲವರು ಕೆಟ್ಟದಾಗಿ ಮಾತನಾಡಿದ ಸಂದರ್ಭದಲ್ಲಿ ಸುಮ್ಮನಿದ್ದ ಬಹುತೇಕ ನಟ-ನಟಿಯರು ಮತ್ತು ತಂತ್ರಜ್ಱರು, ಇದೀಗ ಜಯಾ ಬಚ್ಚನ್ ಅವರು ಬಾಲಿವುಡ್ ಬಗ್ಗೆ ಮಾತನಾಡುತ್ತಿದ್ದಂತೆಯೇ ಸಂತಸ ವ್ಯಕ್ತಪಡಿಸಿದ್ದಾರೆ. ಜಯಾ ಮಾತುಗಳನ್ನು ಅನುಮೋದಿಸಿರುವುದಷ್ಟೇ ಅಲ್ಲ, ಅವರ ಬೆನ್ನಿಗೆ ನಿಂತಿದ್ದಾರೆ ಎನ್ನುವುದು ವಿಶೇಷ.
ಸಂಸತ್ತಿನಲ್ಲಿ ಮಾತನಾಡುವ ಸಂದಭರ್ದಲ್ಲಿ, ‘ಯಾರೋ ಒಬ್ಬಿಬ್ಬರು ಮಾಡಿರುವ ತಪ್ಪಿಗೆ ಇಡೀ ಚಿತ್ರರಂಗಕ್ಕೆ ಡ್ರಗ್ಸ್ ಮಾಫಿಯಾದ ನಂಟಿದೆ ದೂಷಿಸುವುದು ತಪ್ಪು …’ ಎಂದು ಬಾಲಿವುಡ್ನ ಹಿರಿಯ ನಟಿ ಮತ್ತು ಸಮಾಜವಾದಿ ಪಕ್ಷದ ಸಂಸದೆ ಜಯಾ ಬಚ್ಚನ್ ಮಂಗಳವಾರವಷ್ಟೇ ಹೇಳಿದ್ದರು. ಈ ಕುರಿತು ಹಿರಿಯ ನಟಿ ಹೇಮಾ ಮಾಲಿನಿ, ಊರ್ಮಿಳಾ ಮಾತೋಂಡ್ಕರ್, ನಗ್ಮಾ ಸೇರಿದಂತೆ ಹಲವರು ಅನುಮೋದಿಸಿದ್ದಾರೆ.
ಇದನ್ನೂ ಓದಿ: ಬಚ್ಚನ್ ಬಂಗಲೆಗಳಿಗೆ ಪೊಲೀಸ್ ಭದ್ರತೆ …
ಈಗ ಹಿರಿಯ ನಟ ಶತ್ರುಘ್ನ ಸಿನ್ಹಾ ಸಹ ಈ ವಿಷಯವಾಗಿ ಮಾತನಾಡಿದ್ದಾರೆ. ‘ಕಳೆದ 50 ವರ್ಷಗಳಿಂದ ಚಿತ್ರರಂಗದಲ್ಲಿದ್ದೇನೆ. ನನಗೆ ಯಾರೂ ಡ್ರಗ್ಸ್ ಕೊಡುವ ಸಾಹಸ ಮಾಡಿಲ್ಲ. ಅಷ್ಟೇ ಅಲ್ಲ, ನನ್ನೆದುರು ಡ್ರಗ್ಸ್ ತೆಗೆದುಕೊಂಡಿಲ್ಲ. ಯಾರೋ ಕೆಲವರು ಡ್ರಗ್ಸ್ ತೆಗೆದುಕೊಳ್ಳುತ್ತಾರೆ ಎಂದರೆ, ಎಲ್ಲರ ಮೇಲೆ ಆರೋಪ ಮಾಡುವುದು ಸರಿಯಲ್ಲ. ವ್ಯವಸ್ಥೆಯನ್ನು ಕ್ಲೀನ್ ಮಾಡುವುದಕ್ಕೆ ಇದು ಒಳ್ಳೆಯ ಸಮಯ’ ಎಂದು ಅವರು ಹೇಳಿದ್ದಾರೆ.
