ಚಂಡೀಗಢ್: ಗುರುಗಾಂವ್, ಫರಿದಾಬಾದ್ ಮತ್ತು ಪಂಚಕುಲ ನಗರದಲ್ಲಿ ಇನ್ನು ಮುಂದೆ ಬಾರ್ಗಳು ರಾತ್ರಿ 1ರವರೆಗೂ ತೆರೆದಿರಲಿವೆ. ಹಾಗೆಯೇ ಬಿಯರ್ ಮತ್ತು ವೈನ್ ಬೆಲೆಯೂ ಕಡಿಮೆ ಆಗಲಿದೆ.
ಹರಿಯಾಣದ ನೂತನ ಅಬಕಾರಿ ನಿಯಮದ ಅನುಸಾರ ಏಪ್ರಿಲ್ ಒಂದರಿಂದ ಈ ಮೂರು ನಗರಗಳಲ್ಲಿ ಬಾರ್ಗಳು ರಾತ್ರಿ 1ರವರೆಗೆಗೂ ತೆರೆದಿರಲಿವೆ. ಬಿಯರ್ ಹಾಗೂ ವೈನ್ಗಳ ಶುಲ್ಕದಲ್ಲೂ ಸಹ ಭಾರೀ ಪ್ರಮಾಣದ ಇಳಿಕೆಯನ್ನು ಮಾಡಲಾಗಿದ್ದು, ಮದ್ಯಪ್ರಿಯರಿಗೆ ಕಡಿಮೆ ಬೆಲೆಯಲ್ಲಿ ಮದ್ಯ ಸಿಗಲಿದೆ.
ಪ್ರತಿ ಬಾರ್ನ ಪರವಾನಗಿ ಶುಲ್ಕದ ದರವನ್ನು ಇಳಿಸಲಾಗುತ್ತಿದೆ. ರಾತ್ರಿ 11ರವರೆಗೆ ಮಾತ್ರ ಬಾರ್ ತೆರೆಯಲು ಅವಕಾಶವಿದ್ದಿದ್ದು ಇದೀಗ ಅದನ್ನು ಎರಡು ಗಂಟೆಗಳ ಕಾಲ ವಿಸ್ತರಿಸಲಾಗುತ್ತಿದೆ. 11 ಗಂಟೆಯ ನಂತರ 1 ಗಂಟೆಯವರೆಗೆ ಪ್ರತಿ ಗಂಟೆಗೆ 10 ಲಕ್ಷ ರೂ. ಶುಲ್ಕ ಪಾವತಿಸಿ ಬಾರ್ಗಳನ್ನು ತೆರೆದಿಡಬಹುದಾಗಿದೆ.
ಶೇ.3.5 ರಿಂದ ಶೇ.5.5 ಆಲ್ಕೋಹಾಲ್ ಕಂಟೆಂಟ್ ಹೊಂದಿರುವ ಬಿಯರ್ಗಳ ಬಲ್ಕ್ ಲೀಟರ್ಗಳ ಮೇಲಿದ್ದ ಶುಲ್ಕವನ್ನು 50ರೂಪಾಯಿಯಿಂದ 40 ರೂಪಾಯಿಗೆ ಇಳಿಸಲಾಗುತ್ತದೆ. ಹಾಗೆಯೇ ಅನೇಕ ವಿಧದ ಬಿಯರ್ ಮೇಲೆ ವಿಧಿಸಲಾಗುತ್ತಿದ್ದ ಶುಲ್ಕದಲ್ಲಿ ಭಾರೀ ಪ್ರಮಾಣದ ಇಳಿಕೆಯನ್ನು ತರಲಾಗುತ್ತದೆ. ಅದರ ಜತೆಯಲ್ಲಿ ಸೂಪರ್ ಮೈಲ್ಡ್ ಹೆಸರಿನ ಹೊಸ ವಿಧವನ್ನು ತರಲಾಗಿದ್ದು ಅದರ ಮೇಲೆ ಬಲ್ಕ್ ಲೀಟರ್ ಒಂದಕ್ಕೆ 35 ರೂ. ಶುಲ್ಕ ವಿಧಿಸಲಾಗುತ್ತದೆ.
