ಮುಂಬೈ: ಸತತ ಮೂರನೇ ದಿನವೂ ಭಾರತದ ಷೇರುಪೇಟೆಯಲ್ಲಿ ತಲ್ಲಣ ಮುಂದುವರಿದಿತ್ತು. ಶುಕ್ರವಾರ ಬಿಎಸ್ಇ ಸೆನ್ಸೆಕ್ಸ್, ಎನ್ಎಸ್ಇ ನಿಫ್ಟಿ ಆರಂಭಿಕ ಚೇತರಿಕೆ ತೋರಿದರೂ ಬಳಿಕ ಜಾಗತಿಕ ವಿದ್ಯಮಾನಗಳಿಗೆ ಅನುಗುಣವಾಗಿ ಕುಸಿತ ಕಂಡಿದೆ. ಸೆನ್ಸೆಕ್ಸ್ ಬೆಳಗ್ಗೆ 60,000ದ ಗಡಿದಾಟಿದರೂ, ಬಳಿಕ 677.77 ಅಂಶ (1.13%) ಕುಸಿದು 59,306.93 ಅಂಶದಲ್ಲಿ ದಿನದ ವಹಿವಾಟು ಮುಗಿಸಿದೆ. ಇದೇ ರೀತಿ ನಿಫ್ಟಿ 185.60 ಅಂಶ (1.04%) ಕುಸಿದು 17,671.65 ಅಂಶದಲ್ಲಿ ದಿನದ ವಹಿವಾಟು ಕೊನೆಗೊಳಿಸಿದೆ.
ಐಆರ್ಸಿಟಿ ಷೇರು ಮೌಲ್ಯ ಕುಸಿತ: ಐಆರ್ಸಿಟಿಯು ಕನ್ವಿನೆನ್ಸ್ ಫೀಸ್ ಮೂಲಕ ಸಂಗ್ರಹಿಸುತ್ತಿದ್ದ ಆದಾಯದಲ್ಲಿ ಶೇಕಡ 50 ಕೇಂದ್ರ ಸರ್ಕಾರಕ್ಕೆ ನೀಡಬೇಕೆಂಬ ನಿರ್ಧಾರವನ್ನು ರೈಲ್ವೆ ಸಚಿವಾಲಯ ತೆಗೆದುಕೊಂಡಿತ್ತು. ಇದರಿಂದ ಐಆರ್ಸಿಟಿ ಷೇರು ಮೌಲ್ಯ 820 ರೂಪಾಯಿಯಲ್ಲಿದ್ದುದು ದಿಢೀರ್ 685 ರೂಪಾಯಿಗೆ ಕುಸಿದಿತ್ತು. ಬಳಿಕ ಸರ್ಕಾರ ಆದೇಶ ಹಿಂಪಡೆದ ಕಾರಣ ಷೇರುಮೌಲ್ಯ ಚೇತರಿಕೆ ಕಂಡು 905ರ ಗಡಿದಾಟಿತ್ತು.
ಚಿನ್ನ, ಬೆಳ್ಳಿ ಕುಸಿತ: ಚಿನ್ನದ ದರ 10 ಗ್ರಾಮಿಗೆ 271 ರೂಪಾಯಿ ಕುಸಿದು 46,887 ರೂಪಾಯಿ ಆಗಿತ್ತು. ಬೆಳ್ಳಿಯ ದರ ಒಂದು ಕಿಲೋಕ್ಕೆ 687 ರೂಪಾಯಿ ಕುಸಿದು 63,210 ರೂಪಾಯಿ ಆಗಿತ್ತು.