ವಾಷಿಂಗ್ಟನ್: ಜಾಗತಿಕ ಮಟ್ಟದಲ್ಲಿ ಭಾರಿ ಕುತೂಹಲ ಕೆರಳಿಸಿದ್ದ ಅಮೆರಿಕ ಚುನಾವಣೆ ಮುಕ್ತಾಯಗೊಂಡಿದೆ. ಹಾಲಿ ಅಧ್ಯಕ್ಷ ಹಾಗೂ ರಿಪಬ್ಲಿಕನ್ ಪಕ್ಷದ ಡೊನಾಲ್ಡ್ ಟ್ರಂಪ್ ಎದುರು ಡೆಮಾಕ್ರಟಿಕ್ ಪಕ್ಷದ ಜೋ ಬೈಡೆನ್ ಪ್ರಚಂಡ ಗೆಲವು ಸಾಧಿಸುವ ಮೂಲಕ ಮುಂದಿನ ಯುಎಸ್ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ವಿಶೇಷವೆಂದರೆ ಅಮೆರಿಕ ಚುನಾವಣೆ ವಿಚಾರದಲ್ಲಿ ಪ್ರಾಣಿಗಳು ನುಡಿದ ಭವಿಷ್ಯವು ಕೂಡ ನಿಜವಾಗಿದೆ.
ಚುನಾವಣೆಯಲ್ಲಿ ಯಾರು ಗೆಲ್ಲಬಹುದು ಎಂದು ರಷ್ಯಾದ ರೋಯೆವ್ ರುಚೆ ಮೃಗಾಲಯದ ಪ್ರಾಣಿಗಳು ಸುಳಿವು ನೀಡಿದ್ದವು. ವಿನೂತನ ಪ್ರಯೋಗದಲ್ಲಿ ಪ್ರಾಣಿಗಳಾದ ಖಾನ್, ಬೌನ್ ಮತ್ತು ಬರ್ಟೆಕ್ ಭಾಗವಹಿಸಿ, ಕಲ್ಲಂಗಡಿಯ ಮೂಲಕ ಯಾರು ಗೆಲ್ಲಲಿದ್ದಾರೆ ಎಂದು ಭವಿಷ್ಯ ನುಡಿದಿದ್ದವು. ಈ ಪ್ರಯೋಗಕ್ಕೆ ಒಂದೇ ಗಾತ್ರದ ಮತ್ತು ಬಣ್ಣದ 6 ಕಲ್ಲಂಗಡಿಗಳನ್ನು ಬಳಸಲಾಗಿತ್ತು. ಅದರ ಮೇಲೆ ಡೊನಾಲ್ಡ್ ಟ್ರಂಪ್ ಮತ್ತು ಜೋ ಬೈಡೆನ್ ಚಿತ್ರಗಳನ್ನು ಬಿಡಿಸಲಾಗಿತ್ತು.
ಮೊದಲು ಟ್ರಂಪ್ ಮತ್ತು ಜೋ ಬೈಡೆನ್ ಚಿತ್ರವಿರುವ ಎರಡು ಕಲ್ಲಂಗಡಿಯನ್ನು ಬರ್ಟೆಕ್ ಹುಲಿಯ ಪಂಜರದ ಮುಂದಿನ ಟೇಬಲ್ನಲ್ಲಿ ಇಡಲಾಗಿತ್ತು. ಅದರ ಮುಂದೆ ಬಂದ ಬರ್ಟೆಕ್ ಹುಲಿ ಎರಡು ಕಲ್ಲಂಗಡಿಯನ್ನು ಉರುಳಿಸಿ, ಕೊನೆಯಲ್ಲಿ ಬಿಡೆನ್ ಚಿತ್ರವಿದ್ದ ಹಣ್ಣನ್ನು ತಿಂದಿತ್ತು.
ಇದನ್ನೂ ಓದಿ: ಡೊನಾಲ್ಡ್ ಟ್ರಂಪ್ಗೆ ಡಿವೋರ್ಸ್ ಕೊಡ್ತಾರಾ ಮೆಲನಿಯಾ? ದಾಂಪತ್ಯ ರಹಸ್ಯ ಬಿಚ್ಚಿಟ್ಟ ಸಲಹೆಗಾರ!
ಇದಾದ ಬಳಿಕ ಮತ್ತೆರೆಡು ಹಣ್ಣನ್ನು ಖಾನ್ (ಬಿಳಿ ಬಣ್ಣದ ಬೆಂಗಾಲ್ ಟೈಗರ್) ಮುಂದೆ ಇಡಲಾಗಿತ್ತು. ಅದು ಕೂಡ ಬೈಡೆನ್ ಚಿತ್ರವಿದ್ದ ಕಲ್ಲಂಗಡಿಯನ್ನು ಒದ್ದು, ಕೊನೆಗೆ ಘರ್ಜಿಸುತ್ತಾ ಹಣ್ಣಿನ ಮಧ್ಯಭಾಗದಲ್ಲಿ ರಂಧ್ರ ಮಾಡಿತ್ತು. ಇದಾದ ಬಳಿಕ ಬೌನ್ (ಕರಡಿ) ಮುಂದೆ ಮತ್ತೆರೆಡು ಹಣ್ಣನ್ನು ಇಡಲಾಯಿತು. ಅದು ಕೂಡ ಬೈಡೆನ್ ಅವರನ್ನೇ ಆಯ್ಕೆ ಮಾಡಿ, ಆ ಹಣ್ಣನ್ನು ತಿಂದಿತ್ತು. ಹೀಗಾಗಿ ಮೂರು ಪ್ರಾಣಿಗಳು ಬೈಡೆನ್ ಚಿತ್ರವಿದ್ದ ಹಣ್ಣನ್ನೇ ಆಯ್ಕೆ ಮಾಡಿದ್ದರಿಂದ ಚುನಾವಣೆಯಲ್ಲಿ ಬೈಡೆನ್ ಅವರು ಗೆಲವು ಸಾಧಿಸಲಿದ್ದಾರೆ ಎಂದು ಊಹಿಸಲಾಗಿತ್ತು.
ಪ್ರಾಣಿಗಳು ನುಡಿದ ಭವಿಷ್ಯದಂತೆ ಬೈಡೆನ್ ಅಮೆರಿಕ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಒಟ್ಟು 538 ಮತಗಳ ಪೈಕಿ ಅಧ್ಯಕ್ಷ ಗಾದಿಗೇರಲು ಕನಿಷ್ಠ 270 ಎಲೆಕ್ಟ್ರೋಲ್ ಮತಗಳನ್ನು ಪಡೆಯುವ ಅಗತ್ಯವಿದ್ದು, ಜೋ ಬೈಡೆನ್ 290 ಮತಗಳೊಂದಿಗೆ ಭರ್ಜರಿ ಜಯ ಸಾಧಿಸಿದ್ದಾರೆ. ಹಾಲಿ ಅಧ್ಯಕ್ಷ ಟ್ರಂಪ್ 214 ಮತಗಳನ್ನು ಹಿನ್ನಡೆಯೊಂದಿಗೆ ಹೀನಾಯ ಸೋಲನ್ನು ಅನುಭವಿಸಿದ್ದಾರೆ. (ಏಜೆನ್ಸೀಸ್)
VIDEO| ಯಾರಾಗಲಿದ್ದಾರೆ ಮುಂದಿನ ಅಮೆರಿಕ ಅಧ್ಯಕ್ಷ? ಪ್ರಾಣಿಗಳ ಅಚ್ಚರಿಯ ಭವಿಷ್ಯ..!