ಹುಬ್ಬಳ್ಳಿ: ಧಾರವಾಡ ಜಿಲ್ಲೆಯಲ್ಲಿ ಈ ಬಾರಿ ಉಳ್ಳಾಗಡ್ಡಿ ಬೆಳೆ ನೆಲಕಚ್ಚಿದ್ದು, ಮಾರುಕಟ್ಟೆಗೆ ಆವಕ ತೀರಾ ಕಡಿಮೆಯಾಗಿದೆ. ಪ್ರತಿ ವರ್ಷ ಇದೇ ಸೀಸನ್ನಲ್ಲಿ ನಿತ್ಯ ಏನಿಲ್ಲವೆಂದರೂ 10 ಸಾವಿರದಿಂದ 20 ಸಾವಿರ ಕ್ವಿಂಟಾಲ್ವರೆಗೆ ಆವಕವಾಗುತ್ತಿದ್ದ ಉಳ್ಳಾಗಡ್ಡಿ ಈ ವರ್ಷ ಬರಿ ಸಾವಿರ ಕ್ವಿಂಟಾಲ್ಗೆ ಇಳಿದಿದೆ.
ವರ್ತಕರು ಸ್ಥಳೀಯವಾಗಿಯೇ ಬಳಕೆಗೆ ಹೆಚ್ಚು ಆದ್ಯತೆ ನೀಡುತ್ತಿದ್ದಾರೆ. ಹುಬ್ಬಳ್ಳಿ ಎಪಿಎಂಸಿಯಲ್ಲಿ ಗುರುವಾರ ಪ್ರತಿ ಕ್ವಿಂಟಾಲ್ಗೆ ಕನಿಷ್ಠ 300 ರೂ.ನಿಂದ ಗರಿಷ್ಠ 2700 ರೂ. ವರೆಗೆ ಮಾರಾಟವಾಗಿದೆ. ಒಟ್ಟು 1100 ಕ್ವಿಂಟಾಲ್ ಮಾತ್ರ ಆವಕವಾಗಿತ್ತು.
ಪುಣೆ ಉಳ್ಳಾಗಡ್ಡಿ ಮಾತ್ರ ಹೆಚ್ಚು ಆವಕವಾಗುತ್ತಿದೆ. ಗುರುವಾರ ಸುಮಾರು 2000 ಕ್ವಿಂಟಾಲ್ ಆವಕವಾಗಿದ್ದು, ಪ್ರತಿ ಕ್ವಿಂಟಾಲ್ಗೆ 1000ರೂ.ನಿಂದ 4300 ರೂ. ವರೆಗೆ ಮಾರಾಟವಾಗಿದೆ. ಮಳೆಗೆ ಸಿಕ್ಕು ಬಹುತೇಕ ಬೆಳೆ ಇನ್ನೂ ಹಸಿಹಸಿಯಾಗಿದೆ. ಹಾಗಾಗಿ ಹೆಚ್ಚು ಬೆಲೆ ಸಿಗುತ್ತಿಲ್ಲ. ಕೆಲ ರೈತರು ಹೆಚ್ಚು ಒಣಗಿಸದೇ ತರುತ್ತಿರುವುದರಿಂದ ಮಾದರಿ ದರ 2000 ರೂ. ದಾಟುತ್ತಿಲ್ಲ ಎಂಬುದು ವರ್ತಕರ ಹೇಳಿಕೆ.
ಅತಿವೃಷ್ಟಿಗೆ ಹಾನಿ: 2019 ಹಾಗೂ 2020 ಎರಡೂ ವರ್ಷ ಅತಿಯಾದ ಮಳೆಗೆ ಉಳ್ಳಾಗಡ್ಡಿ ಬೆಳೆ ಹಾಳಾಗಿದೆ. 2020ರ ಮುಂಗಾರಿನಲ್ಲಿ ಧಾರವಾಡ ಜಿಲ್ಲೆಯಲ್ಲಿ 28905 ಹೆಕ್ಟೇರ್ನಲ್ಲಿ ಉಳ್ಳಾಗಡ್ಡಿ ಬಿತ್ತನೆಯಾಗಿತ್ತು. ಅಂದಾಜು 5.78 ಲಕ್ಷ ಮೆಟ್ರಿಕ್ ಟನ್ ಉತ್ಪಾದನೆ ನಿರೀಕ್ಷಿಸಲಾಗಿತ್ತು. ಆದರೆ, ಸುಮಾರು 14041 ಹೆಕ್ಟೇರ್ನಲ್ಲಿನ ಉಳ್ಳಾಗಡ್ಡಿ ಮಳೆಯಿಂದ ನಷ್ಟವಾಗಿದೆ. ಕಳೆದ ವರ್ಷ 2019ರಲ್ಲಿ ಕೂಡ 17 ಸಾವಿರ ಹೆಕ್ಟೇರ್ನಷ್ಟು ಉಳ್ಳಾಗಡ್ಡಿ ಬೆಳೆ ನಷ್ಟವಾಗಿತ್ತು. ಈ ಎಲ್ಲ ಹಿನ್ನೆಲೆಯಲ್ಲಿ ಉಳ್ಳಾಗಡ್ಡಿ ಬೆಳೆಗಾರರು ಸತತ ಎರಡು ವರ್ಷ ತೀವ್ರ ಹಾನಿ ಅನುಭವಿಸುವಂತಾಗಿದೆ.
