ಟೋಕಿಯೊ: ಭಾರತದ ಭವಿನಾಬೆನ್ ಪಟೇಲ್, ಟೋಕಿಯೊ ಪ್ಯಾರಾಲಿಂಪಿಕ್ಸ್ನಲ್ಲಿ ಮಹಿಳೆಯರ ಟೇಬಲ್ ಟೆನಿಸ್ ಕ್ಲಾಸ್-4 ವಿಭಾಗದಲ್ಲಿ ಸೆಮಿಫೈನಲ್ ಪ್ರವೇಶಿಸುವ ಮೂಲಕ ಪದಕ ಖಚಿತಪಡಿಸಿದ್ದಾರೆ. ಶುಕ್ರವಾರ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಭವಿನಾಬೆನ್ 3-0 ನೇರ ಗೇಮ್ಗಳಿಂದ ಹಾಲಿ ಚಾಂಪಿಯನ್ ಸೆರ್ಬಿಯಾದ ಪೆರಿಕ್ ರ್ಯಾನ್ಕೊವಿಕ್ ಅವರನ್ನು ಸೋಲಿಸಿದರು. ಪ್ಯಾರಾಲಿಂಪಿಕ್ಸ್ನಲ್ಲಿ ಸೆಮಿಫೈನಲ್ ಪ್ರವೇಶಿಸಿದರೆ ಪದಕ ಖಚಿತವಾಗುತ್ತದೆ. ಕಂಚಿನ ಪದಕಕ್ಕಾಗಿ ಪ್ರತ್ಯೇಕ ಪಂದ್ಯ ನಡೆಯುವುದಿಲ್ಲ.
ಇದನ್ನೂ ಓದಿ:2024ರ ಪ್ಯಾರಿಸ್ ಒಲಿಂಪಿಕ್ಸ್ಗೆ ಸಿದ್ಧತೆ ಆರಂಭಿಸಿದ ಮೀರಾಬಾಯಿ ಚಾನು
ಪ್ಯಾರಾಲಿಂಪಿಕ್ಸ್ ಟೇಬಲ್ ಟೆನಿಸ್ನಲ್ಲಿ ಎಂಟರಘಟ್ಟಕ್ಕೇರಿದ ಭಾರತದ ಮೊದಲ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದ 34 ವರ್ಷದ ಭವಿನಾಬೆನ್ ಇದೀಗ ಉಪಾಂತ್ಯಕ್ಕೇರುವ ಮೂಲಕ ಇತಿಹಾಸ ಬರೆದರು. ಭವಿನಾಬೆನ್ 11-5, 11-6, 11-7 ರಿಂದ ಸೆರ್ಬಿಯಾ ಆಟಗಾರ್ತಿ ಎದುರು ಕೇವಲ 18 ನಿಮಿಷಗಳಲ್ಲಿ ಜಯ ದಾಖಲಿಸಿದರು. ಇದಕ್ಕೂ ಮೊದಲು ನಡೆದ 16ರ ಘಟ್ಟದ ಪಂದ್ಯದಲ್ಲಿ ಭವಿನಾಬೆನ್ ಪಟೇಲ್ 12-10, 13-11, 11-6 ರಿಂದ ಬ್ರೆಜಿಲ್ನ ಜಾಯ್ಸಿ ಡಿ ಒಲಿವೇರಿಯಾ ಅವರನ್ನು ಕೇವಲ 23 ನಿಮಿಷಗಳಲ್ಲಿ ಮಣಿಸಿದರು.
ಇದನ್ನೂ ಓದಿ: ಆರ್ಸಿಬಿ ತಂಡಕ್ಕೆ ಮತ್ತೊಬ್ಬ ಹೊಸ ಆಟಗಾರ
* ಕರ್ನಾಟಕದ ಸಕಿನಾ ಖತುನ್ಗೆ 5ನೇ ಸ್ಥಾನ
ಕರ್ನಾಟಕದ ಸಕಿನಾ ಖತುನ್, ಮಹಿಳೆಯರ 50 ಕೆಜಿ ವಿಭಾಗದ ಪವರ್ಲಿಫ್ಟಿಂಗ್ ವಿಭಾಗದಲ್ಲಿ 5ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. 2014ರ ಕಾಮನ್ವೆಲ್ತ್ ಗೇಮ್ಸ್ ಕಂಚಿನ ಪದಕ ವಿಜೇತೆ ಸಕಿನಾ, ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ವೈಯಕ್ತಿಕ ಶ್ರೇಷ್ಠ ನಿರ್ವಹಣೆ ತೋರಿ 93 ಕೆಜಿ ಭಾರ ಎತ್ತಿದರು. ಇದೇ ವಿಭಾಗದಲ್ಲಿ ಚೀನಾದ ದಡನ್ ಹು 120 ಕೆಜಿ ಭಾರ ಎತ್ತಿ ಸ್ವರ್ಣ ಗೆದ್ದರೆ, ಈಜಿಪ್ಟ್ನ ರೆಹಾಬ್ ಅಹಮದ್ ಕೂಡ 120 ಕೆಜಿ ಭಾರ ಹಾಗೂ ಬ್ರಿಟನ್ನ ಒಲಿವಿಯಾ ಬ್ರೋಮೆ 107 ಕೆಜಿ ಭಾರ ಎತ್ತುವ ಮೂಲಕ ಕ್ರಮವಾಗಿ ಬೆಳ್ಳಿ ಹಾಗೂ ಕಂಚಿನ ಪದಕ ಜಯಿಸಿದರು.
#ParaTableTennis Update#IND @BhavinaPatel6 has confirmed a medal at #Tokyo2020 #Paralympics after advancing to the SF
— SAI Media (@Media_SAI) August 27, 2021
Bhavina will face #CHN M. Zhang in the Semifinal tomorrow at 6:10 AM (IST)
Come on India, join us in supporting her with #Cheer4India #Praise4Para