ಇನ್ನು ಕಂಗನಾ ವಿರುದ್ಧ ತೊಡೆತಟ್ಟಿಕೊಂಡೇ ಬಂದಿರುವ ನಟಿ ಸ್ವರಾ ಭಾಸ್ಕರ್, ‘ಜಯಾಜಿ ನೂರು ಪರ್ಸೆಂಟ್ ಸರಿಯಾಗಿ ಮಾತನಾಡಿದ್ದಾರೆ. ಅವರಂಥ ಒಬ್ಬರಾದರೂ ಹಿರಿಯರು ಮತ್ತು ಅನುಭವಿಗಳು ಈ ವಿಷಯದ ಕುರಿತು ಮಾತನಾಡಿದರಲ್ಲ, ಅದೇ ಸಂತೋಷ’ ಎಂದು ಸ್ವರಾ ಹೇಳಿದ್ದಾರೆ.
ಇದನ್ನೂ ಓದಿ: ಊರಿಗೆ ಹೋಗಿ ಡ್ರಗ್ಸ್ ವಿರುದ್ಧ ಸಮರ ಸಾರಲಿ … ಕಂಗನಾಗೆ ಊರ್ಮಿಳಾ ಸವಾಲ್
ಕಂಗನಾ ಜತೆಗೆ ಕಿತ್ತಾಡಿಕೊಂಡಿದ್ದ ಮತ್ತೊಬ್ಬ ನಟಿ ತಾಪ್ಸಿ ಪನ್ನು ಸಹ ಜಯಾ ಬಚ್ಚನ್ ಅವರ ಮಾತುಗಳನ್ನು ಅನುಮೋದಿಸಿದ್ದಾರೆ. ‘ಉತ್ತರ ಕೊಡುವುದುಕ್ಕೆ ಇದು ಸಕಾಲ. ಅದರಲ್ಲೂ ಈ ವಿಷಯವಾಗಿ ಒಬ್ಬ ಮಹಿಳೆ ಮಾತನಾಡಿದ್ದು ಬಹಳ ಖುಷಿಯಾಗುತ್ತಿದೆ’ ಎಂದು ಟ್ವೀಟ್ ಮಾಡಿದ್ದಾರೆ.
ಫರ್ಹಾನ್ ಅಖ್ತರ್ ಸಹ ಈ ವಿಷಯವಾಗಿ ಮಾತನಾಡಿದ್ದು, ‘ಅವಶ್ಯಕತೆ ಇದ್ದಾಗಲೆಲ್ಲಾ ಅವರು ಎಲ್ಲರ ಪರವಾಗಿ ನಿಂತು ಗಟ್ಟಿಯಾಗಿ ಮಾತನಾಡಿದ್ದಾರೆ. ಈ ಬಾರಿ ಸಹ ಅದನ್ನು ಮುಂದುವರೆಸಿದ್ದಾರೆ’ ಎಂದು ಫರ್ಹಾನ್ ಹೇಳಿದ್ದಾರೆ.
ಬರೀ ಇವರಷ್ಟೇ ಅಲ್ಲ, ಅನುಭವ್ ಸಿನ್ಹಾ, ನಿಖಿಲ್ ದ್ವಿವೇದಿ, ಸೋನಮ್ ಕಪೂರ್, ಅತುಲ್ ಕಸ್ಬೇಕರ್ ಸೇರಿದಂತೆ ಹಲವರು ಜಯಾ ಬಚ್ಚನ್ ಅವರ ಬೆನ್ನಿಗೆ ನಿಂತಿದ್ದಾರೆ.
ಬಾಲಿವುಡ್ ಬಗ್ಗೆ ಕೆಟ್ಟದಾಗಿ ಮಾತನಾಡಿದರೆ ಸುಮ್ಮನಿರಲ್ಲ: ಹೇಮಾ ಮಾಲಿನಿ