ಹುಬ್ಬಳ್ಳಿ: ಇಲ್ಲಿನ ಅಮರಗೋಳದ ಹೋಲ್ಸೇಲ್ ಅಕ್ಕಿ ಅಂಗಡಿಯೊಂದರಲ್ಲಿ 7 ವರ್ಷಗಳಿಂದ ಸಹಾಯಕನಾಗಿ ಕೆಲಸ ಮಾಡುತ್ತಿದ್ದ ವ್ಯಕ್ತಿ ಮಾಲೀಕರಿಗೆ ತಿಳಿಯದಂತೆ ಅಕ್ಕಿ ಮಾರಾಟ ಮಾಡಿ, ಬಾಕಿ ಹಣ ಪಡೆದು 5.60 ಲಕ್ಷ ರೂ. ವಂಚಿಸಿದ್ದಾನೆ.
ಎಚ್.ಎಸ್. ಜಲಾಲಿ ವಂಚಿಸಿದ ಆರೋಪಿ. ಈತ ಎಂ.ಎಚ್. ಟ್ರೇಡರ್ಸ್ನಲ್ಲಿ ಕೆಲಸ ಮಾಡುತ್ತಿದ್ದ. ಮಾಲೀಕರ ಕಾಲು ಮುರಿದಿದ್ದರಿಂದ ಅಕ್ಟೋಬರ್ 2019ರಿಂದ ಅಂಗಡಿಗೆ ಹೋಗಲಾಗದೇ ಜಲಾಲಿಗೆ ವ್ಯವಹಾರ ನೋಡಿಕೊಳ್ಳಲು ಹೇಳಿ ಅಂಗಡಿ ಕೀಲಿ ಕೊಟ್ಟಿದ್ದರು. 5 ತಿಂಗಳ ಬಳಿಕ ಮಾಲೀಕರು ಅಂಗಡಿಗೆ ಬಂದಾಗ ವಂಚನೆ ಬಯಲಿಗೆ ಬಂದಿದೆ.
2,40,000 ರೂ. ಮೌಲ್ಯದ 120 ಬಾಸುಮತಿ ಅಕ್ಕಿ ಚೀಲಗಳನ್ನು ಜಲಾಲಿ ಮಾರಿ ಹಣವನ್ನು ಮಾಲೀಕರಿಗೆ ನೀಡದೇ ವಂಚಿಸಿದ್ದಾನೆ. ಕೆಲ ಹೋಟೆಲ್ಗಳಿಂದ ಬರಬೇಕಿದ್ದ ಬಾಕಿ ಹಣ 1,70,000 ರೂ. ಪಡೆದು ಸ್ವಂತಕ್ಕೆ ಖರ್ಚು ಮಾಡಿದ್ದಾನೆ. ಇದರ ಜತೆಗೆ ಸಾಲ ತೀರಿಸಲೆಂದು ಮಾಲೀಕರಿಂದ 1,50,000 ರೂ. ಪಡೆದು ವಾಪಸ್ ಕೊಡದೇ ವಂಚಿಸಿದ್ದಾನೆ ಎಂದು ಎಂ.ಎಚ್. ಟ್ರೇಡರ್ಸ್ ಮಾಲೀಕರು ಎಪಿಎಂಸಿ- ನವನಗರ ಪೊಲೀಸ್ ಠಾಣೆಯಲ್ಲಿ ಗುರುವಾರ ಪ್ರಕರಣ ದಾಖಲಿಸಿದ್ದಾರೆ.
ಜೀವ ಬೆದರಿಕೆ: ಪೊಲೀಸ್ ದೂರು ನೀಡದೇ ಒಪ್ಪಂದ ಮಾಡಿಕೊಳ್ಳಿ ಎಂದು ಜಲಾಲಿ ಸ್ನೇಹಿತರಾದ ಸೈಯದ್, ವಾಜೀದ, ಎಜಾಜ ಹಾಗೂ ಫರ್ಹಾನ್ ಎಂಬುವರು ಮಾಲೀಕರಿಗೆ ಜೀವ ಬೆದರಿಕೆ ಹಾಕಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.