ವಿಶ್ವ ನಂ.1 ಟಿ20 ಬ್ಯಾಟರ್ ಸೂರ್ಯಕುಮಾರ್ ಯಾದವ್ (78 ರನ್, 53 ಎಸೆತ, 7 ಬೌಂಡರಿ, 3 ಸಿಕ್ಸರ್) ಬಿರುಸಿನ ಬ್ಯಾಟಿಂಗ್ ಹಾಗೂ ವೇಗಿ ಜಸ್ಪ್ರೀತ್ ಬುಮ್ರಾ (21ಕ್ಕೆ3) ಬಿಗಿ ಬೌಲಿಂಗ್ ದಾಳಿಯ ನೆರವಿನಿಂದ ಐದು ಬಾರಿ ಚಾಂಪಿಯನ್ಮುಂಬೈ ಇಂಡಿಯನ್ಸ್ ಐಪಿಎಲ್&17ರ ತನ್ನ 7ನೇ ಲೀಗ್ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ಎದುರು 9 ರನ್ಗಳ ರೋಚಕ ಗೆಲುವು ದಾಖಲಿಸಿದೆ. ಇದರೊಂದಿಗೆ ಹಾರ್ದಿಕ್ ಪಾಂಡ್ಯ ಪಡೆ ಅಂಕಪಟ್ಟಿಯಲ್ಲಿ 7ನೇ ಸ್ಥಾನಕ್ಕೇರಿದರೆ, ಸತತ 3ನೇ ಸೋಲಿಗೆ ತುತ್ತಾದ ಪಂಜಾಬ್ 9ನೇ ಸ್ಥಾನಕ್ಕೆ ಕುಸಿಯಿತು.
ಗುರುವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ಮುಂಬೈ ಇಂಡಿಯನ್ಸ್, ರೋಹಿತ್ ಶರ್ಮ (36) ಹಾಗೂ ಸೂರ್ಯ ಹಾಕಿಕೊಟ್ಟ ಭದ್ರ ಅಡಿಪಾಯದ ನೆರವಿನಿಂದ 7 ವಿಕೆಟ್ಗೆ 192 ರನ್ಗಳ ಸವಾಲಿನ ಗುರಿ ನೀಡಿತು. ಪ್ರತಿಯಾಗಿ ಬುಮ್ರಾ (21ಕ್ಕೆ 3) ಹಾಗೂ ಕೋಟ್ ಜೀ (32ಕ್ಕೆ 3) ದಾಳಿಗೆ ನಲುಗಿದ ಪಂಜಾಬ್ ಕಿಂಗ್ಸ್, ಆಶುತೋಷ್ ಶರ್ಮ (61 ರನ್, 28 ಎಸೆತ, 2 ಬೌಂಡರಿ, 7 ಸಿಕ್ಸರ್) ಪ್ರತಿರೋಧದ ನಡುವೆಯೂ 19.1 ಓವರ್ಗಳಲ್ಲಿ 183 ರನ್ಗಳಿಗೆೆ ಸರ್ವಪತನ ಕಂಡಿತು.
ಆಶುತೋಷ್ ಏಕಾಂಗಿ ಹೋರಾಟ: ಸವಾಲಿನ ಮೊತ್ತದ ಚೇಸಿಂಗ್ಗೆ ಇಳಿದ ಪಂಜಾಬ್ ಕಿಂಗ್ಸ್ ಆರಂಭ ಆಘಾತಕಾಯಾಗಿತ್ತು. ಪ್ರಭ್ ಸಿಮ್ರಾನ್ ಸಿಂಗ್ (0) ಜತೆಯಾಗಿ ಸ್ಯಾಮ್ ಕರನ್ (6) ಇನಿಂಗ್ಸ್ ಆರಂಭಿಸಿದರು. ಮೊದಲ ಓವರ್ನಲ್ಲಿ ಕೋಟ್ ಜೀ, ಪ್ರಭ್ ಸಿಮ್ರಾನ್ ವಿಕೆಟ್ ಕಬಳಿಸಿದರು. ಮರು ಓವರ್ನಲ್ಲಿ ರಿಲೀ ರೋಸೌ (1), ಕರನ್ ವಿಕೆಟ್ ಉರುಳಿಸಿದ ಬುಮ್ರಾ ಪಂಜಾಬ್ಗೆ ಶಾಕ್ ನೀಡಿದರು. ಲಿವಿಂಗ್ ಸ್ಟೋನ್ (1) ನಿರಾಸೆ ಮೂಡಿಸಿದರು. 14 ರನ್ಗಳಿಗೆ ಅಗ್ರ 4 ವಿಕೆಟ್ ಕಳೆದುಕೊಂಡ ಪಂಜಾಬ್ ಚೇಸಿಂಗ್ನಲ್ಲಿ ಪರದಾಡಿತು. ಆಗ ಶಶಾಂಕ್ ಸಿಂಗ್ (41) ಚೇತರಿಕೆ ನೀಡಿದರು. ಶಶಾಂಕ್ ಜತೆಯಾದ ಅಶುತೋಷ್ ಚೇಸಿಂಗ್ಗೆ ಬಲ ತುಂಬಿದರು. 24 ಎಸೆತದಲ್ಲಿ ಅರ್ಧಶತಕ ಸಿಡಿಸಿದ ಆಶುತೋಷ್ ಪಂಜಾಬ್ ಹೋರಾಟ ಜೀವಂತವಿರಿಸಿದರು. 8ನೇ ವಿಕೆಟ್ಗೆ ಆಶುತೋಷ್&ಹರ್ಪ್ರೀತ್ 32 ಎಸೆತದಲ್ಲಿ 57 ರನ್ ಕಸಿದರು. ಆಗ ಇನಿಂಗ್ಸ್ನ 18ನೇ ಓವರ್ನಲ್ಲಿ ಆಶುತೋಷ್ ವಿಕೆಟ್ ಪಡೆದ ಕೋಟ್ ಜೀ ಪಂಜಾಬ್ ಹೋರಾಟ ಕೊನೆಗೊಳಿಸಿದರು. ಕೊನೇ ಓವರ್ನಲ್ಲಿ 12 ರನ್ ಅಗತ್ಯವಿದ್ದಾಗ ರಬಾಡ ರನೌಟ್ ಆದರು.