ಸದ್ಯ ಹುಬ್ಬಳ್ಳಿ ಚಿಲ್ಲರೆ ಮಾರುಕಟ್ಟೆಯಲ್ಲಿ ಉಳ್ಳಾಗಡ್ಡಿ ಪ್ರತಿ ಕಿಲೋಗೆ 40- 50 ರೂ.ನಂತೆ ಮಾರಾಟ ಮಾಡಲಾಗುತ್ತಿದೆ. ಪುಣೆ ಇಲ್ಲವೇ ಒಂದಿಷ್ಟು ಒಣಗಿದ, ಗುಣಮಟ್ಟದ ಸ್ಥಳೀಯ ಉಳ್ಳಾಗಡ್ಡಿಗೆ ಹೆಚ್ಚು ಬೆಲೆ ಇದೆ. ಎಪಿಎಂಸಿಯಲ್ಲಿ ಕಡಿಮೆ ದರ ಇದ್ದರೂ ಚಿಲ್ಲರೆ ಮಾರುಕಟ್ಟೆಯಲ್ಲಿ ಮಾತ್ರ ಗ್ರಾಹಕರು ಹೆಚ್ಚು ಬೆಲೆ ತೆರಬೇಕಿದೆ.
ಮೆಣಸಿನಕಾಯಿ ಬೆಳೆಯೂ ಹಾನಿ: ಧಾರವಾಡ ಜಿಲ್ಲೆಯಲ್ಲಿ ಕೆಂಪು ಮೆಣಸಿನಕಾಯಿ ಕೂಡ ಈ ಬಾರಿ ಮಳೆಗೆ ಸಿಕ್ಕು ಹಾನಿಯಾಗಿದೆ. 2020ರ ಮುಂಗಾರಿನಲ್ಲಿ 28211 ಹೆಕ್ಟೇರ್ನಲ್ಲಿ ಬಿತ್ತನೆಯಾಗಿದ್ದ ಮೆಣಸಿನಕಾಯಿ ಪೈಕಿ 4804 ಹೆಕ್ಟೇರ್ನಲ್ಲಿನ ಬೆಳೆ ಅತಿವೃಷ್ಟಿಗೆ ಸಿಕ್ಕು ನಷ್ಟವಾಗಿದೆ. ಇದು ಉತ್ಪಾದನೆ ಮೇಲೂ ಪರಿಣಾಮ ಬೀರಲಿದೆ.
ಧಾರವಾಡ ಜಿಲ್ಲೆಯಲ್ಲಿ ಈ ಬಾರಿ ಬಿತ್ತನೆಯಾಗಿದ್ದ ಅರ್ಧದಷ್ಟು ಉಳ್ಳಾಗಡ್ಡಿ ಅತಿವೃಷ್ಟಿಗೆ ಹಾನಿಯಾಗಿದೆ ಎಂದು ಅಂದಾಜಿಸಲಾಗಿದೆ. ಇದು ಉತ್ಪಾದನೆ ಮೇಲೂ ಪರಿಣಾಮ ಬೀರಿದೆ. ಅದೇ ರೀತಿ ಮೆಣಸಿನಕಾಯಿ ಬೆಳೆಯೂ ಒಂದಿಷ್ಟು ಹಾಳಾಗಿದೆ.
| ಕೆ.ಸಿ. ಭದ್ರಣ್ಣವರ
ತೋಟಗಾರಿಕೆ ಇಲಾಖೆ ಉಪನಿರ್ದೇಶಕ, ಧಾರವಾಡ (ಪ್ರಭಾರ)