ಹಾವೇರಿ: ಬರೋಬ್ಬರಿ 42 ದಿನಗಳ ನಂತರ ಮದ್ಯದಂಗಡಿಗಳು ಆರಂಭಗೊಂಡಿದ್ದು, ಮೊದಲ ದಿನ ಸೋಮವಾರ ಜಿಲ್ಲೆಯಲ್ಲಿ ಭರ್ಜರಿ ಮದ್ಯ ಮಾರಾಟ ನಡೆದಿದೆ.
ಜಿಲ್ಲೆಯಲ್ಲಿ ಸಿಎಲ್-2 ಹಾಗೂ ಎಂಎಸ್ಐಎಲ್ ಸೇರಿ ಒಟ್ಟು 104 ಮಳಿಗೆಗಳಲ್ಲಿ ಸೋಮವಾರದಿಂದ ಮದ್ಯ ಮಾರಾಟ ಆರಂಭಗೊಂಡಿತ್ತು. ಮೊದಲ ದಿನ 2,65,35,528 ರೂ. ಮೌಲ್ಯದ 8,292ಲೀಟರ್ ಐಎಂಎಲ್ ಮದ್ಯ, 28,32,883 ರೂ. ಮೌಲ್ಯದ 1,889 ಲೀಟರ್ ಬಿಯರ್ ಮಾರಾಟವಾಗಿದೆ. ಜಿಲ್ಲೆಯಲ್ಲಿ ಈ ಮೊದಲು ದಿನವೊಂದಕ್ಕೆ ಮಾರಾಟವಾಗುತ್ತಿದ್ದ ಮದ್ಯಕ್ಕಿಂತ ಸೋಮವಾರ ಅಂದಾಜು ಮೂರುಪಟ್ಟು ಹೆಚ್ಚು ಮಾರಾಟವಾಗಿದೆ.
ಸ್ಟಾಕ್ ಖಾಲಿ…: ಜಿಲ್ಲೆಯ ಬಹುತೇಕ ಅಂಗಡಿಗಳಲ್ಲಿ ಕೆಲ ಬ್ರ್ಯಾಂಡ್ಗಳ ಮದ್ಯ ಸೋಮವಾರವೇ ಖಾಲಿಯಾಗಿದೆ. ಅಲ್ಪಸ್ವಲ್ಪ ಉಳಿದ ಮದ್ಯವನ್ನು ಮಂಗಳವಾರ ಗ್ರಾಹಕರು ಅನಿವಾರ್ಯವಾಗಿ ಖರೀದಿಸಿದರು. ಮಂಗಳವಾರ ಮದ್ಯದಂಗಡಿಗಳ ಮುಂದೆ ಸರದಿ ಸಾಲು ಅಷ್ಟಾಗಿ ಕಂಡು ಬರಲಿಲ್ಲ.
ಜಿಲ್ಲೆಯಲ್ಲಿ ಮದ್ಯದಂಗಡಿಗಳ ಮಾಲೀಕರು ಬೇಡಿಕೆ ಸಲ್ಲಿಸಿದಂತೆ ಕೆಎಸ್ಬಿಸಿಎಲ್ ಡಿಪೋದಿಂದ ಮದ್ಯ ಪೂರೈಸಲಾಗುತ್ತಿದೆ. ಮುಂದಿನ 3ರಿಂದ 4ದಿನಕ್ಕಾಗುವಷ್ಟು ಸ್ಟಾಕ್ ಇದೆ. ಹೊಸ ಬೇಡಿಕೆಗೆ ಹೊಸ ದರವನ್ನು ನಿಗದಿಗೊಳಿಸಲಾಗಿದೆ. ಕೆಲ ತಾಂತ್ರಿಕ ತೊಂದರೆಯಿಂದ ಪೂರೈಕೆಗೆ ಅಡ್ಡಿಯಾಗಿತ್ತು. ಮಂಗಳವಾರದಿಂದ ಆದ್ಯತೆಯ ಮೇಲೆ ಮದ್ಯ ಪೂರೈಸಲಾಗಿದ್ದು, ಎಲ್ಲಿಯೂ ಕೊರತೆ ಕಂಡು ಬಂದಿಲ್ಲ.
| ಡಾ. ಮಹಾದೇವಿಬಾಯಿ, ಅಬಕಾರಿ ಇಲಾಖೆ ಉಪ ಆಯುಕ್ತೆ.