ನವದೆಹಲಿ: ಕರೊನಾ ಸೋಂಕು ವ್ಯಾಪಕವಾಗಿ ಹರಡುತ್ತಿರುವಂತೆ ನಗದು ವಹಿವಾಟು ಕಡಿಮೆಯಾಗಿದೆ. ಯೂನಿಫೈಡ್ ಪೇಮೆಂಟ್ ಇಂಟರ್ಫೇಸ್(ಯುಪಿಐ) ಮೂಲಕ ನಡೆಯುತ್ತಿದ್ದ ಪಾವತಿ ವಹಿವಾಟು ಜೂನ್ ತಿಂಗಳಲ್ಲಿ ಗರಿಷ್ಠ ಮಟ್ಟದಲ್ಲಿ ನಡೆದಿದ್ದು, ಸಾರ್ವಕಾಲಿಕ ದಾಖಲೆಯ 13.4 ಕೋಟಿ ವಹಿವಾಟು ದಾಖಲಿಸಿದೆ. ಇದರ ಮೌಲ್ಯ 2.62 ಲಕ್ಷ ಕೋಟಿ ರೂಪಾಯಿ!
ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್ಪಿಸಿಐ) ಡೇಟಾ ಪ್ರಕಾರ, ತಿಂಗಳಿಂದ ತಿಂಗಳಿನ ಆಧಾರದಲ್ಲಿ ಮೇ ತಿಂಗಳಿನಲ್ಲಿದ್ದ 12.3 ಕೋಟಿ ವಹಿವಾಟು ಜೂನ್ನಲ್ಲಿ ಶೇಕಡ 8.94 ಹೆಚ್ಚಾಗಿದೆ. ಯುಪಿಐ ಪಾವತಿ ವಹಿವಾಟಿನ ಮೌಲ್ಯ ಏಪ್ರಿಲ್ನಲ್ಲಿ 1.51 ಲಕ್ಷ ಕೋಟಿ ರೂಪಾಯಿ ಆಗಿತ್ತು. ಮೇ ತಿಂಗಳಲ್ಲಿ ಇದು 2.18 ಲಕ್ಷ ಕೋಟಿ ರೂಪಾಯಿ ಆಗಿತ್ತು.
ಇದನ್ನೂ ಓದಿ: 21 ಪೊಲೀಸರಿಗೆ ಸೋಂಕು- ಈವರೆಗೆ 168ಕ್ಕೂ ಮಂದಿಗೆ ಕೋವಿಡ್ | ಸಿಐಡಿ ಕಚೇರಿ ಸೀಲ್ಡೌನ್
ಎನ್ಸಿಪಿಐ 2008ರಲ್ಲಿ ಶುರುವಾಗಿದ್ದು, ಇದು ಎಲ್ಲ ರೀತಿಯ ಪಾವತಿ ವಹಿವಾಟಿಗೆ ಉಸ್ತುವಾರಿ ಸಂಸ್ಥೆಯಾಗಿದೆ. ರಿಟೇಲ್ ಪೇಮೆಂಟ್ ಉತ್ಪನ್ನ ರುಪೇ ಕಾರ್ಡ್, ಇಮ್ಮೀಡಿಯೇಟ್ ಪೇಮೆಂಟ್ ಸರ್ವೀಸ್ (ಐಎಂಪಿಎಸ್), ಯುಪಿಐ, ಭಾರತ್ ಇಂಟರ್ಫೇಸ್ ಫಾರ್ ಮನಿ(ಭೀಮ್), ಭೀಮ್ ಆಧಾರ್, ನ್ಯಾಷನಲ್ ಇಲೆಕ್ಟ್ರಾನಿಕ್ ಟೋಲ್ ಕಲೆಕ್ಷನ್ (ಎನ್ಇಟಿಸಿ ಫಾಸ್ಟ್ಯಾಗ್), ಭಾರತ್ ಬಿಲ್ ಪೇ ಗಳನ್ನು ಹೊಂದಿದೆ. ಇತ್ತೀಚೆಗೆ ಯುಪಿಐ 2.0 ಎಂಬ ಹೆಚ್ಚಿನ ಸುರಕ್ಷಿತ ಮತ್ತು ಗ್ರಾಹಕರಿಗೆ, ವ್ಯಾಪಾರಿಗಳಿಗೆ ಅಗತ್ಯವಾದ ಸಮಗ್ರ ಸೇವೆಗಳನ್ನು ಒಳಗೊಂಡ ಇಂಟರ್ ಫೇಸನ್ನು ಪರಿಚಯಿಸಿದೆ. (ಏಜೆನ್ಸೀಸ್)