ನವದೆಹಲಿ: ಜಾಮಿಯಾ ವಿಶ್ವವಿದ್ಯಾಲಯದಲ್ಲಿ ಡಿ.15ರಂದು ರೀಡಿಂಗ್ ಹಾಲ್ನಲ್ಲಿ ನಡೆದಿದ್ದೇನು ಎನ್ನುವ ಸತ್ಯಾಂಶವನ್ನು ದೆಹಲಿ ಪೊಲೀಸರು ಬಿಚ್ಚಿಟ್ಟಿದ್ದಾರೆ. ಪೊಲೀಸರು ರೀಡಿಂಗ್ ಹಾಲ್ಗೆ ನುಗ್ಗಿ ಲಾಠಿ ಚಾರ್ಜ್ ಮಾಡುವುದುಕ್ಕೂ ಮೊದಲು ಅಲ್ಲಿ ನಡೆದ ಘಟನೆಯ ಸಿಸಿಟಿವಿ ದೃಶ್ಯವನ್ನು ದೆಹಲಿ ಪೊಲೀಸ್ ಕ್ರೈಂ ಬ್ರ್ಯಾಂಚ್ನ ವಿಶೇಷ ತನಿಖಾ ತಂಡ ಬಿಡುಗಡೆ ಮಾಡಿದೆ.
ನಿನ್ನೆ (ಫೆ.16) ಜಾಮಿಯಾ ವಿವಿಯ ವಿದ್ಯಾರ್ಥಿಗಳ ಮೇಲೆ ಪೊಲೀಸರು ಲಾಠಿ ಚಾರ್ಜ್ ಮಾಡಿದ ವಿಡಿಯೋವೊಂದನ್ನು ವಿವಿಯ ಸಮನ್ವಯ ಸಮಿತಿ ತನ್ನ ಟ್ವಿಟ್ಟರ್ ಖಾತೆಯಲ್ಲಿ ಹಾಕಿತ್ತು. ಡಿಸೆಂಬರ್ 15ರ ವಿಡಿಯೋವಾಗಿದ್ದ ಅದರಲ್ಲಿ ಪೊಲೀಸರು ರೀಡಿಂಗ್ ಹಾಲ್ನೊಳಗೆ ನುಗ್ಗಿ ವಿದ್ಯಾರ್ಥಿಗಳ ಮೇಲೆ ಲಾಠಿ ಪ್ರಹಾರ ಮಾಡಿದ್ದು ಸೆರೆಯಾಗಿತ್ತು. ಈ ವಿಡಿಯೋ ಸಾಕಷ್ಟು ಸುದ್ದಿ ಮಾಡಿದ್ದು ಜನರು ದೆಹಲಿ ಪೊಲೀಸರ ವಿರುದ್ಧ ಆಕ್ರೋಶ ವ್ಯಕ್ತ ಪಡಿಸಲಾರಂಭಿಸಿದ್ದರು. ಆದರೆ ಇದಾದ ಸ್ವಲ್ಪ ಸಮಯಕ್ಕೆ ದೆಹಲಿ ಪೊಲೀಸರು ಅದೇ ದಿನದ ಸಿಸಿಟಿವಿ ದೃಶ್ಯವೊಂದನ್ನು ಬಿಡುಗಡೆ ಮಾಡುವ ಮೂಲಕ ಸತ್ಯಾಂಶವನ್ನು ಹೊರಗೆಳೆದಿದ್ದಾರೆ.
ರೀಡಿಂಗ್ ಹಾಲ್ಗೆ ಪೊಲೀಸರು ಹೋಗುವುದಕ್ಕೂ ಸ್ವಲ್ಪ ಮೊದಲು ಚಿತ್ರಿತವಾಗಿರುವ ಆ ವಿಡಿಯೋದಲ್ಲಿ ಕಾಲೇಜಿನ ಬಾಲ್ಕನಿಯಲ್ಲಿ ನಿಂತ ವಿದ್ಯಾರ್ಥಿಗಳು ಪೊಲೀಸರ ಮೇಲೆ ಕಲ್ಲು ತೂರಾಟ ನಡೆಸುತ್ತಿರುವುದು ಸೆರೆಯಾಗಿದೆ. ಮೊದಲು ಒಂದಿಬ್ಬರಿದ್ದ ಗುಂಪು ನಂತರ ಹತ್ತಾರು ಜನರದ್ದಾಗಿದ್ದು ಅದರಲ್ಲಿ ಕೆಲವರು ಕಲ್ಲುಗಳನ್ನು ತಂದು ಪೊಲೀಸರ ಮೇಲೆ ಎಸೆದಿದ್ದಾರೆ.
ಹಾಗೆಯೇ ಮಾಸ್ಕ್ ತೊಟ್ಟ ಕೆಲ ಪ್ರತಿಭಟನಾಕಾರರು ಓಡಿ ಬಂದು ಕಾಲೇಜಿನ ಕ್ಲಾಸ್ ರೂಂ, ರೀಡಿಂಗ್ ಹಾಲ್ನಲ್ಲಿ ಅಡಗಿ ಕುಳಿತಿದ್ದಾರೆ. ಇದೇ ಕಾರಣಗಳಿಂದಾಗಿ ಪೊಲೀಸರು ರೀಡಿಂಗ್ ಹಾಲ್ಗೆ ನುಗ್ಗಿ ಲಾಠಿ ಚಾರ್ಜ್ ಮಾಡಿದ್ದಾರೆ.
ಡಿಸೆಂಬರ್ 15ರಂದು ಜಾಮಿಯಾ ವಿವಿಯ ಆವರಣವು ಸಿಎಎ ವಿರುದ್ಧದ ಹೋರಾಟದಿಂದಾಗಿ ಅಕ್ಷರಶಃ ಹಿಂಸಾತ್ಮಕ ವಾತಾವರಣಕ್ಕೆ ತಿರುಗಿತ್ತು. ಪರಿಸ್ಥಿತಿಯ ನಿಯಂತ್ರಣಕ್ಕೆ ಪೊಲೀಸರು ಲಾಠಿ ಚಾರ್ಜ್ ಮಾಡಲೇಬೇಕಾದ ಅವಶ್ಯಕತೆ ಉಂಟಾಗಿತ್ತು ಎನ್ನಲಾಗಿದೆ. (ಏಜೆನ್ಸೀಸ್)