ಮುಂಡರಗಿ: ತಾಲೂಕಿನ ತುಂಗಭದ್ರಾ ನದಿ ನೀರಿನ ಹರಿವು ಮೂರು ದಿನಗಳಿಂದ ಇಳಿಮುಖವಾಗುತ್ತಿದೆ. ಹಮ್ಮಿಗಿ ಬಳಿಯ ಸಿಂಗಟಾಲೂರ ಬ್ಯಾರೇಜ್ನ 26 ಗೇಟ್ಗಳ ಪೈಕಿ 8 ಗೇಟ್ಗಳ ಮೂಲಕ ಶುಕ್ರವಾರ 29,452 ಕ್ಯೂಸೆಕ್ ನೀರನ್ನು ನದಿಗೆ ಬಿಡಲಾಗಿದೆ.
ಮಲೆನಾಡಿನ ವಿವಿಧೆಡೆ ಸುರಿದ ಮಳೆಯಿಂದಾಗಿ ತುಂಗಾ ಹಾಗೂ ಭದ್ರಾ ಜಲಾಶಯದಿಂದ ನದಿಗೆ ಅಪಾರ ಪ್ರಮಾಣದಲ್ಲಿ ನೀರು ಹರಿದು ಬಂದಿತ್ತು. ಹೀಗಾಗಿ ಸೆ. 22ರಂದು 1,07,570 ಕ್ಯೂಸೆಕ್ ನೀರನ್ನು ಸಿಂಗಟಾಲೂರ ಬ್ಯಾರೇಜ್ನಿಂದ ನದಿಗೆ ಹರಿಬಿಡಲಾಗಿತ್ತು. ಸೆ.23ರಿಂದ ನದಿ ನೀರಿನ ಹರಿವು ಇಳಿಮುಖವಾಗುತ್ತ್ತ ಬಂದಿದ್ದು ಸೆ.23ರಂದು 59,752 ಕ್ಯೂಸೆಕ್ ನೀರು, ಸೆ. 24ರಂದು 38,245 ಕ್ಯೂಸೆಕ್ ನೀರು ಹಾಗೂ ಸೆ.25 ರಂದು 29,452 ಕ್ಯೂಸೆಕ್ ನೀರನ್ನು ಬ್ಯಾರೇಜ್ನಿಂದ ನದಿಗೆ ಹರಿಬಿಡಲಾಗಿದೆ.
ತುಂಗಭದ್ರಾ ನದಿಗೆ ಅಪಾರ ಪ್ರಮಾಣದಲ್ಲಿ ನೀರು ಹರಿದು ಬಂದಂಥ ಸಂದರ್ಭದಲ್ಲಿ ನದಿ ಭಾಗದ ಗ್ರಾಮಸ್ಥರು ಪ್ರವಾಹ ಸಮಸ್ಯೆ ಎದುರಿಸುವ ಭೀತಿಯಲ್ಲಿದ್ದರು. ಈಗ ನೀರಿನ ಹರಿವು ಇಳಿಮುಖವಾಗಿದ್ದರಿಂದ ನಿಟ್ಟುಸಿರು ಬಿಡುವಂತಾಗಿದೆ.