ಮುಂಬೈ: ಭಾರತದಲ್ಲಿ ಮುಂದಿನ 5 ವರ್ಷಗಳ ಕಾಲ ನಡೆಯಲಿರುವ ದ್ವಿಪಯ ಕ್ರಿಕೆಟ್ ಸರಣಿಗಳ ನೇರಪ್ರಸಾರ ಹಕ್ಕು ರಿಲಯನ್ಸ್ ಸಮೂಹದ ಮಾಧ್ಯಮ ಸಂಸ್ಥೆ ‘ವಯಾಕಾಮ್18’ಗೆ ಒಲಿದಿದೆ. ಬಿಸಿಸಿಐ ಗುರುವಾರ ನಡೆಸಿದ ಪ್ರಸಾರ ಹಕ್ಕಿನ ಇ-ಹರಾಜಿನಲ್ಲಿ ವಯಾಕಾಮ್18, ಟಿವಿ ಮತ್ತು ಡಿಜಿಟಲ್ ಹಕ್ಕುಗಳೆರಡನ್ನೂ ಒಟ್ಟು 5,963 ಕೋಟಿ ರೂ. ಮೊತ್ತಕ್ಕೆ ಗೆದ್ದುಕೊಂಡಿತು. ಇದರನ್ವಯ ಟೀಮ್ ಇಂಡಿಯಾದ ತವರಿನ ಪಂದ್ಯಗಳು ಈಗ 67.8 ಕೋಟಿ ರೂ. ಮೌಲ್ಯ ಪಡೆದುಕೊಂಡಿದೆ. ಇದು ಕಳೆದ 5 ವರ್ಷಗಳ ಒಪ್ಪಂದಕ್ಕಿಂತ ಶೇ. 12.92 ಅಂದರೆ 7.8 ಕೋಟಿ ರೂ. ಅಧಿಕವಾಗಿದೆ.
ಬಿಸಿಸಿಐ ಇದೇ ಮೊದಲ ಬಾರಿಗೆ ಟಿವಿ-ಡಿಜಿಟಲ್ ಹಕ್ಕುಗಳನ್ನು ಪ್ರತ್ಯೇಕವಾಗಿ ಮಾರಾಟ ಮಾಡಿದ್ದರೂ, ಎರಡೂ ವಯಾಕಾಮ್18 ಪಾಲಾಗಿವೆ. ಡಿಜಿಟಲ್ ಹಕ್ಕು 3,101 ಕೋಟಿ ರೂ.ಗಳಿಗೆ ಮತ್ತು ಟಿವಿ ಹಕ್ಕು 2,862 ಕೋಟಿ ರೂ.ಗಳಿಗೆ ಮಾರಾಟವಾಗಿದೆ. ಇದರನ್ವಯ ಪ್ರತಿ ಪಂದ್ಯದ ಟಿವಿ ಪ್ರಸಾರ ಹಕ್ಕು 32.5 ಕೋಟಿ ರೂ. ಮತ್ತು ಡಿಜಿಟಲ್ ಪ್ರಸಾರ ಹಕ್ಕು 35.3 ಕೋಟಿ ರೂ. ಮೌಲ್ಯ ಪಡೆದಿದೆ.
ಆಸ್ಟ್ರೆಲಿಯಾ ವಿರುದ್ಧ ಸೆಪ್ಟೆಂಬರ್ 22ರಿಂದ ನಡೆಯಲಿರುವ 3 ಪಂದ್ಯಗಳ ಏಕದಿನ ಸರಣಿಯೊಂದಿಗೆ ಹೊಸ ಪ್ರಸಾರ ಹಕ್ಕು ಒಪ್ಪಂದ ಶುರುವಾಗಲಿದ್ದು, 2028ರ ಮಾರ್ಚ್ವರೆಗೆ ಅನ್ವಯಿಸಲಿದೆ. ಈ ಅವಧಿಯಲ್ಲಿ ಭಾರತ ತಂಡ ಒಟ್ಟು 88 ಪಂದ್ಯಗಳನ್ನು (25 ಟೆಸ್ಟ್, 27 ಏಕದಿನ, 36 ಟಿ20) ಆಡಲಿದೆ.
ಪ್ರಸಾರ ಹಕ್ಕು ಇ-ಹರಾಜಿನ ಪೈಪೋಟಿಯಲ್ಲಿ ಡಿಸ್ನಿ ಸ್ಟಾರ್ ಮತ್ತು ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್ಗಳನ್ನು ದೇಶದ ಶ್ರೀಮಂತ ಉದ್ಯಮಿ ಮುಕೇಶ್ ಅಂಬಾನಿ ಮಾಲೀಕತ್ವದ ‘ವಯಾಕಾಮ್18’ ಕಂಪನಿ ಹಿಮ್ಮೆಟ್ಟಿಸಿತು. ಈಗಾಗಲೆ ಐಪಿಎಲ್ನ ಡಿಜಿಟಲ್ ಪ್ರಸಾರ ಹಕ್ಕು (23,758 ಕೋಟಿ ರೂ) ಮತ್ತು ಮಹಿಳೆಯರ ಐಪಿಎಲ್ ಖ್ಯಾತಿಯ ‘ಡಬ್ಲ್ಯುಪಿಎಲ್’ (951 ಕೋಟಿ ರೂ.) ಪ್ರಸಾರ ಹಕ್ಕು ವಯಾಕಾಮ್18 ಬಳಿ ಇತ್ತು. ವಯಾಕಾಮ್18 ಒಡೆತನದ ‘ಸ್ಪೋರ್ಟ್ಸ್18’ ಟಿವಿ ಚಾನಲ್ ಮತ್ತು ‘ಜಿಯೋಸಿನಿಮಾ’ ಒಟಿಟಿಯಲ್ಲಿ ಇನ್ನು ಟೀಮ್ ಇಂಡಿಯಾದ ತವರಿನ ಪಂದ್ಯಗಳೂ ನೇರಪ್ರಸಾರ ಕಾಣಲಿವೆ. ವಯಾಕಾಮ್18ಗೆ ಹೊಸ ಪ್ರಸಾರ ಹಕ್ಕು ವಿತರಿಸಿರುವುದನ್ನು ಬಿಸಿಸಿಐ ಕಾರ್ಯದರ್ಶಿ ಜಯ್ ಷಾ ಸಾಮಾಜಿಕ ಜಾಲತಾಣ “ಎಕ್ಸ್’ನಲ್ಲಿ ಪ್ರಕಟಿಸಿದ್ದಾರೆ.
ತಲೆಗೂದಲು ಕಸಿ ಮಾಡಿಸಿಕೊಂಡು ಏಷ್ಯಾಕಪ್ಗೆ ಸಜ್ಜಾದ ಟೀಮ್ ಇಂಡಿಯಾ ವೇಗಿ ಶಮಿ!