ಮುಂಬೈ: ಅಚ್ಚರಿಯ ಬೆಳವಣಿಗೆಯೊಂದರಲ್ಲಿ ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಪತ್ನಿ ರಶ್ಮಿ ಠಾಕ್ರೆ ಅವರನ್ನು ಶಿವಸೇನಾ ಮುಖವಾಣಿ ಸಾಮ್ನಾ ಗ್ರೂಪ್ನ ಸಂಪಾದಕಿ ಆಗಿ ನೇಮಿಸಲಾಗಿದೆ.
ಸಾಮ್ನಾ ಗ್ರೂಪ್ ಪ್ರಬೋಧನ್ ಪ್ರಕಾಶನ್ ಸಂಸ್ಥೆಯಿಂದ ನಡೆಯುತ್ತಿದೆ. ಈ ಸಂಸ್ಥೆಯ ಅಡಿಯಲ್ಲಿ ಸಾಮ್ನಾ(ಮರಾಠಿ ಭಾಷೆ) ಮತ್ತು ದೂಪಹರ್ ಕಾ ಸಾಮ್ನಾ(ಹಿಂದಿ ಭಾಷೆ) ಎಂಬ ದಿನಪತ್ರಿಕೆ ಪ್ರಕಟಗೊಳ್ಳುತ್ತಿವೆ. ಸಾಮ್ನಾ ಗ್ರೂಪ್ ಅನ್ನು ಶಿವಸೇನಾ ಪಕ್ಷದ ಪಿತಾಮಹ ಬಾಳಾಸಾಹೇಬ್ ಠಾಕ್ರೆ ಅವರು ಸ್ಥಾಪಿಸಿದ್ದರಿಂದ ಶಿವಸೇನೆಯ ಮುಖವಾಣಿಯಂತಲೇ ಇದು ಪ್ರಸಿದ್ಧಿಯಾಗಿದೆ.
ಭಾನುವಾರ ಪ್ರಕಟಗೊಂಡ ನ್ಯೂಸ್ಪೇಪರ್ನಲ್ಲಿ ಸಾಮ್ನಾ ಗ್ರೂಪ್ ಪ್ರಕಾಶಕರಾದ ರಾಜೇಂದ್ರ ಎಂ. ಭಾಗವತ್ ಮತ್ತು ಟ್ರಸ್ಟ್ನ ಇತರೆ ಸದಸ್ಯರ ಹೆಸರುಗಳೊಂದಿಗೆ ಸಂಪಾದಕರ ಹೆಸರನ್ನು ಅಧಿಕೃತವಾಗಿ ಘೋಷಣೆ ಮಾಡಲಾಗಿದೆ.
ಈ ಬಗೆಗಿನ ಮಾಹಿತಿಗಾಗಿ ಪಕ್ಷದ ನಾಯಕರನ್ನು ಸಂಪರ್ಕಿಸಿದಾಗ ಬಹಳ ಜವಾಬ್ದಾರಿಯುತ ಸ್ಥಾನಕ್ಕೆ ಅವರನ್ನು ನೇಮಿಸಲಾಗಿದೆ. ಅದನ್ನು ಅವರು ಶ್ರದ್ಧೆಯಿಂದ ನಿರ್ವಹಿಸುತ್ತಾರೆ ಎಂದಷ್ಟೇ ಹೇಳಿದರು. ಆದರೆ, ವಿಸ್ತಾರವಾಗಿ ಮಾತನಾಡಲು ನಿರಾಕರಿಸಿದರು. ಶಿವಸೇನಾ ಕುಟುಂಬದ ಆಪ್ತರಲ್ಲಿ ಒಬ್ಬರಾದ ಸಂಸದ ಸಂಜಯ್ ರಾವತ್ ಸಾಮ್ನಾ ಗ್ರೂಪ್ನ ಕಾರ್ಯನಿರ್ವಾಹಕ ಸಂಪಾದಕರಾಗಿ ಮುಂದುವರಿಯಲಿದ್ದಾರೆ.
ಅಂದಹಾಗೆ ಬಹು ಆವೃತ್ತಿಯ ಮರಾಠಿ ಸಾಮ್ನಾ ಪತ್ರಿಕೆಯನ್ನು 1983ರ ಜನವರಿ 23ರಂದು ದಿವಂಗತ ಬಾಳಾ ಠಾಕ್ರೆ ಅವರು ಸ್ಥಾಪಿಸಿದರು. ಮೊದಲ ಸಂಪಾದಕರೂ ಆಗಿದ್ದರು. ಹಿಂದಿ ಆವೃತ್ತಿ ದೂಪಹರ್ ಕಾ ಸಾಮ್ನಾ ಪತ್ರಿಕೆಯನ್ನು 1993ರ ಫೆ. 23ರಂದು ಸ್ಥಾಪಿಸಲಾಯಿತು. (ಏಜೆನ್ಸೀಸ್)