ಶಾರ್ಜಾ: ‘———- ಈಸ್ ದ ಸೀಕ್ರೆಟ್ ಆಫ್ ಮೈ ಎನರ್ಜಿ’ ಅಂತ ಒಬ್ಬೊಬ್ಬರು ತಮ್ಮ ಶಕ್ತಿಯ ಹಿಂದಿನ ರಹಸ್ಯದ ಕುರಿತು ಒಂದೊಂದು ವಸ್ತು ಅಥವಾ ವಿಷಯವನ್ನು ಹೇಳುತ್ತಾರೆ. ಹಾಗೆಯೇ ಪಂದ್ಯವನ್ನು ಗೆಲ್ಲಿಸುವಂತೆ ಅದ್ಭುತವಾಗಿ ಆಟವಾಡಿದ ಕ್ರಿಕೆಟ್ ಪಟುವೊಬ್ಬರು ತಮ್ಮ ಆಟದ ಹಿಂದಿನ ರಹಸ್ಯವನ್ನು ಹೊರಗೆಡಹಿದ್ದಾರೆ.
ಶಾರ್ಜಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ವಿಮೆನ್ಸ್ ಟಿ-20 ಚಾಲೆಂಜ್ ಕಪ್ನಲ್ಲಿ ಶನಿವಾರ ಟ್ರೈಲ್ ಬ್ಲೇಜರ್ಸ್ ತಂಡದ ವಿರುದ್ಧ ಅದ್ಭುತವಾಗಿ ಆಡಿ ಸೂಪರ್ನೋವಾಸ್ ತಂಡದ ರೋಚಕ ಗೆಲುವಿಗೆ ಕಾರಣವಾದ ಚಾಮರಿ ಅಟಪಟ್ಟು, ತನ್ನ ಭರ್ಜರಿ ಹೊಡೆತದ ಹಿಂದಿನ ಶಕ್ತಿಯ ರಹಸ್ಯವನ್ನು ಬಹಿರಂಗ ಪಡಿಸಿದ್ದಾರೆ.
ಸೂಪರ್ ನೋವಾಸ್ ತಂಡದ ಚಾಮರಿ ಅಟಪಟ್ಟು 48 ಎಸೆತಗಳಲ್ಲಿ 67 ರನ್ ಪೇರಿಸಿದ್ದರು. ಇವುಗಳಲ್ಲಿ ಐದು ಬೌಂಡರಿ ನಾಲ್ಕು ಸಿಕ್ಸರ್ಗಳಿಸಿ ಪಂದ್ಯಶ್ರೇಷ್ಠರಾಗಿ ಹೊರಹೊಮ್ಮಿದ್ದಾರೆ. ಇವರ ಈ ಭರ್ಜರಿ ಆಟದಿಂದ ತಂಡ 6 ವಿಕೆಟ್ಗೆ 146 ರನ್ ಪೇರಿಸಿತ್ತು. ಹೀಗೆ ತನ್ನ ಆಟದ ಹಿಂದಿನ ರಹಸ್ಯದ ಬಗ್ಗೆ ತಂಡದವರ ಜತೆ ಮಾತನಾಡುತ್ತ ಹೇಳಿದ ರಹಸ್ಯ, ವಿಡಿಯೋ ತುಣುಕೊಂದರಲ್ಲಿ ಬಹಿರಂಗಗೊಂಡಿದೆ.
‘ಮೂರು ಮಸಾಲೆದೋಸೆ ಹಾಗೂ ಮಸಾಲಾ ಆಮ್ಲೆಟ್ ನನ್ನ ಭರ್ಜರಿ ಹೊಡೆತದ ಹಿಂದಿನ ರಹಸ್ಯ’ ಎಂದು ಚಾಮರಿ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)