ನವದೆಹಲಿ: ಕೋವಿಡ್-19 ಲಾಕ್ಡೌನ್ನಿಂದಾಗಿ ದೇಶಾದ್ಯಂತ ಜನರು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ವಾಹನ, ಗೃಹ ಮತ್ತು ಕ್ರೆಡಿಟ್ಕಾರ್ಡ್ಗಳ ಇಎಂಐ ಪಾವತಿಗೆ ಆಗಸ್ಟ್ 31ರವರೆಗೆ ವಿನಾಯ್ತಿ ನೀಡಿದೆ. ಆದರೂ ಬ್ಯಾಂಕ್ಗಳು ಈ ಅವಧಿಯಲ್ಲಿನ ಇಎಂಐಗಳ ಪಾವತಿ ಮೇಲೆ ಹೆಚ್ಚುವರಿ ಬಡ್ಡಿ ವಿಧಿಸುತ್ತಿವೆ.
ಈ ವಿಷಯವನ್ನು ಪ್ರಸ್ತಾಪಿಸಿ, ವಿನಾಯ್ತಿಯ ಅವಧಿಯಲ್ಲಿ ಇಎಂಐಗಳ ಮೇಲೆ ಹೆಚ್ಚುವರಿ ಬಡ್ಡಿ ವಿಧಿಸದಂತೆ ಬ್ಯಾಂಕ್ಗಳಿಗೆ ಸೂಚಿಸಬೇಕು ಎಂದು ಮನವಿ ಮಾಡಿಕೊಂಡು ಸುಪ್ರೀಂಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ಮಂಗಳವಾರ ಈ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್, ಈ ಸಂಬಂಧ ಕೇಂದ್ರ ಸರ್ಕಾರ ಮತ್ತು ಆರ್ಬಿಐಗೆ ನೋಟಿಸ್ ಜಾರಿ ಮಾಡಿದೆ.
ಇದನ್ನೂ ಓದಿ: ಎರಡು ವರ್ಷದೊಳಗಿನ ಮಕ್ಕಳಿಗೆ ಮಾಸ್ಕ್ ಅಪಾಯಕಾರಿ: ವೈದ್ಯರ ಸಂಸ್ಥೆ ಎಚ್ಚರಿಕೆ
ದೇಶಾದ್ಯಂತ ಲಾಕ್ಡೌನ್ ಘೋಷಣೆಯಾದ ಬೆನ್ನಲ್ಲೇ ಮಾರ್ಚ್ 27ರಂದು ಆರ್ಬಿಐ ವಾಹನ, ಗೃಹ ಮತ್ತು ಟರ್ಮ್ ಲೋನ್ ಅಲ್ಲದೆ ಕ್ರೆಡಿಟ್ಕಾರ್ಡ್ಗಳ ಇಎಂಐ ಪಾವತಿಗೆ ಮೂರು ತಿಂಗಳು ವಿನಾಯ್ತಿ ನೀಡುವುದಾಗಿ ಘೋಷಿಸಿತ್ತು. ಆದರೆ, ಇಎಂಐ ಪಾವತಿಯ ವಿನಾಯ್ತಿ ಪಡೆದುಕೊಂಡರೆ, ಅವುಗಳ ಮೇಲೆ ಹೆಚ್ಚುವರಿ ಬಡ್ಡಿ ವಿಧಿಸುವುದಾಗಿ ಬ್ಯಾಂಕ್ಗಳು ಹೇಳಿದ್ದವು. ಈ ಹಿನ್ನೆಲೆಯಲ್ಲಿ ಗ್ರಾಹಕರು ವಿನಾಯ್ತಿ ಸೌಲಭ್ಯ ಪಡೆದುಕೊಳ್ಳುವ ಬದಲು ಇಎಂಐ ಪಾವತಿಸಲು ಮುಂದಾಗಿದ್ದರು.
ಕಳೆದ ವಾರ ಮತ್ತೊಮ್ಮೆ ಮೂಲಾಂಶವನ್ನು ಕಡಿತಗೊಳಿಸುವ ಘೋಷಣೆ ಮಾಡಿದ್ದ ಆರ್ಬಿಐನ ಮುಖ್ಯಸ್ಥ ಶಕ್ತಿಕಾಂತ ದಾಸ್, ಇಎಂಐ ಪಾವತಿಗಳ ವಿನಾಯ್ತಿ ಸೌಲಭ್ಯವನ್ನು ಆಗಸ್ಟ್ 31ರವರೆಗೆ ವಿಸ್ತಿರಿಸಿದ್ದರು.