ಲಕ್ಷ್ಮೇಶ್ವರ: ತಾಲೂಕಿನ ಬಾಲೇಹೊಸೂರ ಗ್ರಾಮದಲ್ಲಿ ಮತದಾರರ ಪಟ್ಟಿಯಲ್ಲಿ ಗೋಲ್‍ಮಾಲ್ ಆಗಿರುವ ಸುದ್ದಿ ಈಗ ಎಲ್ಲೆಡೆ ಚರ್ಚೆಯಾಗುತ್ತಿದೆ.
ಮುಂಬರುವ ಗ್ರಾಮ ಪಂಚಾಯಿತಿ ಚುನಾವಣೆ ಹಿನ್ನೆಲೆಯಲ್ಲಿ ಪ್ರಭಾವಿಗಳ ಮತ್ತು ಅಧಿಕಾರಿಗಳ ಕೈಚಳಕದಿಂದಾಗಿ ಗ್ರಾಮದಲ್ಲಿನ ಅಂದಾಜು 86 ಮತದಾರರ ಹೆಸರು ವಾರ್ಡ್ನಿಂದ ವಾರ್ಡ್ಗೆ ಬದಲಾವಣೆಯಾಗಿದೆ. ಆದರೆ, ಚುನಾವಣೆ ಆಯೋಗದ ನಿಯಮದ ಪ್ರಕಾರ ಯಾವುದೇ ಮತದಾರ ಪಟ್ಟಿಯಲ್ಲಿ ಹೆಸರು ಸೇರ್ಪಡೆ, ತಿದ್ದುಪಡಿ, ಬದಲಾವಣೆ ಮಾಡಿಸಲು ನಿಗದಿತ ಅರ್ಜಿ ಭರ್ತಿ ಮಾಡಿ ಸೂಕ್ತ ದಾಖಲೆಗಳೊಂದಿಗೆ ಆಯಾ ಭಾಗದ ಬಿಎಲ್ಒಗಳಿಗೆ ಅಥವಾ ತಹಸೀಲ್ದಾರ್ ಕಚೇರಿಗೆ ಸಲ್ಲಿಸಬೇಕು. ಆಗಲೂ ಸಂಬಂಧಪಟ್ಟ ಚುನಾವಣೆ ಅಧಿಕಾರಿಗಳು ಎಲ್ಲವನ್ನೂ ಪರಿಶೀಲನೆ ನಡೆಸಿದ ಬಳಿಕವೇ ಅರ್ಜಿ ಮಾನ್ಯವಾಗುತ್ತದೆ. ಆದರೆ, ಇಲ್ಲಿ ಎಲ್ಲ ನಿಯಮಗಳನ್ನು ಗಾಳಿಗೆ ತೂರಿ ಮತದಾರರ ಪಟ್ಟಿಯಲ್ಲಿ ಹೆಸರುಗಳು ವರ್ಗಾವಣೆಯಾಗಿರುವುದು ಹಲವು ಅನುಮಾನಕ್ಕೆ ಕಾರಣವಾಗಿದೆ.
ಗ್ರಾಮದಲ್ಲಿ ಒಟ್ಟು 5 ವಾರ್ಡ್ಗಳಿವೆ. ಬಹುತೇಕ ಮತದಾರರ ಹೆಸರುಗಳು 5ನೇ ವಾರ್ಡ್ಗೆ ವರ್ಗಾವಣೆಗೊಂಡಿರುವುದು ಗಮನಾರ್ಹ. ಹೆಸರು ವರ್ಗಾವಣೆಯಾದ ಬಗ್ಗೆ ಗಮನಕ್ಕೆ ಬಂದಿರುವ ಮತದಾರರು, ನಾವು ವರ್ಗಾವಣೆ ಮಾಡುವಂತೆ ಯಾವುದೇ ಅರ್ಜಿ ಸಲ್ಲಿಸಿಲ್ಲ ಮತ್ತು ನಮಗೆ ಅವಶ್ಯಕತೆಯೂ ಇರಲಿಲ್ಲ ಎನ್ನುತ್ತಾರೆ.
