ಲಂಡನ್: ಆಹಾರವೇ ಒಂದು ಕಲೆ ಎಂದು ಹಿರಿಯರು ಹೇಳುತ್ತಾರೆ. ಇದೇ ಆಹಾರ ಪೂರ್ತಿ ನಗರವನ್ನೇ ಸಿಂಗರಿಸುವಂತಿದ್ದರೆ? ಅದರಲ್ಲೂ ನಾವು ಅಗಿದು ಬಿಸಾಕುವ ಚೂಯಿಂಗ್ ಗಮ್ ನಮ್ಮ ನಗರದ ಫುಟ್ಪಾತ್, ರಸ್ತೆಗಳ ಮೇಲೆ ವರ್ಣರಂಜಿತವಾಗಿ ಕಂಗೊಳಿಸುತ್ತಿದ್ದರೆ? ಹೌದು! ಲಂಡನ್ನ ಬೆನ್ ವಿಲ್ಸನ್ ಹೆಸರಿನ ವ್ಯಕ್ತಿ ಕಸದಂತಿರುವ ಚೂಯಿಂಗ್ ಗಮ್ನಿಂದ ನಗರ ಸಿಂಗಾರ ಮಾಡುವುದು ಹೇಗೆ ಎಂದು ತೋರಿಸಿಕೊಟ್ಟಿದ್ದಾನೆ.
ನಾವೆಲ್ಲ ಚೂಯಿಂಗ್ ಗಮ್ ಖರೀದಿಸುವುದು ಕೆಲ ನಿಮಿಷಗಳ ಕಾಲ ಅಗಿದು ಬಿಸಾಕುವುದಕ್ಕೆ. ಅದು ನಿಮಷದ ಕಾಲ ನಮ್ಮ ನಾಲಿಗೆಗೆ ರುಚಿ ನೀಡುವ ತಿಂಡಿಯಷ್ಟೇ. ಅಗಿದಾದ ಮೇಲೆ ಅದೊಂದು ಕಸ. ಆದರೆ ಲಂಡನ್ನ ಬೆನ್ ವಿಲ್ಸನ್ ಇದೇ ಚೂಯಿಂಗ್ ಗಮ್ನನ್ನು ತನ್ನ ಕಲೆಯ ಪ್ರದರ್ಶನಕ್ಕೆಂದು ಬಳಸಿಕೊಳ್ಳುತ್ತಿದ್ದಾನೆ. ಚಿತ್ರ ಕಲಾವಿದನಾಗಿರುವ ಈತ ತನಗೆ ರಸ್ತೆ, ಫುಟ್ಪಾತ್ಗಳ ಮೇಲೆ ಕಾಣುವ ಪ್ರತಿ ಚೂಯಿಂಗ್ ಗಮ್ನ ಮೇಲೆಯೂ ಚಿತ್ರ ಬರೆಯುತ್ತಾನೆ. ದಾರಿ ಮೇಲೆ ಯಾರೋ ಅಗಿದು ಬಿಸಾಕಿರುವ ಚೂಯಿಂಗ್ ಗಮ್ನ ಮೇಲೆ ಈತ ಬರೆಯುವ ಚಿತ್ರಗಳು ದಾರಿ ಹೋಕರೆಲ್ಲ ಒಮ್ಮೆಯಾದರೂ ನಿಂತು ನೋಡುವಂತೆ ಮಾಡುತ್ತವೆ. ಚೂಯಿಂಗ್ ಗಮ್ ಇರುವ ಆಕೃತಿಗೆ ತಕ್ಕಂತೆ ಚಿತ್ರವನ್ನು ಬರೆದು ಜನರನ್ನು ಆಕರ್ಷಿಸುವುದು ಈತನಿಗೆ ಇಷ್ಟದ ಕೆಲಸವಾಗಿಬಿಟ್ಟಿದೆಯಂತೆ.
ಬೆನ್ ವಿಲ್ಸನ್ ಸುಮಾರು 15 ವರ್ಷಗಳಿಂದ ಚೂಯಿಂಗ್ ಗಮ್ನಲ್ಲಿ ತನ್ನ ಕಲೆಯ ಪ್ರದರ್ಶನ ಆರಂಭಿಸಿದ್ದಾನೆ. ವಿಶೇಷವೆಂದರೆ ಈತ ರಚಿಸಿರುವ ಯಾವುದೇ ಕಲಾಕೃತಿಯಲ್ಲಿಯೂ ಕೂಡ ತನ್ನ ಹೆಸರನ್ನಾಗಲೀ ಅಥವಾ ಸಹಿಯನ್ನಾಗಲಿ ಹಾಕಿಲ್ಲವಂತೆ. ಈತನ ಈ ಪ್ರತಿಭೆ ಕಂಡು ಲಂಡನ್ನ ಜನರು ಈತನನ್ನು, ‘ದಿ ಚೂಯಿಂಗ್ ಗಮ್ ಮ್ಯಾನ್’ ಎಂಬ ಹೆಸರಿಟ್ಟಿದ್ದಾರಂತೆ.
ಕಳೆದ ಕೆಲ ತಿಂಗಳುಗಳ ಹಿಂದ ತನ್ನ ಎಲ್ಲ ಕಲಾಕೃತಿಗಳ ಫೋಟೋ ಹೊಂದಿರುವ ಪುಸ್ತಕವೊಂದನ್ನು ಪ್ರಕಟಿಸುವ ಸಲುವಾಗಿ ಬೆನ್ ವಿಲ್ಸನ್ ಜನರಿಂದ ಹಣ ಸಂಗ್ರಹಿಸಲು ಆರಂಭಿಸಿದನಂತೆ. ನಿರೀಕ್ಷೆಗೂ ಮೀರಿದಂತೆ ಅಗತ್ಯಕ್ಕೂ ಹೆಚ್ಚಿನ ಹಣ ಆತನ ಪ್ರೋತ್ಸಾಹಕ್ಕೆಂದು ಹರಿದುಬಂದಿರುವುದಾಗಿ ಆತ ಹೇಳಿಕೊಂಡಿದ್ದಾನೆ. ಅದೇನೆ ಇರಲಿ ಅಲ್ಲಲ್ಲಿ ಕಸವಾಗಿ ಬೀಳುವ ಚೂಯಿಂಗ್ ಗಮ್ನ್ನು ಈ ರೀತಿಯಲ್ಲಿಯೂ ಬಳಸಬಹುದು ಎಂದು ತೋರಿಸಿಕೊಟ್ಟ ಕಲಾವಿದನಿಗೆ ಎಲ್ಲರೂ ಮನಸೋತಿರುವುದಂತೂ ಸತ್ಯ. (ಏಜೆನ್ಸೀಸ್)