ಮುಂಬೈ: ಈಗಾಗಲೇ ಭಾರಿ ಕುತೂಹಲ ಸೃಷ್ಟಿಸಿರುವ, ಅದ್ದೂರಿಯಾಗಿ ನಿರ್ಮಾಣ ಆಗಿರುವ ಬಹುನಿರೀಕ್ಷಿತ ಸಿನಿಮಾ, ಅಕ್ಷಯ್ ಕುಮಾರ್ ಅಭಿನಯದ ‘ಲಕ್ಷ್ಮೀ ಬಾಂಬ್’ನ ಟೈಟಲ್ ಬದಲಾಗಿದೆ.
ರಾಘವ ಲಾರೆನ್ಸ್ ನಿರ್ದೇಶನ, ಅಕ್ಷಯ್ ಕುಮಾರ್ ಹಾಗೂ ಕಿಯಾರಾ ಆಡ್ವಾಣಿ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿರುವ ಈ ಸಿನಿಮಾ ಟೈಟಲ್ ಕಾರಣಕ್ಕೇ ಈಗಾಗಲೇ ಒಂದಷ್ಟು ಸದ್ದು ಮಾಡಿತ್ತು. ಇದೀಗ ಅದೇ ಟೈಟಲ್ ವಿಚಾರದಲ್ಲಿ ಮತ್ತೊಮ್ಮೆ ಸುದ್ದಿ ಆಗಲಾರಂಭಿಸಿದೆ.
ಹೊಸ ಬದಲಾವಣೆಯೊಂದರಲ್ಲಿ ಸಿನಿಮಾದ ಪರಿಷ್ಕೃತ ಶೀರ್ಷಿಕೆ ಬಹಿರಂಗವಾಗಿದ್ದು, ಚಿತ್ರಕ್ಕೆ ‘ಲಕ್ಷ್ಮೀ ಬಾಂಬ್’ ಬದಲು ‘ಲಕ್ಷ್ಮೀ’ ಎಂದಷ್ಟೇ ಟೈಟಲ್ ಇಡಲಾಗಿದೆ ಎಂಬ ಮಾಹಿತಿ ಹೊರಬಿದ್ದಿದೆ.
‘ಲಕ್ಷ್ಮೀ ಬಾಂಬ್’ ಎಂದಿರುವುದರಿಂದ ಲಕ್ಷ್ಮೀ ದೇವರಿಗೆ ಅವಮಾನ ಮಾಡಿದಂತೆ, ಇದರಿಂದ ಹಿಂದೂಗಳ ಧಾರ್ಮಿಕ ಭಾವನೆಗೆ ಧಕ್ಕೆ ಆಗುತ್ತದೆ ಎಂದು ಶ್ರೀ ರಜಪೂತ್ ಕರ್ಣಿ ಸೇನಾ ಈಗಾಗಲೇ ಆಕ್ಷೇಪ ವ್ಯಕ್ತಪಡಿಸಿತ್ತು. ಮಾತ್ರವಲ್ಲ ಈ ಸಂಬಂಧ ಲೀಗಲ್ ನೋಟಿಸ್ ಕೂಡ ರವಾನೆ ಮಾಡಿದ್ದರಿಂದ ಚಿತ್ರತಂಡ ಈ ಬದಲಾವಣೆ ಮಾಡಿಕೊಂಡಿದೆ. (ಏಜೆನ್ಸೀಸ್)