ಅಹಮದಾಬಾದ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಥಮ ಮಹಿಳೆ ಮೆಲಾನಿಯಾ ಟ್ರಂಪ್ ಅವರು ತಮ್ಮ ಮಗಳು ಇವಾಂಕಾ ಟ್ರಂಪ್ ಮತ್ತು ಅಳಿಯ ಜರೇದ್ ಕುಶ್ನರ್ ಜತೆ ಇಂದು ಬೆಳಗ್ಗೆ ಅಹಮದಾಬಾದ್ಗೆ ಆಗಮಿಸಿ ಅದ್ಧೂರಿ “ನಮಸ್ತೆ ಟ್ರಂಪ್” ಕಾರ್ಯಕ್ರಮದಲ್ಲಿ ಭಾಗಿಯಾದರು. ದಿಗ್ಗಜ ನಾಯಕರನ್ನು ಪ್ರಧಾನಿ ಮೋದಿ ಆತ್ಮೀಯವಾಗೇ ಬರಮಾಡಿಕೊಂಡರು.
ಮೊದಲನೇ ಬಾರಿಗೆ ಭಾರತ ಪ್ರವಾಸದಲ್ಲಿರುವ ಮೆಲಾನಿಯಾ ಟ್ರಂಪ್ ವಿಮಾನದಿಂದ ಇಳಿಯುತ್ತಲೇ ಭಾರತೀಯರಿಗೆ ಸರ್ಪ್ರೈಸ್ ನೀಡಿದರು. ಶ್ವೇತ ವರ್ಣದ ಉಡುಪಿನೊಂದಿಗೆ ಪ್ರಕಾಶಮಾನವಾದ ಹಸಿರು ಬಣ್ಣದ ಶಲ್ಯವನ್ನು ತಮ್ಮ ಸೊಂಟಕ್ಕೆ ಕಟ್ಟಿಕೊಂಡು ತಮ್ಮ ಉಡುಗೆಗೆ ದೇಶಿ ಸ್ಪರ್ಶವನ್ನು ನೀಡಿದ್ದು ಎಲ್ಲರ ಗಮನ ಸೆಳೆಯಿತು.
ಭಾರತೀಯ ಡಿಸೈನರ್ಸ್ ಸಿದ್ಧಪಡಿಸಿದ ಉಡುಪನ್ನು ತೊಟ್ಟು ಭಾರತಕ್ಕೆ ಪ್ರವಾಸ ಮಾಡುತ್ತಾರೆ ಎಂಬ ಊಹಾಪೋಹಗಳಿಗೆ ಮಾಜಿ ಮಾಡೆಲ್ ಮೆಲಾನಿಯಾ ಟ್ರಂಪ್ ಪೂರ್ಣ ವಿರಾಮ ನೀಡಿದರು. ಬದಲಾಗಿ ಅಮೆರಿಕದ ಫ್ಯಾಶನ್ ಡಿಸೈನರ್ ಹರ್ವ್ ಪಿಯರ್ ಸಿದ್ಧಪಡಿಸಿದ್ದ ಶ್ವೇತವರ್ಣದ ಉಡುಗೆ ತೊಟ್ಟಿದ್ದರು.
ಆದಾಗ್ಯೂ ಮೆಲಾನಿಯಾ ಟ್ರಂಪ್ ಉಡುಗೆಗೆ ಹಸಿರು ಬಣ್ಣದ ಶಲ್ಯದ ಮೂಲಕ ನಮ್ಮ ದೇಶಿ ಸ್ಪರ್ಶವನ್ನು ನೀಡಲಾಗಿತ್ತು. ಸದಾ ಮೆಲೆನಿಯಾ ಟ್ರಂಪ್ ಸ್ಟೈಲಿಶ್ ಲುಕ್ ನಿರ್ವಹಣೆ ಮಾಡುವ ಫ್ರೆಂಚ್ ಅಮೆರಿಕನ್ ಡಿಸೈನರ್ ಹರ್ವ್ ಪಿಯರ್ ತಮ್ಮ ಇನ್ಸ್ಟಾಗ್ರಾಂನಲ್ಲಿ ವಿಶೇಷ ಉಡುಗೆ ಬಗ್ಗೆ ವಿವರಣೆ ನೀಡಿದ್ದು, ಹಸಿರು ಮತ್ತು ಚಿನ್ನದ ಚಿತ್ತಾರ ಇರುವ ಶಲ್ಯವನ್ನು ಭಾರತೀಯ 20ನೇ ಶತಮಾನದ ಜವಳಿ ದಾಖಲೆಯಿಂದ ಎರವಲು ಪಡೆಯಲಾಗಿದೆ. ಅದನ್ನು ಪ್ಯಾರಿಸ್ನಲ್ಲಿ ಪತ್ತೆ ಹಚ್ಚಲಾಗಿತ್ತು ಎಂದು ಬರೆದುಕೊಂಡಿದ್ದಾರೆ.
ಶಲ್ಯವನ್ನು ಹಸಿರು ರೇಷ್ಮೆ ಮತ್ತು ಚಿನ್ನದ ಲೋಹದ ಎಳೆಯಿಂದ ತಯಾರಿಸಲಾಗಿದೆ ಎಂದು ಹರ್ವ್ ಪಿಯರ್ ಇದೇ ವೇಳೆ ಮಾಹಿತಿ ನೀಡಿದರು. ಏನೇ ಆದರೂ ಅಮೆರಿಕ ಫ್ಯಾಶನ್ನೊಂದಿಗೆ ದೇಶಿ ಸ್ಪರ್ಶವನ್ನು ನೀಡಿದ್ದು ಭಾರತ ಮತ್ತು ಅಮೆರಿಕ ಸಂಬಂಧದ ಸಂಕೇತವಾಗಿತ್ತು ಎಂದು ಅನೇಕರ ಅಭಿಪ್ರಾಯವಾಗಿದೆ. (ಏಜೆನ್ಸೀಸ್)