ನೆಪೋಟಿಸಂ ಅರ್ಥಾತ್ ಸ್ವಜನ ಪಕ್ಷಪಾತದ ಬಗ್ಗೆ ಎಲ್ಲ ಚಿತ್ರರಂಗಗಳಲ್ಲೂ ಆಗಾಗ ಚರ್ಚೆಯಾಗುತ್ತಿರುತ್ತದೆ. ಇದೀಗ ಎರಡು ದಶಕಗಳ ಕರಿಯರ್ನಲ್ಲಿ 40ಕ್ಕೂ ಅಧಿಕ ಚಿತ್ರಗಳಲ್ಲಿ ನಟಿಸಿರುವ, “ದ ಡರ್ಟಿ ಪಿಕ್ಚರ್’ ಚಿತ್ರಕ್ಕೆ ಅತ್ಯುತ್ತಮ ನಟಿ ರಾಷ್ಟ್ರಪ್ರಶಸ್ತಿ, ಏಳು ಫಿಲಂೇರ್ ಸೇರಿ ಹಲವು ಪ್ರಶಸ್ತಿಗಳನ್ನು ಪಡೆದಿರುವ ಬಾಲಿವುಡ್ ನಟಿ ವಿದ್ಯಾ ಬಾಲನ್ ಕೂಡ ಆ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
“ನೆಪೋಟಿಸಂ ಇರಲಿ, ಇಲ್ಲದಿರಲಿ, ನಾನು ಚಿತ್ರರಂಗದಲ್ಲಿ ಇರುತ್ತೇನೆ. ಸಿನಿಮಾ ಇಂಡಸ್ಟ್ರಿ ಯಾರಪ್ಪನ ಸ್ವತ್ತಲ್ಲ. ಹಾಗಿದ್ದರೆ ಸ್ಟಾರ್ಗಳ ಮಕ್ಕಳು ತಂದೆ, ತಾಯಿಯಂತೆಯೇ ಯಶಸ್ಸು ಗಳಿಸುತ್ತಿದ್ದರು’ ಎಂದು ಖಾರವಾಗಿ ನುಡಿದಿದ್ದಾರೆ. ಜತೆಗೆ ಡಜನ್ಗೂ ಹೆಚ್ಚು ಅವಕಾಶಗಳು ಕೈತಪ್ಪಿದ ಬಗ್ಗೆ ಮೌನ ಮುರಿದಿರುವ ವಿದ್ಯಾ, “ಸುಮಾರು ಮೂರು ವರ್ಷಗಳ ಕಾಲ ನಾನು ಈ ಸಮಸ್ಯೆ ಎದುರಿಸಿದ್ದೆ. ಎಲ್ಲರೂ ನನ್ನನ್ನೂ ನತದೃಷ್ಟಳು ಎಂದು ಬ್ರ್ಯಾಂಡ್ ಮಾಡಿಬಿಟ್ಟಿದ್ದರು. ಅದರಿಂದಾಗಿ ಡಜನ್ಗೂ ಹೆಚ್ಚು ಅವಕಾಶಗಳು ನನ್ನ ಕೈತಪ್ಪಿದ್ದವು. ಪ್ರತಿದಿನ ರಾತ್ರಿ ಅಳುತ್ತಾ ಮಲಗುತ್ತಿದ್ದೆ. ಬೆಳಗ್ಗೆ ಎದ್ದು ಪ್ರಾರ್ಥಿಸುತ್ತಿದ್ದೆ’ ಎಂದು ಬೇಸರದಿಂದ ಹೇಳಿಕೊಂಡಿದ್ದಾರೆ.
ಸದ್ಯ ವಿದ್ಯಾ ಬಾಲನ್ ನಟಿಸಿರುವ “ದೋ ಔರ್ ದೋ ಪ್ಯಾರ್’ ಸಿನಿಮಾ ಇದೇ ತಿಂಗಳ 19ರಂದು ರಿಲೀಸ್ ಆಗಲಿದೆ. ಜತೆಗೆ “ಭೂಲ್ ಭುಲಯ್ಯಾ 3′ ಚಿತ್ರದಲ್ಲಿ ಅವರು ಬಿಜಿಯಿದ್ದಾರೆ.