ದೇಶದಲ್ಲಿ ತಯಾರಾಗಿರುವ ಮದ್ಯದ ಬೆಲೆ ಮಾತ್ರ ಕಡಿಮೆಯಾಗದೆ ಹೆಚ್ಚಾಗಲಿದೆ. ಈ ವಿಧದ ಮದ್ಯಕ್ಕೆ ಇದ್ದ ಶುಲ್ಕವನ್ನು 44ರೂ. ಇಂದ 60 ರೂ.ಗೆ ಏರಿಸಲಾಗುತ್ತಿದೆ. ಇಂಡಿಯನ್ ಮೇಡ್ ಫಾರಿನ್ ಲಿಕ್ಕರ್ಗಳ ಬೆಲೆಯಲ್ಲಿ ಯಾವುದೇ ವ್ಯತ್ಯಾಸವಿಲ್ಲ.
ನೂತನ ಅಬಕಾರಿ ನೀತಿಯ ಪ್ರಕಾರ, ಕಾರ್ಯಕ್ರಮಗಳಲ್ಲಿ ಮದ್ಯ ಸೇವಿಸಲು ನೀಡುವಂತಹ ತಾತ್ಕಾಲಿಕ ಏಕದಿನ ಪರವಾನಗಿ ಪಡೆಯುವುದು ಸುಲಭವಾಗಲಿದೆ. ಆನ್ಲೈನ್ನಲ್ಲಿ ಈ ಪರವಾನಿಗಿಯನ್ನು ಪಡೆಯಬಹುದಾಗಿದೆ.
ನಾಲ್ಕು ಸ್ಟಾರ್ ಹೊಂದಿರುವ ಹೋಟೆಲ್ಗಳಲ್ಲಿನ ಬಾರ್ಗಳ ಪರವಾನಗಿ ಶುಲ್ಕವನ್ನು ವರ್ಷಕ್ಕೆ 38 ಲಕ್ಷದಿಂದ 22.5 ಲಕ್ಷಕ್ಕೆ ಇಳಿಕೆ ಮಾಡಲಾಗುತ್ತಿರುವುದಾಗಿ ತಿಳಿಸಲಾಗಿದೆ. ಮೂರು ಸ್ಟಾರ್ ಹೋಟೆಲ್ಗಳ ಪೈಕಿ ಗುರಗಾಂವ್ (20 ಲಕ್ಷ ರೂ) ಮತ್ತು ಫರಿದಾಬಾದ್ (17 ಲಕ್ಷ ರೂ.) ನಗರದ ಹೋಟೆಲ್ಗಳನ್ನು ಹೊರತುಪಡಿಸಿ ಬೇರೆ ನಗರದ ಹೋಟೆಲ್ಗಳ ಬಾರ್ನ ಶುಲ್ಕವನ್ನು 20 ಲಕ್ಷ ರೂ.ಗಳಿಂದ 15 ಲಕ್ಷ ರೂ.ಗೆ ಇಳಿಸಲಾಗುತ್ತಿದೆ. ಗುರಗಾಂವ್ ಮತ್ತು ಫರಿದಾಬಾದ್ ಹೊರತುಪಡಿಸಿ ಎಲ್ಲಾ ಜಿಲ್ಲೆಗಳಲ್ಲಿ ಸ್ಟಾರ್ ರಹಿತ ರೆಸ್ಟೋರೆಂಟ್‌ಗಳಲ್ಲಿನ ಬಾರ್ಗಳ ಪರವಾನಗಿ ಶುಲ್ಕವನ್ನು 12 ಲಕ್ಷ ರೂ.ಗಳಿಂದ 10 ಲಕ್ಷಕ್ಕೆ ಇಳಿಸಲಾಗಿದೆ. (ಏಜೆನ್ಸೀಸ್)