ಬೆಂಗಳೂರು: ಈ ವರ್ಷದ ಮಾರ್ಚ್ನಲ್ಲಿ ಅವಳಿ ಮಕ್ಕಳಿಗೆ ಜನ್ಮ ನೀಡಿದರು ನಟಿ ಅಮೂಲ್ಯ. ಇಷ್ಟು ದಿನ ಮಕ್ಕಳ ಪಾಲನೆಯಲ್ಲಿ ತೊಡಗಿಸಿಕೊಂಡಿದ್ದ ಅವರು, ಆಗಾಗಲ ಮಕ್ಕಳ ಫೋಟೋ ಶೂಟ್ ಮಾಡಿಸಿ ಸೋಷಿಯಲ್ ಮೀಡಿಯಾ ಮೂಲಕ ಹಂಚಿಕೊಳ್ಳುತ್ತಲೇ ಇದ್ದರು.
ಇದನ್ನೂ ಓದಿ: ಚಿತ್ರ ವಿಮರ್ಶೆ: ದುಷ್ಟರ ವಿರುದ್ಧ ‘ರಾಣ’ನ ಹೋರಾಟ
ಎಷ್ಟೇ ತರಹವೇರಿ ಫೋಟೋಗಳನ್ನು ಹಂಚಿಕೊಂಡರೂ, ಅವರು ತಮ್ಮ ಮಕ್ಕಳ ಹೆಸರೇನೆಂದು ಬಹಿರಂಗಪಡಿಸಿರಲಿಲ್ಲ. ನಿಜ ಹೇಳಬೇಕೆಂದರೆ, ಮಕ್ಕಳ ನಾಮಕರಣವೇ ಆಗಿರಲಿಲ್ಲ. ಇತ್ತೀಚೆಗೆ ಅಮೂಲ್ಯ ಅವರ ಅವಳಿ ಮಕ್ಕಳ ನಾಮಕರಣವಾಗಿದ್ದು, ಮಕ್ಕಳಿಗೆ ಹೆಸರಿಡಲಾಗಿದೆ. ಅಂದಹಾಗೆ, ಮಕ್ಕಳ ಹೆಸರೇನು ಗೊತ್ತಾ? ಅಥರ್ವ ಹಾಗೂ ಅಧವ್.
ಗುರುವಾರ ನಡೆದ ನಾಮಕರಣ ಸಮಾರಂಭದಲ್ಲಿ ಅವಳಿ ಮಕ್ಕಳಿಗೆ ಅಥರ್ವ ಹಾಗೂ ಅಧವ್ ಎಂಬ ಹೆಸರುಗಳನ್ನು ಅಮೂಲ್ಯ ಇಟ್ಟಿದ್ದಾರೆ ಎಂದು ತಿಳಿದು ಬಂದಿದೆ. ಅಥರ್ವ ಎಂಬ ಹೆಸರಿಗೆ ಜ್ನಾನ ಎಂಬ ಅರ್ಥವಿದ್ದು, ಅಧವ್ಗೆ ದೇವರು ಎಂಬ ಅರ್ಥವಿದೆ. ಈ ಸಮಾರಂಭದಲ್ಲಿ ಚಂದನವನದ ಹಲವು ನಟ-ನಟಿಯರು ಭಾಗವಹಿಸುವುದರ ಜತೆಗೆ, ಕೆಲವು ರಾಜಕೀಯ ಮುಖಂಡರು ಸಹ ಇದ್ದರು.
ಇದನ್ನೂ ಓದಿ: ಚಿತ್ರ ವಿಮರ್ಶೆ: ‘ದಿಲ್ ಪಸಂದ್’ನಲ್ಲಿ ಸ್ವಲ್ಪ ನಗುವಿದೆ, ಸ್ವಲ್ಪ ಅಳುವಿದೆ
ಮದುವೆಯಾದ ಮೇಲೆ ಅಮೂಲ್ಯ ಅಭಿನಯದಿಂದ ದೂರವಿದ್ದರೂ, ಚಿತ್ರರಂಗದಿಂದ ದೂರವಾಗಿಲ್ಲ. ಆಗಾಗ ಸಿನಿಮಾದ ಸಮಾರಂಭಗಳು ಮತ್ತು ನಟ-ನಟಿಯರ ಪಾರ್ಟಿಗಳಲ್ಲಿ ಗಂಡನ ಜತೆಗೆ ಕಾಣಿಸಿಕೊಳ್ಳುವ ಅಮೂಲ್ಯ, ಚಿತ್ರರಂಗದ ಹಲವರ ಜತೆಗೆ ಆತ್ಮೀಯ ಒಡನಾಟ ಹೊಂದಿದ್ದಾರೆ. ಈ ವರ್ಷದ ಆರಂಭದಲ್ಲಿ ನಡೆದ ಅಮೂಲ್ಯ ಅವರ ಸೀಮಂತಕ್ಕೆ ಕನ್ನಡ ಚಿತ್ರರಂಗದ ಹಲವರು ನಟ-ನಟಿಯರು ಆಗಮಿಸಿ, ಅವರಿಗೆ ಶುಭ ಕೋರಿದ್ದರು. ಈಗ ನಾಮಕರಣದಲ್ಲೂ ಭಾಗಿಯಾದ ಸ್ಯಾಂಡಲ್ವುಡ್ ಸೆಲೆಬ್ರಿಟಿಗಳು ಅಥರ್ವ ಹಾಗೂ ಅಧವ್ಗೆ ಆಶೀರ್ವಾದ ಮಾಡಿದ್ದಾರೆ.