ಬೆಂಗಳೂರು: ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಕರೆಗೆ ಸ್ಪಂದಿಸಿ ನಿನ್ನೆ ರಾತ್ರಿ ದೇಶಾದ್ಯಂತ ಅನೇಕರು ದೀಪ ಬೆಳಗಿದ್ದಾರೆ. ಮೊಬೈಲ್ ಫ್ಲ್ಯಾಶ್, ಟಾರ್ಚ್ ಬೆಳಕಿನ ಮೂಲಕ ಕರೊನಾ ವಿರುದ್ಧದ ಹೋರಾಟಕ್ಕೆ ಒಗ್ಗಟ್ಟಾಗಿದ್ದಾರೆ. ಆದರೆ ಬೆಂಗಳೂರಿನ ವ್ಯಕ್ತಿಯೋರ್ವ ದೀಪ ಹಚ್ಚಿದ ರೀತಿ ಈಗ ಇಂಟರ್ನೆಟ್ನಲ್ಲಿ ಟ್ರೆಂಡ್ ಸೃಷ್ಟಿಸಿದೆ.
ವ್ಯಕ್ತಿಯೋರ್ವ ದೆವ್ವದಂತೆ ವೇಷ ಧರಿಸಿ, ದೀಪ ಹಿಡಿದು ತಮ್ಮ ಮನೆಯ ಬಾಲ್ಕನಿಯ ಮೇಲೆ ಅತ್ತಿಂದಿತ್ತ ಓಡಾಡುತ್ತಿದ್ದ ವಿಡಿಯೋ ಎಲ್ಲೆಡೆ ವೈರಲ್ ಆಗುತ್ತಿದೆ. 15 ಸೆಕೆಂಡ್ಗಳ ವಿಡಿಯೋ ಇದಾಗಿದ್ದು, ಮೊದಲು ನೂಡ್ಲ್ಹೆಡ್ ಎಂಬ ಟ್ವಿಟರ್ ಅಕೌಂಟ್ನಲ್ಲಿ ಪೋಸ್ಟ್ ಆಗಿದೆ.
ಈ ವ್ಯಕ್ತಿ ತಲೆಯಿಂದ ಕಾಲು ಪಾದದವರೆಗೂ ಬಿಳಿ ಬಣ್ಣದ ಉಡುಗೆಯಿಂದ ಪೂರ್ತಿಯಾಗಿ ಮುಚ್ಚಿಕೊಂಡು, ದೆವ್ವದಂತೆ ವೇಷ ಹಾಕಿಕೊಂಡು ಕೈಯಲ್ಲಿ ಮೊಂಬತ್ತಿ ಹಿಡಿದು, ಬಾಲ್ಕನಿಯಲ್ಲಿ ಓಡಾಡುತ್ತಿರುವುದನ್ನು ನೋಡಬಹುದು. ಇನ್ನೂ ಒಂದು ಆಸಕ್ತಿದಾಯಕ ಸಂಗತಿಯೆಂದರೆ, ಈತನ ಮನೆಯಿಂದ ಅದೇ ಸಮಯದಲ್ಲಿ 1965ರಲ್ಲಿ ತೆರೆಕಂಡ ಗುಮ್ ನಾಮ್ ಸಿನಿಮಾದ ಗುಮ್ ನಾಮ್ ಹೈ ಕೋಯಿ ಎಂಬ ಹಾಡೂ ಕೂಡ ಕೇಳಿಬರುತ್ತಿತ್ತು.
ಈ ವಿಡಿಯೋ 3500ಕ್ಕೂ ಹೆಚ್ಚು ಬಾರಿ ರೀಟ್ವೀಟ್ ಆಗಿದೆ. 900ಕ್ಕೂ ಅಧಿಕ ಲೈಕ್ಸ್ ಪಡೆದಿದೆ. ನೆಟ್ಟಿಗರಂತೂ ಬಿದ್ದುಬಿದ್ದು ನಗುತ್ತಿದ್ದಾರೆ. ಈತನಿಗೊಂದು ದೊಡ್ಡ ನಮಸ್ಕಾರ ಎನ್ನುತ್ತಿದ್ದಾರೆ. ಹಾಗೇ ಇವನಿಗೊಂದು ಅವಾರ್ಡ್ ಕೊಡಲೇ ಬೇಕು ಎಂದು ಕೆಲವರು ಕಾಮೆಂಟ್ ಹಾಕಿದ್ದಾರೆ. (ಏಜೆನ್ಸೀಸ್)