ಮಾಡೆಲಿಂಗ್ ಕ್ಷೇತ್ರದಲ್ಲಿ ಕರ್ನಾಟಕದವರು ಹಿಂದೆ ಬಿದ್ದಿಲ್ಲ. ಈಗಾಗಲೇ ಸಾಕಷ್ಟು ಕನ್ನಡತಿಯರು ಹೊರದೇಶಗಳಿಗೆ ಹೋಗಿ ಭಾರತವನ್ನು ಪ್ರತಿನಿಧಿಸಿದ್ದಾರೆ. ಐಶ್ವರ್ಯಾ ರೈ, ಶ್ರೀನಿಧಿ ಶೆಟ್ಟಿ ಆಶಾ ಭಟ್ … ಹೀಗೆ ಆ ಪಟ್ಟಿ ಬೆಳೆಯುತ್ತಲೇ ಹೋಗುತ್ತದೆ.
ಇದೀಗ ಆ ಸಾಲಿಗೆ ಮತ್ತೋರ್ವ ಸುಂದರಿ ಸೇರ್ಪಡೆಯಾಗಿದ್ದಾರೆ. ಪ್ರತಿಷ್ಠಿತ ಮಿಸ್ ಯೂನಿವರ್ಸ್ ಸ್ಪರ್ಧೆಯಲ್ಲಿ ಭಾರತವನ್ನು ಪ್ರತಿನಿಧಿಸಿ ನಾಲ್ಕನೇ ಸ್ಥಾನಕ್ಕೆ ತೃಪ್ತಿ ಪಟ್ಟುಕೊಂಡಿದ್ದಾರೆ ಉಡುಪಿ ಮೂಲದ ಆಡ್ಲೆನ್ ಕ್ಯಾಸ್ಟೆಲಿನೋ. ಕುವೈತ್ನಲ್ಲಿ ಹುಟ್ಟಿ, ಮುಂಬೈನಲ್ಲಿ ಬೆಳೆದಿರುವ ಆಡ್ಲೆನ್ ಅವರ ಪೋಷಕರು ಮೂಲತಃ ಉಡುಪಿಯ ಉದ್ಯಾವರದವರಾದರೂ ಸದ್ಯ ಮುಂಬೈನಲ್ಲಿಯೇ ಇಡೀ ಕುಟುಂಬ ನೆಲೆಸಿದೆ. ಇದೀಗ ವಿಶ್ವ ಸುಂದರಿ ರೇಸ್ನಲ್ಲಿ ಮೂರನೇ ರನ್ನರ್ ಅಪ್ ಆಗಿ ಹೊರಹೊಮ್ಮಿದ್ದು, ನಾಡಿಗೆ ಕೀರ್ತಿ ತಂದಿದ್ದಾರೆ.
ಆಂಡ್ರಿಯಾ ಭುವನ ಸುಂದರಿ: 2021ನೇ ಸಾಲಿನ 69ನೇ ವಿಶ್ವಸುಂದರಿ ಕಾರ್ಯಕ್ರಮಕ್ಕೆ ಸೋಮವಾರ ತೆರೆಬಿದ್ದಿದೆ. ಮೆಕ್ಸಿಕೊ ಮೂಲದ ಆಂಡ್ರಿಯಾ ಮೆಜಾ ಮಿಸ್ ಯೂನಿವರ್ಸ್ ಆಗಿ ಹೊರಹೊಮ್ಮಿದ್ದಾರೆ. ಬ್ರೆಜಿಲ್ನ ಜೂಲಿಯಾ ಗಾಮಾ ಮೊದಲ ರನ್ನರ್ ಅಪ್ ಆದರೆ, ಪೆರುವಿನ ಜೆನಿಕ್ ಮಸಿಟಾ ದ್ವಿತೀಯ, ಡೊಮಿನಿಕನ್ ರಿಪಬ್ಲಿಕ್ನ ಕಿಂಬರ್ಲಿ ಪೆರೆಝ್, ಭಾರತದ ಆಡ್ಲೆನ್ ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನ ಅಲಂಕರಿಸಿದ್ದಾರೆ. ವಿಶ್ವದ ಹಲವೆಡೆಯಿಂದ 70ಕ್ಕೂ ಅಧಿಕ ರೂಪದರ್ಶಿಯರು ಈ ಸಲದ ಮಿಸ್ ಯೂನಿವರ್ಸ್ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. -ಏಜೆನ್ಸೀಸ್