ಬೆಂಗಳೂರು: ಇಂದು ಮುಂಜಾನೆ ತುಮಕೂರು ರಸ್ತೆ ಫ್ಲೈಓವರ್ ಮೇಲೆ ನಿತ್ರಾಣವಾಗಿ ಬಿದ್ದಿದ್ದ ವ್ಯಕ್ತಿಯನ್ನು ಆಸ್ಪತ್ರೆಗೆ ಸೇರಿಸಲು ಪರದಾಡಿದ ಪೊಲೀಸರಿಗೂ ಕೊನೆಯಲ್ಲಿ ಶಾಕ್ ಕಾದಿತ್ತು!
ಕರೊನಾ ಭೀತಿ ಹಿನ್ನೆಲೆ ಫ್ಲೈಓವರ್ ಮೇಲೆ ಬಿದ್ದು ನರಳಾಡುತ್ತಿದ್ದ ವ್ಯಕ್ತಿಯ ಹತ್ತಿರ ಯಾರೊಬ್ಬರೂ ಸುಳಿದಿರಲಿಲ್ಲ. ಸ್ಥಳಕ್ಕೆ ಬಂದ ಪೀಣ್ಯಾ ಪೊಲೀಸರು ಆ ವ್ಯಕ್ತಿ ಬಳಿ ಹೊಯ್ಸಳ ವಾಹನವನ್ನು ಅಡ್ಡಲಾಗಿ ನಿಲ್ಲಿಸಿ ಕಾವಲಿದ್ದರು. ಆಂಬುಲೆನ್ಸ್ಗಾಗಿ ಮೂರು ತಾಸು ಕಾದರು. ಈ ವ್ಯಕ್ತಿ ತೀವ್ರ ಜ್ವರದಿಂದ ಬಳಲಿ ಕುಸಿದು ಬಿದ್ದಿದ್ದಾನೆ ಎಂದೇ ಪೊಲೀಸರು ಭಾವಿಸಿದ್ದರು. ಅವನನ್ನು ಆಸ್ಪತ್ರೆಗೆ ಸೇರಿಸಲು ಸಾಕಷ್ಟು ಬಾರಿ ಆಂಬುಲೆನ್ಸ್ಗಾಗಿ ಕರೆ ಮಾಡಿ ಸ್ಥಳದಲ್ಲೇ ಮೊಕ್ಕಾಂ ಹೂಡಿದ್ದರು. ತಡವಾಗಿ ಆಂಬುಲೆನ್ಸ್ ಬಂದರೂ ಆ ಬಳಿಕ ಗೊತ್ತಾಯ್ತು ಆ ವ್ಯಕ್ತಿಯ ಮರ್ಮ. ಇದನ್ನೂ ಓದಿರಿ ಗಂಡ-ಹೆಂಡ್ತಿ ಸಮಸ್ಯೆ ಬಗೆಹರಿಸಿ ಅಂದ್ರೆ ಪಲ್ಲಂಗಕ್ಕೆ ಕರೀತಾರೆ!
ಫ್ಲೈಓವರ್ ಮೇಲೆ ಬಿದ್ದಿದ್ದ ವ್ಯಕ್ತಿಯ ದೇಹದ ಉಷ್ಣಾಂಶ ಹೆಚ್ಚಿತ್ತು. ಹಾಗಾಗಿ ಆತ ತೀವ್ರ ಜ್ವರದಿಂದ ಬಳಲುತ್ತಿದ್ದಾನೆ ಎಂದು ಆತನ ರಕ್ಷಣೆಗಾಗಿ ಪೊಲೀಸರು ಕಾದಿದ್ದರು.
ಆಂಬುಲೆನ್ಸ್ ಸ್ಥಳಕ್ಕೆ ಬಂದಾಗ ಎಚ್ಚರಗೊಂಡ ಆತ, ‘ಅಯ್ಯೋ ಸಾರ್, ನನಗೆ ಯಾವ ಜ್ವರವೂ ಇಲ್ಲ. ರಾತ್ರಿಯೇ ಕಂಠಪೂರ್ತಿ ಕುಡಿದು ಇಲ್ಲೇ ಮಲಗಿಬಿಟ್ಟೆ. ನನ್ನನ್ನು ಬಿಟ್ಟುಬಿಡಿ…’ ಎಂದು ಗೋಗರೆದ. ಆತ ಯಾರು? ಎಲ್ಲಿಯವ? ಎಂಬ ಮಾಹಿತಿ ಇಲ್ಲ.