ಹುಬ್ಬಳ್ಳಿ: ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಗ್ರಾಹಕ ಮಿತ್ರನಾಗಿ ಕಾರ್ಯ ನಿರ್ವಹಿಸುವ ಹ್ಯೂಮನೈಡ್(ಮನುಷ್ಯ ಸಂಭಾಷಣೆ ಅನುಕರಿಸಬಲ್ಲ) ರೋಬಾಟ್ ಅನ್ನು ಹುಬ್ಬಳ್ಳಿಯ ಕೆಎಲ್ಇ ತಾಂತ್ರಿಕ ವಿಶ್ವ ವಿದ್ಯಾಲಯದ ಅಟೋಮೇಷನ್ ಅಂಡ್ ರೋಬೋಟಿಕ್ಸ್ ವಿಭಾಗದ ವಿದ್ಯಾರ್ಥಿಗಳು ಅಭಿವೃದ್ಧಿಪಡಿಸಿದ್ದಾರೆ.
ಅಗ್ರಣೀಯ ಬ್ಯಾಂಕ್ವೊಂದರ ಪ್ರಾಯೋಜಕತ್ವ ಹಾಗೂ ಬೇಡಿಕೆಯ ಮೇರೆಗೆ ರೋಬೋಟ್ ಕಾರ್ಯನಿರ್ವಹಣೆ ವ್ಯವಸ್ಥೆಯನ್ನು ಯಶಸ್ವಿಯಾಗಿ ಅಭಿವೃದ್ಧಿಪಡಿಸಲಾಗಿದೆ ಎಂದು ವಿಭಾಗದ ಮುಖ್ಯಸ್ಥ ಪ್ರೊ. ಅರುಣ ಗಿರಿಯಾಪುರ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. ಒಡಂಬಡಿಕೆಯ ಪ್ರಕಾರ ಬ್ಯಾಂಕ್ ಹೆಸರು ಬಹಿರಂಗಪಡಿಸುತ್ತಿಲ್ಲ ಎಂದರು.
‘ಮಾಯಾ’ ಎಂಬ ಪ್ರಾಜೆಕ್ಟ್ನಡಿ 8 ತಿಂಗಳ ಅವಧಿಯಲ್ಲಿ ಪೂರ್ಣಗೊಳಿಸಲಾಗಿದೆ. ಬ್ಯಾಂಕಿಗೆ ಆಗಮಿಸುವ ಗ್ರಾಹಕನೊಂದಿಗೆ ಭಾರತದ ಯಾವುದೇ ಭಾಷೆಯಲ್ಲಿ ಸಂಭಾಷಣೆ ನಡೆಸಬಲ್ಲದು. ಬ್ಯಾಂಕಿನ ಸಾಲ ಸೌಲಭ್ಯ, ಬಡ್ಡಿದರ, ಇತ್ಯಾದಿ ಮಾಹಿತಿಗಳನ್ನು ನೀಡಬಲ್ಲದು. ಖಾತೆ ತೆರೆಯುವಿಕೆ, ವಹಿವಾಟು, ಇತ್ಯಾದಿ ಕೌಂಟರ್ಗಳಿಗೆ ತೆರಳಲು ಗ್ರಾಹಕರಿಗೆ ಮಾರ್ಗದರ್ಶನ ಮಾಡುತ್ತದೆ. ಗಣ್ಯ ಮತ್ತು ಅತಿ ಗಣ್ಯ ಗ್ರಾಹಕರನ್ನು ಗುರುತಿಸಬಲ್ಲದು. ಚಹರೆಯಿಂದಲೇ ಗ್ರಾಹಕರನ್ನು ಗುರುತಿಸುವಿಕೆ, ಚಾಟ್ ಬೂಟ್ ವ್ಯವಸ್ಥೆಯನ್ನು ಹೊಂದಿದೆ ಎಂದು ವಿವರಿಸಿದರು.
