ಲಡಾಕ್: ಪ್ರಪಂಚವೇ ಭಯದಿಂದ ಮನೆಯೊಳಗೆ ಕೂರುವಂತೆ ಮಾಡಿರುವ ಕರೊನಾ ವೈರಸ್ ಭಾರತದಲ್ಲಿ ತನ್ನ ವ್ಯಾಪ್ತಿಯನ್ನು ದಿನದಿಂದ ದಿನಕ್ಕೆ ಹೆಚ್ಚಿಸಿಕೊಳ್ಳುತ್ತಿದೆ. ಭಾರತೀಯ ಸೇನಗೂ ಸಹ ಕರೊನಾ ಸೋಂಕು ಕಾಲಿಟ್ಟಿದ್ದು ಯೋಧನೊಬ್ಬನಲ್ಲಿ ಕರೊನಾ ವೈರಸ್ ಇರುವುದು ಧೃಡವಾಗಿದೆ.
ಲಡಾಕ್ನ ಮೂಲದ ಲ್ಯಾನ್ಸ್ ನಾಯಕ್ ಹೆಸರಿನ ಯೋಧನ ತಂದೆ ಇರಾನ್ಗೆ ತೆರಳಿದ್ದು ಫೆ.27ರಂದು ಭಾರತಕ್ಕೆ ಮರಳಿದ್ದಾರೆ. ಫೆ.29ರಂದು ತಂದೆಯಲ್ಲಿ ಕರೊನಾ ರೋಗ ಲಕ್ಷಣಗಳು ಕಂಡು ಬಂದಿದ್ದು ಆತನನ್ನು ಪ್ರತ್ಯೇಕಿಸಿಡಲಾಗಿದೆ. ಮಾರ್ಚ್ 6ರಂದು ಅವರ ವೈದ್ಯಕೀಯ ವರದಿ ಬಂದಿದ್ದು ಅದರಲ್ಲಿ ಅವರಿಗೆ ಕರೊನಾ ಇರುವುದು ಧೃಡವಾಗಿದೆ.
ಲಡಾಕ್ ಸ್ಕೌಟ್ಸ್ನಲ್ಲಿ ಸೇವೆ ಸಲ್ಲಿಸುತ್ತಿರುವ ಲ್ಯಾನ್ಸ್ ನಾಯಕ್ ಫೆ.27ರಿಂದ ಮಾರ್ಚ್ 1ರವರೆಗೆ ರಜೆಯಲ್ಲಿದ್ದರು. ಮನೆಯಲ್ಲಿ ತಂದೆ, ಹೆಂಡತಿ, ಮಕ್ಕಳು ಮತ್ತು ತಂಗಿಯೊಂದಿಗೆ ಸಮಯ ಕಳೆದು ಯೋಧ ಮಾರ್ಚ್ 2ರಂದು ಕೆಲಸಕ್ಕೆ ಹಾಜರಾಗಿದ್ದಾರೆ. ಕೆಲಸಕ್ಕೆ ಹಾಜರಾದ ನಂತರವೂ ಆತ ಪ್ರತ್ಯೇಕ ಕೋಣೆಯಲ್ಲಿದ್ದ ತನ್ನ ತಂದೆಯನ್ನು ಆಗಾಗ ನೋಡಿ ಬರುತ್ತಿದ್ದರು ಎನ್ನಲಾಗಿದೆ.
ಮಾರ್ಚ್ 6ರಂದು ಲ್ಯಾನ್ಸ್ನ ತಂದೆಯಲ್ಲಿ ಕರೊನಾ ಧೃಡವಾಗುತ್ತಿದ್ದಂತೆ ಲ್ಯಾನ್ಸ್ನನ್ನು ಪ್ರತ್ಯೇಕಿಸಿಡಲಾಗಿದೆ. ಆತನ ವೈದ್ಯಕೀಯ ವರದಿ ಸೋಮವಾರದಂದು ಬಂದಿದ್ದು ಅದರಲ್ಲಿ ಆತನಿಗೆ ಕರೊನಾ ಸೋಂಕು ತಗುಲಿರುವುದು ಧೃಡವಾಗಿದೆ. ಇದೀಗ ಎಸ್ಎನ್ಎಮ್ ಆಸ್ಪತ್ರೆಯಲ್ಲಿ ಆತನಿಗೆ ಮತ್ತು ಆತನ ತಂದೆಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಮುಂಜಾಗ್ರತಾ ಕ್ರಮವಾಗಿ ಯೋಧನ ಹೆಂಡತಿ ಮಕ್ಕಳು ಮತ್ತು ತಂಗಿಯನ್ನೂ ಸಹ ಪ್ರತ್ಯೇಕಿಸಿಡಲಾಗಿದೆ.
ಯೋಧರಿಗೆ ಮಾರ್ಚ್ 23ರಿಂದ ಪ್ರಾರಂಭವಾಗಬೇಕಿದ್ದ ತರಬೇತಿ ಕೋರ್ಸ್ಗಳನ್ನು ಕರೊನಾ ಹರಡುವಿಕೆ ತಡೆಗಟ್ಟುವ ಸಲುವಾಗಿ ಮುಂದೂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಹಾಗೆಯೇ ಅನಿವಾರ್ಯವಲ್ಲದ ತರಬೇತಿ, ಸಮಾವೇಶ ಮತ್ತು ಸಿಬ್ಬಂದಿಗಳ ಚಲನೆಯನ್ನು ರದ್ದುಗೊಳಿಸಿದಿರುವುದಾಗಿ ಅವರು ತಿಳಿಸಿದ್ದಾರೆ. (ಏಜೆನ್ಸೀಸ್)
VIDEO: ಮಧ್ಯಪ್ರದೇಶ ಶಾಸಕರನ್ನು ಭೇಟಿ ಮಾಡಲೆತ್ನಿಸಿದ ದಿಗ್ವಿಜಯ ಸಿಂಗ್ ಬಂಧನ