ಈ ಕುರಿತು 2ನೇ ವಾರ್ಡ್ನ ಮತದಾರ ಮುತ್ತಣ್ಣ ನಾವಿ ಪ್ರತಿಕ್ರಿಯಿಸಿ, ‘ಮತದಾರರ ಗುರುತಿನ ಪತ್ರ, ರೇಷನ್ಕಾರ್ಡ್, ರಹವಾಸಿ ಪತ್ರದಲ್ಲೂ 2ನೇ ವಾರ್ಡ್ ನಿವಾಸಿಗಳೆಂದೇ ದಾಖಲೆಗಳಿವೆ. ಮತದಾರರ ವರ್ಗಾವಣೆ ಮಾಡುವ ಅವಶ್ಯಕತೆ ನಮಗಿಲ್ಲ. ನಮ್ಮ ಗಮನಕ್ಕೆ ಬರದೇ 5ನೇ ವಾರ್ಡ್ನ ಮತದಾರರ ಪಟ್ಟಿಯಲ್ಲಿ ನನ್ನ ಮತ್ತು ಕುಟುಂಬದ ಸದಸ್ಯರ ಹೆಸರುಗಳನ್ನು ಸೇರಿಸಲಾಗಿದೆ. ಈ ವಿಷಯವನ್ನು ತಹಸೀಲ್ದಾರರ ಗಮನಕ್ಕೆ ತಂದಿದ್ದು, ಮೊದಲಿನಂತೆ 2ನೇ ವಾರ್ಡ್ಗೆ ಸೇರಿಸಲು ಕೋರಿದ್ದೇವೆ’ ಎಂದರು.
ಬಾಲೇಹೊಸೂರ ಗ್ರಾಮದ ಮತದಾರರ ಪಟ್ಟಿಯ ಭಾಗ ಸಂಖ್ಯೆ 240ರಲ್ಲಿ 47 ಪುರುಷ ಮತ್ತು 39 ಮಹಿಳಾ ಮತದಾರರ ಹೆಸರುಗಳು ಬೇರೆ ವಾರ್ಡ್ಗೆ ಸೇರ್ಪಡೆಯಾದ ವಿಷಯ ಗಮನಕ್ಕೆ ಬಂದಿದೆ. ಈ ಬಗ್ಗೆ ಕೂಲಂಕಷವಾಗಿ ಪರಿಶೀಲಿಸಲಾಗುವುದು. ತಪ್ಪು ಎಸಗಿದವರ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು. ಒಂದು ವಾರದೊಳಗಾಗಿ ಮತದಾರ ಪಟ್ಟಿಯಲ್ಲಾದ ವ್ಯತ್ಯಾಸ ಸರಿಪಡಿಸಲಾಗುವುದು.
|ಯಲ್ಲಪ್ಪ ಗೋಣೆಣ್ಣನವರ, ತಹಸೀಲ್ದಾರ್ ಶಿರಹಟ್ಟಿ
ಮತದಾರರ ಪಟ್ಟಿಯಲ್ಲಿನ ಹೆಸರುಗಳು ಬದಲಾವಣೆಯಾದ ಬಗ್ಗೆ ಗಮನಕ್ಕೆ ಬಂದಿದೆ. ಇದರಲ್ಲಿ ನಮ್ಮ ಪಾತ್ರವಿಲ್ಲ. ಆದರೆ, ಮತದಾರರು ತಮ್ಮ ಹೆಸರು ಬೇರೆಡೆ ವರ್ಗಾವಣೆಯಾಗಿರುವ ಬಗ್ಗೆ ಕೇಳುವ ಪ್ರಶ್ನೆಗೆ ನಾವು ಉತ್ತರಿಸಲು ಅಸಹಾಯಕರಾಗಿದ್ದೇವೆ.
| ವಾರ್ಡ್ಗಳ ಬಿಎಲ್ಒಗಳು