ಇದು ಬ್ಯಾಟರಿ ಮೂಲಕ ಕಾರ್ಯನಿರ್ವಹಿಸುತ್ತದೆ. ಒಮ್ಮೆ ಚಾರ್ಜ್ ಮಾಡಿದರೆ 8-10 ತಾಸು ಬಳಕೆಯಲ್ಲಿ ಇರುತ್ತದೆ. ಚಾರ್ಜಿಂಗ್ ಕಡಿಮೆಯಾದರೆ ಸ್ವಯಂಚಾಲಿತವಾಗಿ ಡಾಕಿಂಗ್ ಪಾಯಿಂಟ್ಗೆ ತೆರಳಿ ಚಾರ್ಜ್ ಮಾಡಿಕೊಳ್ಳುತ್ತದೆ. ವಿದ್ಯಾರ್ಥಿಗಳಿಗೆ ಇದು ವಿಶಿಷ್ಟ ಅನುಭವ. ಸಂಶೋಧನೆ ಸಹಾಯಕರಾದ ಅಭಿಜಿತ್ ಸಂಪತ್ಕೃಷ್ಣ, ಕಾರ್ತಿಕ ಲಕಮನಹಳ್ಳಿ, ವಿದ್ಯಾರ್ಥಿಗಳಾದ ಪೃಥ್ವಿ ದೇಶಪಾಂಡೆ ಹಾಗೂ ಆಲ್ವಿನ್ ಎಂ. ಈ ಪ್ರಾಜೆಕ್ಟ್ನಲ್ಲಿ ಭಾಗಿಯಾಗಿದ್ದಾರೆ. ಸಹಾಯಕ ಪ್ರಾಧ್ಯಾಪಕರಾದ ಅಶ್ವಿನಿ ಜಿ.ಕೆ. ಹಾಗೂ ಶ್ರೀಧರ ದೊಡಮನಿ ನೆರವಾಗಿದ್ದಾರೆ ಎಂದು ಹೇಳಿದರು.
ಬ್ಯಾಂಕಿನ 5 ಲಕ್ಷ ರೂ. ಪ್ರಾಯೋಜಕತ್ವದಲ್ಲಿ ರೋಬಾಟ್ ಕಾರ್ಯನಿರ್ವಹಣೆ ವ್ಯವಸ್ಥೆಯನ್ನು ಅಭಿವೃದ್ಧಿ ಪಡಿಸಿದ್ದೇವೆ. ಬ್ಯಾಂಕ್ನವರು ಈ ಪ್ರಾಜೆಕ್ಟ್ಗಾಗಿ ಮೊದಲಿಗೆ ಮುಂಬೈ ಐಐಟಿಯನ್ನು ಸಂರ್ಪಸಿದ್ದರು. ಅಲ್ಲಿ ಕಾರ್ಯನಿರ್ವಹಿಸುತ್ತಿರುವ ಪ್ರಾಧ್ಯಾಪಕ (ಈ ಹಿಂದೆ ನಮ್ಮಲ್ಲಿ ಪ್ರಾಧ್ಯಾಪಕರಾಗಿದ್ದರು)ರೊಬ್ಬರ ಶಿಫಾರಸಿನ ಮೇರೆಗೆ ಈ ಪ್ರಾಜೆಕ್ಟ್ ನಮಗೆ ಲಭ್ಯವಾಗಿತ್ತು. ಅದನ್ನು ನಾವು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದೇವೆ. ಸದ್ಯದಲ್ಲೇ ಬ್ಯಾಂಕಿಗೆ ರೋಬಾಟ್ ಹಸ್ತಾಂತರಿಸಲಿದ್ದೇವೆ ಎಂದು ತಿಳಿಸಿದರು.
ಈ ಹಿಂದೆ ವಿಆರ್ಎಲ್ ಸಮೂಹ ಸಂಸ್ಥೆಗೆ 4 ಪೇಂಟಿಂಗ್ ರೋಬಾಟ್ ಹಾಗೂ 1 ವೆಲ್ಡಿಂಗ್ ರೋಬಾಟ್ ಅಭಿವೃದ್ಧಿ ಪಡಿಸಿಕೊಟ್ಟಿದ್ದೆವು ಎಂದು ಅರುಣ ಗಿರಿಯಾಪುರ ಹೇಳಿದರು.