ನವದೆಹಲಿ: ಜಗತ್ತಿನಾದ್ಯಂತ ತನ್ನದೇ ಹವಾ ಸೃಷ್ಟಿರುವ ವಿಡಿಯೋ ಶೇರಿಂಗ್ ಆ್ಯಪ್ ಟಿಕ್ಟಾಕ್ಗೆ ಸಾಕಷ್ಟು ಮಂದಿ ಮರುಳಾಗಿದ್ದಾರೆ. ಜನರಿಂದ ಲೈಕ್ಸ್, ಕಾಮೆಂಟ್ ಗಿಟ್ಟಿಸಿಕೊಳ್ಳಬೇಕೆಂಬ ಹಂಬಲದಿಂದ ಅನೇಕರು ಹೊಸ ಹೊಸ ಸಾಹಸಕ್ಕೂ ಕೈಹಾಕುತ್ತಾರೆ. ಆದರೆ, ಆ ಸಾಹಸ ಕೆಲವೊಮ್ಮೆ ಯಮಲೋಕದ ಬಾಗಿಲು ತಟ್ಟಿ ವಾಪಸ್ ಕರೆದುಕೊಂಡು ಬಂದಿರುವ ಎಷ್ಟೋ ಉದಾಹರಣೆಗಳನ್ನು ನೋಡಿದ್ದೇವೆ. ಅದಕ್ಕೆ ಇನ್ನೊಂದು ಉದಾಹರಣೆ ಸೇರ್ಪಡೆಯಾಗಿದೆ.
ಜಾಸನ್ ಕ್ಲಾರ್ಕ್ ಎಂಬ ಅಮೆರಿಕದ ಟಿಕ್ಟಾಕ್ ಸ್ಟಾರ್ ವಿಭಿನ್ನತೆ ಮೆರೆಯಲು ಹೋಗಿ ಸಾವಿನ ಕದ ತಟ್ಟಿ ಬಂದಿದ್ದು, ಅದನ್ನು ಸ್ವತಃ ತಮ್ಮ ಇನ್ಸ್ಟಾಗ್ರಾಂನಲ್ಲಿ ವಿಡಿಯೋ ಮೂಲಕ ಹಂಚಿಕೊಂಡಿದ್ದಾರೆ.
ಯುಎಸ್ನ ಉತಾಹ್ ಪ್ರದೇಶದ ಐಸ್ ವಾಟರ್ನಲ್ಲಿ ಸ್ವಿಮ್ಮಿಂಗ್ ಮಾಡುವ ದುಸ್ಸಾಹಸವನ್ನು ಮಾಡಿದ್ದಾರೆ. ಈ ಬಗ್ಗೆ ಬರೆದುಕೊಂಡಿರುವ ಕ್ಲಾರ್ಕ್, ನಾನೆಂದಿಗೂ ಸಾವನ್ನು ಹತ್ತಿರದಿಂದ ನೋಡಿರಲಿಲ್ಲ. ನನ್ನ ಕಣ್ಣು ಗುಡ್ಡೆಗಳು ಆದಷ್ಟು ಬೇಗ ಹಿಮಗಟ್ಟುತ್ತದೆ ಎಂದೂ ಯೋಚಿಸಿರಲಿಲ್ಲ. ಐಸ್ ವಾಟರ್ಗೂ ಮಂಜುಗೆಡ್ಡೆಯಿಂದ ಆವರಿಸಿದ್ದ ಮೇಲ್ಮೈಗೂ ಯಾವುದೇ ವ್ಯತ್ಯಾಸವಿರಲಿಲ್ಲ. ಒಂದು ಕ್ಷಣ ಸಾವಿನ ಬಳಿ ಹೋಗಿ ಬಂದ ಅನುಭವವಾಯಿತು ಎಂದು ಹೇಳಿದ್ದಾರೆ.
ವಿಡಿಯೋದಲ್ಲಿ ಏನಿದೆ?: ಮಂಜುಗೆಡ್ಡೆ ಆವರಿಸಿರುವ ಸರೋವರವೊಂದರಲ್ಲಿ ಮಾನವ ತೂರುವಷ್ಟು ದೊಡ್ಡದಾದ ರಂಧ್ರದ ಮೂಲಕ ಮೇಲ್ಮೈ ಕೆಳಗಿನ ನೀರಿನಲ್ಲಿ ಕ್ಲಾರ್ಕ್ ಈಜಿಕೊಂಡು ಹೋಗುತ್ತಾರೆ. ಆರಂಭದಲ್ಲಿ ಆರಾಮವಾಗೇ ಈಜುತ್ತಾರೆ. ಬಳಿಕ ಅಡೆತಡೆ ಎದುರಾಗಿ ಈಜಲು ಸಾಧ್ಯವಾಗದಿದ್ದಾಗ ವಾಪಸ್ ಬರಲು ಯತ್ನಿಸುವ ಕ್ಲಾರ್ಕ್ ತಾನು ಬಂದ ದಾರಿಯನ್ನು ಮರೆಯುತ್ತಾರೆ. ಆಗಾಗಲೇ ಸಾಕಷ್ಟು ಸುಸ್ತಾಗಿರುತ್ತಾರೆ. ಬಳಿಕ ರಂಧ್ರವನ್ನು ಹುಡುಕಿ ಮೇಲೆ ಏಳಿ ಮೂರು ಬಾರಿ ಜೋರಾಗಿ ಉಸಿರಾಡಿ ವಾಸ್ತವ ಸ್ಥಿತಿಗೆ ಬರುತ್ತಾರೆ.
ಇದೀಗ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಲಕ್ಷಾಂತರ ಮಂದಿ ವಿಡಿಯೋ ನೋಡಿ ತಮ್ಮದೇ ರೀತಿಯಲ್ಲಿ ಕಮೆಂಟ್ ಮಾಡುತ್ತಿದ್ದಾರೆ. (ಏಜೆನ್ಸೀಸ್)