ಬೀಜಿಂಗ್: ಬುದ್ಧನ ಪ್ರತಿಮೆಯನ್ನು ನೀವೆಲ್ಲರೂ ನೋಡಿರುತ್ತೀರಿ. ಅದೇ ರೀತಿ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ರ ಫೋಟೋವನ್ನೂ ನೋಡಿರುತ್ತೀರಿ. ಈಗ ಬುದ್ಧನ ಪ್ರತಿಮೆ ಮತ್ತು ಟ್ರಂಪ್ನ ಫೋಟೋವನ್ನು ಸೇರಿಸಿಬಿಟ್ಟರೆ?
ಇಂತದ್ದೊಂದು ವಿಚಿತ್ರ ಪ್ರಯತ್ನವನ್ನು ಚೀನಾದ ಪೀಠೋಪಕರಣ ತಯಾರಕನೊಬ್ಬ ಮಾಡಿದ್ದಾನೆ. ಬುದ್ಧನ ರೀತಿ ಕಾಲುಗಳನ್ನು ಹಾಕಿಕೊಂಡು ಕುಳಿತುಕೊಂಡಿರುವ ಡೊನಾಲ್ಡ್ ಟ್ರಂಪ್ನ ಪ್ರತಿಮೆಯನ್ನು ಆತ ನಿರ್ಮಿಸಿದ್ದಾನೆ. ಪಿಂಗಾಣಿಯಲ್ಲಿ ಈ ರೀತಿಯ ನೂರಾರು ಪ್ರತಿಮೆಗಳನ್ನು ನಿರ್ಮಿಸಿದ್ದು, ಅದನ್ನು ಆನ್ಲೈನ್ನಲ್ಲಿ ಮಾರಾಟಕ್ಕೂ ಇಟ್ಟಿದ್ದಾನೆ.
ಈ ಪ್ರತಿಮೆಗೆ ಆತ ಒಂದು ಉತ್ತಮ ಕ್ಯಾಪ್ಷನ್ ಅನ್ನೂ ಕೊಟ್ಟಿದ್ದಾನೆ. ಮೇಕ್ ಅಮೆರಿಕ ಗ್ರೇಟ್ ಅಗೇನ್ ಎನ್ನುವ ಟ್ರಂಪ್ ಘೋಷಣೆ ಗಮನದಲ್ಲಿಟ್ಟುಕೊಂಡು, ಈ ಪ್ರತಿಮೆಯನ್ನು ನಿಮ್ಮ ಕಚೇರಿಯಲ್ಲಿ ಇಟ್ಟುಕೊಳ್ಳಿ ಮತ್ತು ಮೇಕ್ ಯುವರ್ ಆಫೀಸ್ ಗ್ರೇಟ್ ಅಗೇನ್ ಎಂದು ಕ್ಯಾಪ್ಷನ್ ಕೊಡಲಾಗಿದೆ. “ಟ್ರಂಪ್ ಬುದ್ಧನಿಗೆ ಬೌದ್ಧ ಧರ್ಮ ಎಲ್ಲರಿಗಿಂತ ಚೆನ್ನಾಗಿ ತಿಳಿದಿದೆ” ಎಂದೂ ಬರೆಯಲಾಗಿದೆ. ಟ್ರಂಪ್ ಅವರು ಯಾವಾಗಲೂ ನನಗೆ ಎಲ್ಲರಿಗಿಂತ ಚೆನ್ನಾಗಿ ಗೊತ್ತು ಎನ್ನುತ್ತಿದ್ದುದ್ದನ್ನು ಈ ವಾಕ್ಯ ಸೇರಿಸಿರುವುದಾಗಿ ಆತ ಹೇಳಿಕೊಂಡಿದ್ದಾನೆ.
ಈ ಪ್ರತಿಮೆ ಎರಡು ಗಾತ್ರಗಳಲ್ಲಿ ಲಭ್ಯವಿದೆ. 4.6 ಮೀಟರ್ ಉದ್ದದ ಪ್ರತಿಮೆಯನ್ನು ತಲಾ 44,700 ರೂಪಾಯಿಯಂತೆ ಮಾರಾಟ ಮಾಡಲಾಗುತ್ತಿದ್ದರೆ, 1.6 ಮೀಟರ್ ಉದ್ದದ ಪ್ರತಿಮೆಯನ್ನು 11,100 ರೂಪಾಯಿಗೆ ಮಾರಾಟ ಮಾಡಲಾಗುತ್ತಿದೆ. ಈಗಾಗಲೆ ನೂರಾರು ಜನರು ಮನೋರಂಜನೆಗಾಗಿ ಈ ಪ್ರತಿಮೆಯನ್ನು ಖರೀದಿಸಿರುವುದಾಗಿ ಕುಶಲಕರ್ಮಿ ಹೇಳಿಕೊಂಡಿದ್ದಾನೆ. (ಏಜೆನ್ಸೀಸ್)
ಕ್ಷಣಕ್ಷಣದ ಮಾಹಿತಿಗಾಗಿ ವಿಜಯವಾಣಿ ಫೇಸ್ಬುಕ್ ಪೇಜ್ ಲೈಕ್ ಮಾಡಿ