ನವದೆಹಲಿ: ಕೂಡುವುದು, ಕಳೆಯುವುದು, ಗುಣಿಸುವುದು ಇಲ್ಲವೇ ಭಾಗಿಸುವುದಾಗಿರಲಿ, ಯಾವುದೇ ಲೆಕ್ಕ ಮಾಡಬೇಕೆಂದರೂ ನಮಗೆ ಕೆಲವು ನಿಮಿಷಗಳಷ್ಟು ಸಮಯ ಬೇಕಾಗುತ್ತದೆ. ಆದರೆ, ನಡೆದಾಡುವ ಕಂಪ್ಯೂಟರ್ ಖ್ಯಾತಿಯ ಶಕುಂತಲಾ ದೇವಿ ಅಂಥವರು ಮನಸ್ಸಿನಲ್ಲೇ ತುಂಬಾ ವೇಗವಾಗಿ ಹಲವು ಲೆಕ್ಕಗಳನ್ನು ಮಾಡಬಲ್ಲವರಾಗಿರುತ್ತಾರೆ. ಇಂಥವರ ಸಾಲಿಗೆ ಸೇರುತ್ತಾನೆ 10ರ ಈ ಪೋರ.
ಮೂಲತಃ ಪಾಕಿಸ್ತಾನವನಾಗಿದ್ದು, ಇಂಗ್ಲೆಂಡ್ನಲ್ಲಿ ವಾಸವಾಗಿರುವ ನದೌಬ್ ಗಿಲ್ ಎಂಬ 10 ವರ್ಷದ ಬಾಲಕ ಒಂದು ನಿಮಿಷದಲ್ಲಿ 196 ಲೆಕ್ಕಗಳನ್ನು ಮಾಡಿ, ಗಿನ್ನೆಸ್ ದಾಖಲೆಯನ್ನು ತನ್ನದಾಗಿಸಿಕೊಂಡಿದ್ದಾನೆ.
ಇದನ್ನೂ ಓದಿ: ಆಗರ್ಭ ಶ್ರೀಮಂತನ ಏಕೈಕ ಪುತ್ರನಿಂದ ಸನ್ಯಾಸ ದೀಕ್ಷೆ ಸ್ವೀಕಾರ
ಆನ್ಲೈನ್ ಗಣಿತ ಕಲಿಕೆಯ ಟೈಮ್ಸ್ ಟೇಬಲ್ಸ್ ರಾಕ್ ಸ್ಟಾರ್ಸ್ ಎಂಬ ಆ್ಯಪ್ನಲ್ಲಿ ಈತ ಕೂಡುವುದು, ಕಳೆಯುವುದು, ಗುಣಿಸುವುದು ಮತ್ತು ಭಾಗಿಸುವ 196 ಲೆಕ್ಕಗಳನ್ನು ಮಾಡಿ ವಿಶ್ವದಾಖಲೆಯ ಕಿರೀಟವನ್ನು ತನ್ನದಾಗಿಸಿಕೊಂಡಿದ್ದಾನೆ. ಈತನ ಈ ದಾಖಲೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್ ಆಗಿದೆ.
ತನ್ನ ಈ ಸಾಧನೆಯ ಬಗ್ಗೆ ಹರ್ಷ ವ್ಯಕ್ತಪಡಿಸಿರುವ ನದೌಬ್ ಗಿಲ್, ಇದೊಂದು ರೋಮಾಂಚಕಾರಿ ಅನುಭವ ನೀಡಿತು. ಗಿನ್ನೆಸ್ ದಾಖಲೆ ಮಾಡಿದ್ದು ಸಂತಸ ಕೊಟ್ಟಿತು. ಒಂದು ರೀತಿಯಲ್ಲಿ ನನಗೆ ಎಲ್ಲವೂ ಕನಸಿನಂತೆ ಭಾಸವಾಗುತ್ತಿದೆ ಎಂದು ಹೇಳಿಕೊಂಡಿದ್ದಾನೆ.