ನವದೆಹಲಿ: ಕೋವಿಡ್ 19 ಹರಡುವಿಕೆ ತಡೆಗಟ್ಟಲು ದೇಶಾದ್ಯಂತ ಲಾಕ್ಡೌನ್ ಘೋಷಿಸಲಾಗಿದೆ. ಅದರಂತೆ, ರೈಲು, ಬಸ್ಸು ಅಲ್ಲದೆ ವಿಮಾನ ಸಂಚಾರವನ್ನೂ ರದ್ದುಗೊಳಿಸಲಾಗಿದೆ. ಆದರೆ ಸರಕು ಸಾಗಣೆ ರೈಲುಗಳು ಸಂಚರಿಸುತ್ತಿವೆಯಾದರೂ ಅವು ನಿಗದಿತ ಗಮ್ಯ ತಲುಪಲು ತುಂಬಾ ಸಮಯ ತೆಗೆದುಕೊಳ್ಳುತ್ತವೆ. ಹೀಗಿದ್ದೂ, ಔಷಧಗಳ ದಾಸ್ತಾನು ಸಕಾಲದಲ್ಲಿ ದೇಶದ ಮೂಲೆ ಮೂಲೆಗೂ ತಲುಪಿದವು. ಅದು ಹೇಗೆ ಗೊತ್ತಾ?
ಲೈಫ್ಲೈನ್ ಉಡಾನ್ ಎಂಬ ಯೋಜನೆಯಡಿ ಸರಕು ಸಾಗಣೆ ವಿಮಾನಗಳು ಒಟ್ಟಾರೆ 463.15 ಟನ್ ಔಷಧ ಮತ್ತಿತರ ಅಗತ್ಯವಸ್ತುಗಳನ್ನು ದೇಶದ ಮೂಲೆ ಮೂಲೆಗೆ ತಲುಪಿಸಿದವು ಎಂದು ನಾಗರಿಕ ವಿಮಾನಯಾನ ಸಚಿವಾಲಯದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಲೈಫ್ಲೈನ್ ಉಡಾನ್ ಯೋಜನೆಯಡಿ ಒಟ್ಟಾರೆ 274 ವಿಮಾನಗಳು ಸಂಚಾರ ಕೈಗೊಂಡವು. ಏರ್ಇಂಡಿಯಾ, ಅಲೈಯನ್ಸ್ ಏರ್ ಮತ್ತಿತರ ಖಾಸಗಿ ವಿಮಾನಗಳು ಸಂಚರಿಸಿದವು ಎಂದು ಹೇಳಿದ್ದಾರೆ.
ಒಟ್ಟು 2,73,275 ಕಿ.ಮೀ. ದೂರ ಸಂಚರಿಸಿದ ಸರಕು ಸಾಗಣೆ ವಿಮಾನಗಳು ಅಗತ್ಯವಸ್ತುಗಳನ್ನು ದೇಶದೆಲ್ಲೆಡೆ ತಲುಪಿಸಿದವು ಎಂದು ವಿವರಿಸಿದ್ದಾರೆ. ದೆಹಲಿ, ಮುಂಬೈ, ಚೆನ್ನೈ, ಕೋಲ್ಕತಾ, ಹೈದರಾಬಾದ್, ಬೆಂಗಳೂರು ಮತ್ತು ಗುವಾಹಟಿಯನ್ನು ಕೇಂದ್ರವಾಗಿಸಿಕೊಂಡು ಈ ವಿಮಾನಗಳು ಕಾರ್ಯಾಚರಿಸಿದ್ದಾಗಿ ಮಾಹಿತಿ ನೀಡಿದ್ದಾರೆ.