ಕಾರವಾರ: ಬಸ್ ತಂಗುದಾಣ ತುಂಬ ವಿದ್ಯಾರ್ಥಿಗಳಿರುತ್ತಾರೆ. ಆದರೆ, ಅವರ್ಯಾರೂ ಬಸ್ ಬಂದರೂ ಅದನ್ನು ಏರುವುದಿಲ್ಲ. ಅಲ್ಲೇ ಕುಳಿತಿರುತ್ತಾರೆ. ಅವರೇನು ಹರಟೆ ಹೊಡೆಯಲು ಬಂದು ಸೇರಿದವರಲ್ಲ. ಎಲ್ಲ ಆನ್ಲೈನ್ ತರಗತಿಗಾಗಿ ಸೇರಿದವರು.
ಕಾರವಾರ ತಾಲೂಕಿನ ದೇವಳಮಕ್ಕಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 260 ಮನೆಗಳಿವೆ. 1500 ರಷ್ಟು ಜನಸಂಖ್ಯೆ ಇದೆ. 150 ಕ್ಕಿಂತ ಹೆಚ್ಚು ವಿದ್ಯಾರ್ಥಿಗಳು, ಹೈಸ್ಕೂಲ್ ಹಾಗೂ ಕಾಲೇಜ್ ಕಲಿಯುವವರಿದ್ದಾರೆ. ಗ್ರಾಪಂ ವ್ಯಾಪ್ತಿಯ 8 ಗ್ರಾಮಗಳಲ್ಲಿ 5 ಗ್ರಾಮಕ್ಕೆ ನೆಟ್ ವರ್ಕ್ ಇಲ್ಲ. ಇದರಿಂದ ನೆಟ್ ವರ್ಕ್ ಸಿಗುವ ಒಂದೇ ತಾಣ ಬಸ್ ತಂಗುದಾಣಕ್ಕೆ. ಇನ್ನು ಕೆಲವರು ತಮ್ಮ ಸಂಬಂಧಿಕರ ಮನೆಗೆ ವಿದ್ಯಾರ್ಥಿಗಳು ಸೈಕಲ್ ಮೂಲಕ ಇಲ್ಲವೇ ನಡೆದು ಬರುತ್ತಾರೆ.
ಇಲ್ಲಿ ಬಿಎಸ್ಎನ್ಎಲ್ ಬಿಟ್ಟರೆ ಬೇರೆ ಖಾಸಗಿ ನೆಟ್ವರ್ಕ್ ಇಲ್ಲ. ಹಲವು ಬಾರಿ ನೆಟ್ ವರ್ಕ್ ಸಮಸ್ಯೆ ಎದುರಾಗುತ್ತದೆ ಎಂಬುದು ವಿದ್ಯಾರ್ಥಿಗಳ ಗೋಳು.
ದೇವಳಮಕ್ಕಿಯಲ್ಲಿ ಬಿಎಸ್ಎನ್ಎಲ್ ಬಿಟ್ಟರೆ ಬೇರೆ ನೆಟ್ವರ್ಕ್ ಇಲ್ಲ. ಅದು ಹಲವು ಬಾರಿ ಕೆಟ್ಟಿರುತ್ತದೆ. ಈ ಬಗ್ಗೆ ಹಲವು ಬಾರಿ ನಾವು ಮನವಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ. ಈ ಭಾಗದಲ್ಲಿ ಖಾಸಗಿ ಕಂಪನಿಯ ಮೊಬೈಲ್ ನೆಟ್ ವರ್ಕ್ ಒದಗಿಸುವ ಟವರ್ನ್ನಾದರೂ ಕೊಡಬೇಕು. | ಪ್ರಜ್ವಲ ಶೇಟ್ ಕವಿವಿ ಪತ್ರಿಕೋದ್ಯಮ ಸ್ನಾತಕೋತ್ತರ ವಿದ್ಯಾರ್ಥಿ