ಬೆಂಗಳೂರು: ಬರ್ತ್ಡೇ ಪಾರ್ಟಿ ವಿಭಿನ್ನವಾಗಿ ಆಚರಿಸಬೇಕು, ಆದರೆ ಹೇಗೆ ಎಂದು ಆಲೋಚಿಸುತ್ತ ಮನಸಿಗೆ ತೋಚಿದಂತೆ ಆಚರಿಸಿ ತೊಂದರೆಗೆ ಸಿಲುಕುತ್ತಿರುವವರ ಸಂಖ್ಯೆಯೂ ಕಡಿಮೆ ಏನಲ್ಲ. ಅಂಥದ್ದೇ ಒಂದು ಕರುಣಾಜನಕ ಕಥೆ ಇದು..
ಬೆಂಗಳೂರಿನ ಕೆ.ಆರ್.ಪುರಂನಲ್ಲಿ ನಡೆದ ನೈಜ ಘಟನೆ ಇದು. ಸುರೇಶ್, ನದೀಂ, ರಾಜೇಶ್ ಹಾಗೂ ಹನುಮಂತು ಎಂಬ ನಾಲ್ವರು ಗೆಳೆಯರು ಈ ಘಟನೆಯ ಕೇಂದ್ರ ಬಿಂದುಗಳು. ಗೆಳೆಯನ ಹುಟ್ಟುಹಬ್ಬ ಆಚರಣೆಗೆಂದು ಸೇರಿದವರು ಬಿಯರ್ ಕುಡಿದು, ನಾನ್ವೆಜ್ ಊಟ ಉಂಡರು. ಅಷ್ಟೇ ಸಾಲದು ಎಂಬಂತೆ ಲಾಂಗ್ ಹಿಡಿದು ಒಂದು ಸೆಲ್ಫಿಯನ್ನೂ ತಗೊಂಡ್ರು. ಅಷ್ಟಕ್ಕೇ ಸುಮ್ಮನಾಗದ ಈ ಗೆಳೆಯರು ಆ ಸೆಲ್ಫಿಯನ್ನು ಹೆಮ್ಮೆಯಿಂದ ಫೇಸ್ಬುಕ್ನಲ್ಲೂ ಅಪ್ಲೋಡ್ ಮಾಡಿ ಅದು ವೈರಲ್ ಆಗುತ್ತಿರುವುದು ನೋಡಿ ಕೆ.ಆರ್.ಪುರದಲ್ಲಿ ತಮ್ಮ ಹವಾ ಜೋರಾಗಿದೆ ಎಂದು ಖುಷಿಪಟ್ಟರು.
ಅವರ ಖುಷಿಗೆ ಮಿತಿಯೇ ಇರಲಿಲ್ಲ. ಆದರೆ, ಆ ಖುಷಿ ಹೆಚ್ಚು ಹೊತ್ತು ಇರಲಿಲ್ಲ. ಈ ಪೋಸ್ಟ್ ಪೊಲೀಸರ ಗಮನಕ್ಕೂ ಬಂತು. ಈ ಗೆಳೆಯರು ರೌಡಿಶೀಟರ್ಗಳು ಎಂಬುದು ಮನವರಿಕೆ ಆದ ಕೂಡಲೇ ಕಾರ್ಯಪ್ರವೃತ್ತರಾದ ಕೆ.ಆರ್.ಪುರ ಪೊಲೀಸರು ಇವರ ಬಂಧನಕ್ಕೆ ಜಾಲ ಹೆಣೆದರು. ಆ ಬಲೆಗೆ ನಿರ್ಜನ ಪ್ರದೇಶದಲ್ಲಿ ಕಾರು ನಿಲ್ಲಿಸಿ ವಿಶ್ರಾಂತಿ ಪಡೆಯುತ್ತಿದ್ದ ಈ ಗೆಳೆಯರು ಬಿದ್ದರು.
ಬಂಧಿತರ ಮೇಲೆ ಹಲವು ಪ್ರಕರಣಗಳು ಇರುವುದು ಪತ್ತೆಯಾಗಿದೆ. ಈ ನಾಲ್ವರು ರೌಡಿಶೀಟರ್ಗಳು ಕೆಆರ್ಪುರದಲ್ಲಿ ಹವಾ ಸೃಷ್ಟಿಸಲು ಸೆಲ್ಫಿ ಚಿತ್ರವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾಗಿ ಪೊಲೀಸರ ಮುಂದೆ ಬಾಯಿಬಿಟ್ಟಿದ್ದಾರೆ. ಅವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಕಾರು ಮತ್ತು ಮಾರಕಾಸ್ತ್ರಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. (ದಿಗ್ವಿಜಯ ನ್ಯೂಸ್)
ಮಳವಳ್ಳಿಯಲ್ಲಿ ಹಾಡುಹಗಲೇ ಮಾರಕಾಸ್ತ್ರ ಹಿಡಿದು ಸಾರ್ವಜನಿಕರಿಗೆ ಬೆದರಿಕೆ ಹಾಕಿದ ವ್ಯಕ್ತಿ