ಬೆಂಗಳೂರು: ಅರ್ಬಾಜ್ ಖಾನ್ ಜತೆಗೆ ‘ಮೈ ಜರೂರ್ ಆವುಂಗಾ’ ಸಿನಿಮಾ ಮೂಲಕ ಬಾಲಿವುಡ್ ಪ್ರವೇಶಿಸಿದ್ದ ಐಂದ್ರಿತಾ, ಅದಾದ ಬಳಿಕ ‘ದಿ ಕ್ಯಾಸಿನೊ’ ಎಂಬ ವೆಬ್ಸಿರೀಸ್ನಲ್ಲಿ ನಟಿಸಿದ್ದರು. ಇದೀಗ ಮತ್ತೊಂದು ಹಿಂದಿ ಚಿತ್ರದಲ್ಲಿ ಐಂದ್ರಿತಾ ಸದ್ದಿಲ್ಲದೆ ನಟಿಸಿದ್ದಾರೆ. ಹೆಸರು ‘ರಾವಣ್ ಲೀಲಾ’. ಅ.1ರಂದು ಈ ಚಿತ್ರವು ನೇರವಾಗಿ ಚಿತ್ರಮಂದಿರಗಳಲ್ಲೇ ಬಿಡುಗಡೆ ಆಗಲಿದೆ.
‘ಸ್ಕ್ಯಾಮ್ 1992’ ವೆಬ್ ಸರಣಿ ಮೂಲಕವೇ ಮನೆ ಮಾತಾಗಿರುವ ಪ್ರತೀಕ್ ಗಾಂಧಿ, ‘ರಾವಣ್ ಲೀಲಾ’ ಮೂಲಕ ದೊಡ್ಡ ಹೆಜ್ಜೆ ಇಟ್ಟಿದ್ದಾರೆ. ಈ ಮೊದಲು ‘ಲವ್ಯಾತ್ರಿ’, ‘ಮಿತ್ರೋಂ’ ಸೇರಿ ಹಲವು ಸಿನಿಮಾಗಳಲ್ಲಿ ಸಣ್ಣಪುಟ್ಟ ಪಾತ್ರಗಳಲ್ಲಿ ಪ್ರತೀಕ್ ನಟಿಸಿದ್ದರು. ಇದೀಗ, ‘ರಾವಣ್ ಲೀಲಾ’ದಲ್ಲಿ ನಾಯಕನಾಗಿ ಬಡ್ತಿ ಪಡೆದಿದ್ದಾರೆ. ಅವರಿಗಿಲ್ಲಿ ಐಂದ್ರಿತಾ ರೇ ಜೋಡಿಯಾಗಿದ್ದಾರೆ.
ಹಾರ್ದಿಕ್ ಗಜ್ಜರ್ ನಿರ್ದೇಶನದ ಈ ಸಿನಿಮಾ ಶೀರ್ಷಿಕೆಯೇ ಹೇಳುವಂತೆ ಲವ್ಸ್ಟೋರಿ ಕಥಾಹಂದರವಾದರೂ, ಬಿಡುಗಡೆ ಆಗಿರುವ ಫಸ್ಟ್ ಲುಕ್ನಲ್ಲಿ ರಾವಣನ ಅವತಾರದಲ್ಲಿಯೂ ಪ್ರತೀಕ್ ಕಾಣಿಸಿಕೊಂಡು ಕುತೂಹಲ ಮೂಡಿಸಿದ್ದಾರೆ.
ಇನ್ನು, ಕನ್ನಡದ ವಿಷಯಕ್ಕೆ ಬಂದರೆ, ‘ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’, ‘ಗರುಡ’ ಮತ್ತು ‘ಪ್ರೇಮಂ ಪೂಜ್ಯಂ’ ಚಿತ್ರಗಳಲ್ಲಿ ನಟಿಸಿರುವ ಐಂದ್ರಿತಾ, ಬಿಡುಗಡೆಗೆ ಎದುರು ನೋಡುತ್ತಿದ್ದಾರೆ.